ربع قرن انقاذ وانجاز وراء انجاز

السودان اصبح دولة عظمي .. معظم الفقراء يكدون العظام ان وجدوها مع الساوند سيستم
الإنقاذ منحت الحرية لابنا ء وبنات الشعب السوداني للي عاوز يهاجر يهاجر واللي عاوز يغترب يغترب
جعلت جنوب السودان دولة نفطية ..نشرت العدل والمساواة في دارفور .. وقدمت الدعم السريع لأهل جنوب كردفان ..
وجابت الخليج في ا لعاصمة ..قطر في بحري والامارات في الخرطوم وقريبا ايران في امدرمان.
صدرت الدكاترة والنبق للسعودية واستوردت لبن وصلصة المدهش من سلطنة عمان . . حافظت علي سعر الجنيه السوداني وزي ما قالوا لو ما كنا جينا كان الدولار وصل لعشرين جنيه وهسي الدولار بعشرة جنيه في زول مغالط!
وفرت فنان وفنانة لكل ألف مواطن لزوم الترفيه .. وعشرة قنوات نقة وغنا متشابهات وفرت العمل لما يسمي بجيوش المحترفين في انديتنا الغلبانة وبالدولار ووعدت جيوش الخريجين بالعمل وما الأعمال إلا بالنيات.
عطلت العمل في المدينة الرياضية وجعلت من ستاد المريخ الرد كااسل .. اخونت الهلال ونزلت الموردة وطلبت من الناس كفالة الفريق الوطني يتيماً.
يكفي الانقاذ فخرا بانها شغلت الناس يعني الما بشتغل ما بياكل وخلت بعض الناس يسفسفوا فيما يسمي بالفساد وتعتبر اول حكومة تتيح لشعبها التعدين عن الذهب بالمكوي وصحن الصيني.
جعلت المجلس الوطني كلمته واحدة جاي من حزب واحد في تجربة ديمقراطية جديدة تستغني فيها عن المعارضة المسكينة.
دخلت الكثير من المجاهدين الجنة وعقدت ليهم علي الحور العين أما الما جاهدوا فليهم الله وعيشة السوق والحب والظروف.
انجازات ربع قرن من الإنقاذ كثيرة واللي ذكرناه علي سبيل المثال لا الحصر وعقبال مية سنة انقاذ.

عمر الفاروق عبد الله
[email][email protected][/email]