ناظم… رجل بلا (ايادي)… حكاية زول بعيش حياتو…الصافية بالنيه السليمة..!
الخرطوم : يوسف دوكة
عادة درجت عليها يومياً.. وهي تناول كوب من الشاي في إحدي قهاوي السوق العربي بمعية عدد من الزملاء، واثناء تجاذبنا لأطراف الحديث، تفاجأت بأحد زملائي يردد عبارة: (سبحان الله) بصورة شبه مكررة، وعلى وجهه ارتسمت دهشة كبيرة ، لأتجه بناظري الي ما كان يتطلع اليه لاتفاجأ بذلك الرجل، الذى يضع كوباً من الشاي على مرفقيه ويحتسيه بتلذذ، دون ان ينتبه لتلك النظرات التى تلاحقه في المكان، أو (ربما إعتاد عليها)..فتصالحه مع إعاقته التى ولد بها ربما كان كفيلاً بأن يجعله بتلك البشاشة والمرح.
حذر وتردد:
التحدث مع ذلك الرجل وخلق نوع من التواصل معه في البداية، كان يتخلله نوع من الحذر والتردد لان قسماته تدل علي الصرامة والجدية، ولكن عندما القينا عليه التحية انفجرت اساريره فقلنا له بتوجس: (ممكن نتونس معاك…؟)..فرد علينا مبتسمآ:(إتفضلوا يا حبايبنا)..لنسأله مباشرة عن بطاقته الشخصية ليقول بعد ان وضع كوب الشاي بطريقة غريبة : (اسمي ناظم معاوية.. من مواليد مستشفي الخرطوم التعليمي في عام 1972.. وربنا خلقني بـ(يديني ديل).. يعني ماحصل لي حادث ..ودي قسمة من ربنا وامتحان لشخصي، وتزوجت في عام 2002 وفي نفس السنة انفصلت عنها).
انقطاع عن التعليم:
يحكي (ناظم) انه ترك المدرسة مبكراً وذلك لاسباب عديدة اهمها ان والده كان سياسياً كبيراً في عهد نميري.. وكان كثير الاعتقال يعني (يوم في البيت ويوم في السجن).. وعدم انتظام والدي في البيت جعلني اصبح تلميذاً متسيباً من الدراسة وهذا ما جعلني اترك مقاعد الدراسة، اما عن المشاكل التي تواجهه فيقول :(مافي اي مشكلة بتواجهني غير العطالة وانا من ربنا خلقني ما حصل اشتغلت)… ليصمت قليلاً قبل ان يضيف: (يعني انا اكتر نموذج جيد لكلمة العطالة)، ويضيف: (طبعا الناس بتقول دا حيشتغل كيف بيدينو ديل.؟ وانا بقول ليهم: انا بمارس حياتي الطبيعية زيي وزي اي زول.. يعني بيديني ديل بعمل حاجات مافي زول بقدر بيعملا.. واقول ليك حاجة انا زول خطاط جداً.).
حياة طبيعية:
ناظم يعيش حياة طبيعية برغم تلك الاعاقة ?على حد تعبيره- وحين سالناه عن كيفية تناوله الطعام قال:(انا باكل بيديني المقطعات ديل زيي وزيك.. واقول ليك على سر أنا باكل الفتة والطبيخ بس الفرق انا بأكل بالمعلقة.. وتاني حاجة بغسل ملابسي كل يوم وبستحما براي)..!! وعن كيفية قيامه بغسل رأسه يقول ضاحكآ : (والله ربنا قادر علي اي حاجة يعني انا بغسل راسي برغم الاعاقة).
هوايات واسرار:
اما عن هواياته فيقول ناظم: انا احب الكرة.. ومارستها زمان.. وكنت زول حريف وبالمناسبة انا لعبت الكورة مع نميري في الاستاد.. وطبعا نميري كان بحب الكورة حب شديد وانا كنت بلعب برجلي الشمال.. واي زول بيلعب بالشمال دا زول (لعاب وحريف).. ويواصل ضاحكا: (يعني مابتدي حريف)، ومن هواياته ايضاً انه يغني للفنان الجميل احمد المصطفى .
