العام الدراسي 2014.2015 يا ناس وصل
بسم الله الرحمن الرحيم
بمناسبه العام الدراسي الجديد من اشعار
الاستاذ عبد الله ساتي
حكايه صغيرة
لاقينا في الزمن الصعب
طفله شايله قسي الحياة
بي صوت معطف بالحزن
يا عم اقيف
انا عايزه منك فد طلب
حق الكراريس والكتب
الدهر يابا علي غلب
وانا هسه من كتر الهموم
دم العروق مني انحلب
يا عم اقيف
مرقني من هذا المطب
حق الكراريس والكتب
الدهر يابا علي غلب
ما تقولي ارجعي الي ابوك
انا عابزه منك فد طلب
وابوي زولا بالمعاش
فتل الحبل باع الحطب
ضاقت عليهو وسيعتا
خلانا قال ماشي الدهب
مما مرق ماجانا صاد
ياعمو ظرفنا جد صعب
يا عم اقيف
انا امي هداها المرض
واتيبست فيها العروق
مسكينه حيه بلا حياة
رويحنا بتساسق للمروق
صرخه صغارها الاربعه
في اللقمه تشتاق الحلوق
قرقوش نلمو من الكوش
انا هسه كيف اهدي واروق
يا عم اقيف
العيشه والحال الفقر
خلتني الح في السؤال
اديني بس حق الدروس
بعفيك من حق النعال
انا بمشي بي الزي القديم
اصلو الجديد دايرلو مال
ارحمني يرحم الرحيم
ساعدني كان يهدالي بال
يا عم اقيف
انا عايزه منك فد طلب
حق الكراريس والكتب
الدهر يابا علي غلب
[email][email protected][/email]
اللهم الطف باطفال السودان وفرج همهم واصلح حال السودان والسودانيين