رجل يزوج إبنته لشاب أنقذ إبنه من داخل بئر بأبوسعد

الله يكتر الابار/ كان على الشهامة عندنا في السودان وما بنقصر ابدا

لا أملك إلا أن أهدي هذا الشاب الشهم رائعة الشاعر الراحل المقيم إسماعيل حسن (طيب الله ثراه ) وللشعب السوداني البطل ،،،، وأقول أن السودان بخير والحمد لله طالما أمثالك موجودين …. لك خالص تحياتي ،، وانا متأكد من ان شقيقة الشاب الذي أنقذته سوف تشيلك في حباب عيونها.

بلادي أنـــــــــــا

بلادي يابلادي اهلا يا بلادي

الف تحية ليكي من الفؤادي

بلادي بلادي اهلا يا بلادي

صدورنا حماية ليكي من الاعادي

بلادي انا بلاد ناسا مواريثم في اول شي كتاب الله

وخيل مشدود وسيف مسلول حداهو درع

تقاقيبن تسد الليل مع الحيران وشيخا في الخلاوي ورع

والله كم نخلاتا تهبهب في جروفا الساق

بقرة حلوبة تتضرع وليها ضرع

وساقية تصحي الليل مع الفجراوي

يبكي الليل ويدلق في جداولو دمع

يخدر في بلادي سلام

خدرة شاربة موية النيل

تزغرد في البوادي زرع

بلادي سهول بلادي حقول

بلادي الجنة للشافوها او للبرّة بيها سمع

بلاد ناسا تكرم الضيف

حتى الطير يجيها جعان ومن اطراف تكيها شبع

تشيل الناس وكل الناس وسع بي خيرو لينا يسع

وتدفق مياه النيل على الخيران

بياض الفضة في وهج الهجير بيشع

بلادي الصفقة والطنبور

داراتا تنح باليل

بنوتا تحاكي الخيل

تشابن زي جدي الريل

وشبالا مكنتل في الطريفو ودع

بلادي بلاد من التاريخ

من تيرهاقا لا عن ميسنا

حتى ان جاي خيرو تروع

بلادي امان بلادي حنان وناسا حُنان

يكفكفوا دمعة المفجوع

يحبوا الدار

يموتو عشان حقوق الجار

يخوضو النار عشان فد دمعة

كيف الحال لو شافوها سايلة دموع

ديل اهلي ديل اهلي

يبدو الغير علي زاتم

يقسموا اللقمة بيناتم

يدو الزاد حتى ان كان مصيرم جوع

ديل اهلي البقيف في الدارة وسط الدارة واتنبر كل الدنيا ديل اهلي

عرب ممزوجة بي دم الزنوج الحارة

ديل قبيلتي لمن ادور افصل ديل فصلي

اصحاب روحي والاحساس وسافر في بحار شوقم زمان عقلي

اقول بعضي الاقيهم تسربو في مسارب الروح

يقو كلي

محل قبلت القاهم معاي معاي زي ضلي

وكان ما جيت من زي ديل واسفاي وا ماساتي وا زّلي

تصور كيف يكون الحال لو ماكنت سوداني

واهل الحارة ما أهلي

فعلاراجل فى هذا الزمن الاغبر فكثير من الاباءفى البيت بكونو تمومة جرتق ساكت واى راى منو مرفوض ويقولو الجلكين قال من باب المسخره فى هذا الزمن رجل يقول لى بنتو زوجتك فلان دا الايكون مكمل الرجاله واكيد مابكون كوز وديل نسوانن خاتنهم لى شيل الشنط لزوم السفر الكتير ورونى راجل فى اى مسجد قال لى شاب انتا عاجبنى خلق واخلاق وانااديتك بنتى مافى بس معدنها حركات ركوع وسجود واخلاق مافى

شخصياً أنا شايف الموقف عادي ممكن يعمله أى واحد منكم ولا يتطلب كل الهيلمانة دي اللهم إلا إذا كانت البت دي بايركس وأبوها داير يخارجها بأى طريقة.

Congratulation to the father,the bride and the bridgroom

إن شاء الله تدوم الشهامة . وما يقوم بعد كل خلاف يقول ليها أنا أنقذت أخوك .
أبوك عرسك لي وكلامات من النوع دا.

