قصيدة جراح ركبة
(1)
يا ريسنا
يا دخرينا
الف سلامة
مليون كفارة كمان يا ريس
قالوا خلاص حتصين الركبة
ياخى سلامة و الف سلامة
بس بالمرة تصين الشمبر
و ممكن برضو تشوف الجِلبة
و لو متفضى
و ما متضايق
تعمل عمرة راس بالمرة
غير مصفى
و قلب طرمبة
و بديك فكرة ظريفة يا ريس
انك برضو تغير زمبة
جاتنا سيول و معاها كوارث
شعبك صابر و ما مهتم
يا ريسنا
بغير الركبة
بيوتنا اتماصت
نحنا فداك ياعمى الريس
اهم مكان فى الجسم الركبة
و قيمة الواحد من ركابينو
و ديمة بنفخر بى ركبينك
و ما ناسين اجمل رقصاتك
اهم حاجة تصين الركبة
و حاتتحفنا بأجمل رقصة
اجمل عرضة
و هزة وسط
و يمكن برضو رقيص بالرقبة
واثقين منك و من موهبتك
ما بتخذلنا
يا ريسنا
و حا تتحفنا
يا تاج راسنا
باجمل رقصة و اجمل عرضة
و يمكن فيها رقيص اسلولى
و حالفين نهتف لمن ترقص
مافى رئيس فى الدنيا مثالك
لا من قبلك و لا من بعدك
يا ريسنا
(نواصل)
[email][email protected][/email]
قصيدة معبرة با استاذ صابر..وساخرة وفيها تصوير لواقع مؤلم.. فقط كان الوزن سيستقيم في خاتمة الجزء الأول لو انك قلت (مافي رئيس في الدنيا مثالك.. لا من بعدك لا قبالك ) فيكون التشبيه المقلوب بالمبالغة بديعاً أكثر..
يا استاذ نسيت الضبة
اصلو المكنة بدون الضبة
بترشح زيت..
كان الزيت كتير اتكب
الطبلون بولع لمبة
قصيدة حلوة و معبرة عن وجع السودانييم و سخريتهم من الرئيس الظالم و نظامه, اتمنى ان نقرأ لك المزيد من القصائد عبر صحيفتنا المفضلة..الراكوبة
يا جماعة استهدوا ولا شماتة في مرض
وخلو كلامكم في المفيد وحاكموه في سياسته وليس في امراضه
وكل الناس تمرض
نسأل العافية