مواقف طريفة:
وعن المواقف الطريفة يقول ناظم : (مواقفي الطريفة كثيرة..ولكن كلها كانت زمان..وكنت بركب المواصلات زمن الدفارات (شماعة)..وكانوا الناس ينظروا إلي بإستغراب..ومرات الناس الفي الدفار كلهم بقيفوا لي (شماعة) عشان انا اقعد ومااقيف، وبعد مرات بدفعوا لي ناس مابعرفهم اصلاً، لكن الليلة اتغير الحال، ووالله تركب مافي زول يعاين ليك بالغلط.!).
امنية وحلم:
ناظم يحلم ويتمنى ان يمتلك (دراجة بخارية) كتلك الخاصة بالمعاقين، ويقول بعد ان صمت للحظات:(انا داير لي (موتر معاقين).. وانا عارف حتقولوا لي بتسوقوا كيف.؟ بس انا شفت ناس زيي كتار سايقنو..وبتمنى انو الحلم دا يتحقق)..
السوداني
ربنا يديك كل ما تحلم به إن شاء الله
التحية للأخ ناظم وتصالحه مع نفسه وعيشه حياته الطبيعية وهو من سكان حي أركويت محطة البلابل أو معاوية على ما أعتقد وآخر مرة شاهدته عام ١٩٩٨م وكان وقتها في ريعان الشباب
والله يا ناظم الزيك ديل الدولة ظالماهم كتير وربنا يحقق ليك أمنيتك دى
بسم الله والحمد لله … الأخ ناظم معاوية … لك التحية … الأخ ناظم أعرفه جيداً وهو إبن الرجل السياسي المعروف معاولة والذي سميت باسمه(( محطة معاولة بأركويت مربع (63 ) )) نعم والده كان شيوعياكبيرا ومعروفا لدى كل السودان وهو الابن الوحيد لمعاوية … وهذا الناظم كان والده رجل غني ومليار دير ولا يحتاج لأي مساعدة يسكن في أفخم عمارة …. والمهم هم كانوا أول من سكن في عمارات أركويت وبعد وفاة والدهم إلى رحمة الله … والله أعلم غير معروف حالتهم المادية وكنت قد سمعت بأن منزلهم قد تم بيعه والله أعلم …. ومنزلهم يجاور كوافير بردايس سابقاً وكركاس في وقت قريب والآن لا أعرف عنهم شيء … وسبحان مغير الأحوال ربما تدخلت حكومات هذا الزمان حتى في عمارتهم وسلبوها منهم والله أعلم … والشيء الذي كنت أعرفه عن ناظم((( أنه كان من أولاد الذوات وكان لا يتحدث على الإطلاق مع أي شخص وكان رده صارماجدا ولا يعرف كبير اوصغير إلا وردعه بكلمات ))) واليوم يحلم يحلم أن يمتلك دراجة بخارية …سبحان الله والله فعلاً الزمن طال ولربما يكون ذلك صحيحاً فسبحان الله يا حكومة الإنقاذ هذا ما أوصلتهم فيه الناس النظيفة والناس العفيفة إلى ما هم فيه الآن إبن معاوية يحلم بأن يمتلك دراجة بخارية؟؟؟؟؟ ….سبحان الله سبحان سبحان الله …. لعنة الله عليكم يا من تستحقون أن تلعنوا جهارا نهارا فوالله كان من المفترض أن يمسح بكم ناظم الأرض ولكن الدنيا بتدي حريف …. وعليك بالصبر يا ناظم … والحمد لله على كل حال ….
انا لا اعرفه جيدآ ولكنني وجدته بالقاهرة ولكن كان طلبه فريبآ اتمني ان يغير من نوع طلباته قليلآ