فى السبعينات صديقى (صلاح) انكشح عليه جردل مليان موية غسيل عدة من فوق حائط احد منازل حى الخرطوم بحرى .. صرخ من هول المفاجأة وكمية ملاح اللايوق الخدرة البايتة جلبطت ملابسه .. دخلوهو بيت ناس موية العدة .. عشان يغسلو ليه القميص .. شاف البنية من النظرة الاولى اتجنن .. وطبعا الشعب السودانى فى الزمن داك منتهى الكرم .. ضيفوه كباية ليمون كباية شاي غداء فى راكوبة ناس موية العدة حسب التسمية السارت عليهم من ذلك الوقت .. اعجاب شديد كأنو بيعرفهم من زمن طويل .. ولان الحياة كانت سهلة وبسيطة .. تزوج (صلاح و اخلاص) .. ومن يوما غاطسين صلاح واخلاص فى جردل الحب .. وصار يطلق عليهما اسم (صلاح جردل واخلاص جردل) .. واي واحد تسألو عنهم يقول ليك ( القصة جردل ) .. وممكن تكون القصة بئر ذى دي وممكن تكون القصة قطار يتعطل فى الرهد .. او يحرن فى الميجا وجبل جاري .. وفى الغناء بغنو اهلنا ( حقيقة القسمة ما معروفة )!!

يعني نجهز لينا حبال وننتظر ولا ايه..؟
ربنا يوفق العروسين
واقول للذين يتحدثون عن ان الزواج يجب الا يتم على اساس المكافأة على الشهامة ان هذا القول ليس صحيحا لان الشهامة هي مقدمة تكشف طبيعة اخلاق الرجل وبالتالي تدل على ان صاحب هذه الشهامة سيكون اكثر حماية للبنت التي سيتزوجها . وهذا طبعا دون اسقاط مبدأ الرغبة والموافقة من قبل الطرفين. وهذا يتفق مع زواج نبي الله موسى من بنت نبي الله شعيب عليهما السلام. فشهامته في سقاية بهائم الفتاتين وقدرته على ما لا يقدر عليه الآخرين وغضه لبصره كلها اعطت مؤشرات الي انه يصلح ليكون زوجا لبنت نبي الله شعيب ولكن بعد ان ابدت البنت رغبتها فيه ووافق هو على ذلك. فارجو ان يكون هذا الزواج شبيها بذاك

مبروك للعروسين

الف حمدالله على السلامة للابن
مبروك للعريس والعروسة
بس العريس اخرج الابن من البير ووقع فى بير اعمق منها ربنا يلطف بيه ان شاء الله

اولا ياخوانا زواج البنت جزء من مسئوليه الوالد بعدين دى مامكافاه دى انا بسميها توافق لان ابو البنت ذى ما تقول كده كان بيفتش فى الشاب ده مضمونا و ليس شكلا و الحمدلله جاه جوه بيتوا و الشاب ده عمله صعبه فى الزمن الجائر ده33

والله الوالد استفاد وبختو هو وبنته اللي لقو ليهم راجل زي دة وربنا يبارك عليهم وعقبال البنات التانيات اللي عنده ابيار مقفولة

.. بعض التعليقات بعيدة عن مستوى الحدث .. الواحد فينا بيحتمى بى ضل (الراكوبة) عشان يجد قليلا من الراحة النفسية والترويح عنها بالقصص الاجتماعية بالفن بالثقافة بالادب بالتعليقات الجادة المعبرة المفيدة الخفيفة اللطيفة الظريفة وبكل شئ مفيد .. و (الراكوبة) يا احبتى هل تدرون معناها الحقيقى ..؟! .. هى مكان يلتقى فيه اهلنا فى السودان .. ناس البيت ناس الحلة والجيران والضيوف .. يجتمع فيها الناس بروح الصفاء والنقاء (سيرة وسريرة .. طاهرين عفاف ياسيدى خالين من كدر ..) .. هى مركز تداول الاخبار المفيدة والمفردات البسيطة والطرائف والنكات .. هى مؤتمر هى اتحاد هى اتفاق هى اجتماع هى رمز للوحدة والتعاضد والامان والسلام .. هى بنيان هندسى فى اجمل صوره .. ابدع فى تصميمه اهلنا فى الزمن الجميل .. المواد المستخدمة فى تشييده هم الناس انفسهم .. (كالجسد الواحد .. اذا اشتكى منه عضو تداعى له سائر الجسد بالسهر والحمى).. ولما لا فنحن الذين تغنينا ب(الفينا مشهودة .. والبعتر يقع بيناتنا بنسندوا .. شافعنا بيرى الموت فى الركاب سنة .. والحارة بنخوضا) .. غوصوا فى اعماق هذه المعانى الصادقة وجميلة .. وحينما تدركوا المعنى الحقيقى .. ستجدوا ان ذلك الشاب الذى انقذ اخيه من بطن الجب قد قام باداء السنة فقط .. الاشادة والتهنئة فى شكل شلال من العبير وباقات من الزهور والورد واقامة مهرجان من الفرح لهذا الشاب المنقذ فرض عين اجتماعى لكل اهل ابوسعد .. ومباح فى بقية المناطق الاخرى .. قيم اصيلة نبيلة فى (الراكوبة) .. نرجو من بعض الاخوة المعلقين التحلى بها .. ونرجو لكم لقاءا شيقا وممتعا فى ضل الراكوبة الظليل ..!!

ربنا يكتر من امثالك