المتسابق الذى أبكـى لجنة تحكيم نجوم الغــد:..محمد بدوي أبو صلاح: ليس الفتى من يقول كان (جدي)..!!!
حوار: يوسف دوكة
من مواليد امدرمان نشأ وترعرع فى العباسيه… لاح نجمه فى اندية العباسيه والدورات المدرسية، قبل ان يلتحق ببرنامج نجوم الغد فى عام 2006، والذى كان له بمثابة سلم يصعد به الى عالم النجومية، وهو من أسرة فنية معطونة بالابداع ووالده فنان تشكيلى ويقرض الشعر، وجده غني عن التعريف فهو الشاعرالهرم (أبو صلاح).. نعم..انه الفنان الشاب محمد بدوى عبد السيد ابو صلاح صاحب الصوت الشجي والحنجرة الطروبة المفعمة بالحنين، وعازف العود الذى حير لجنة التحكيم، واطلق العنان لدموعها.. (السوداني) التقته في دردشة سريعة، فماذا قال.؟
بداية..متى كان بزوغ نجمك الفنى.؟
منذ الصغر.. وكنت أغنى فى اندية العرضة بامدرمان، وحينها كنت يافعا وشاركت فى الدورات المدرسية عندما كنت فى مرحلة الاساس والثانوى.
مامدى صحة مايقال عن استغلالك لنجومية جدك ابوصلاح.؟
من حيث الاسم لا احتاج الى ابوصلاح.. وليس الفتى من يقول كان ابى، وفى بداياتى اتجهت الى عزف العود وحصلت على الجمهور، والاغانى التى غنيتها للهرم ابوصلاح ليس هدفى ان احصل منها على نجومية جدى، بل بهدف التوثيق له، حيث قمت بتسجيل ثلاثين اغنيه له، وعملت توزيعا جديدا لأغنية (خلى العيش حرام) ونالت قبول المستمعين.
هل قمت باجازة صوتك.؟
اكيد.. وانا قابلت اللجنة فى عام 2006وحينها كان عمرى اصغرمن العمر المحدد لاجازة الصوت وقامت اللجنة باستثنائى واجزت صوتى فى اللجنة القديمة والجديده معاً.
صف لنا شعورك وانت داخل الى اللجنة؟
كنت واثقا من امكانياتى ولم يمتلكنى الخوف وكنت عاديا جدا جدا وانا مستعد لاية لجنة لاجازة صوتى.
كيف توفق مابين الدراسة والغناء.؟
توقفت عن الغناء فى مرحلة الاساس والثانوى ولاسيما ايام الامتحانات، وكنت اغنى فى ايام الاجازة فقط وعند دخولى جامعة السودان كلية الفنون اصبحت اغنى فى الاسابيع الثقافيه واحتفالات الجامعة، وعملت جمهورا داخل الجامعة، وهى اضافه حقيقية بالنسبة لى اكاديميا وفنيا وانا اوزع زمنى بصورة جيدة.
التحاقك بجامعة السودان كلية الفنون هل هذا يعنى انك تسير على خطى والدك.؟
نعم.. هو نفس مجال الوالد و ليس تقليدا له ولكن لحبي لهذه المجال، والفن التشكيلي والشعر والرسم والغناء توجد صلة بينهما، فالرسام يمسك الريشة ليرسم لوحه تشكيلية جميلة، اما المغنى فيعبر عن هذه اللوحة بريشة العود، والفرق بين المغني والرسام هو ان الثاني يعبر عن احاسيسه عن طريق الالوان، اما المغنى يكون عن طريق الكلمات، وكلاهما يمتلك احاسيس مرهفة، وانا عايز اعبر عن احاسيسي بالطريقتين ديل.!
ماهو جديدك الان؟
لدي حصيلة كبيرة من الاغانى الجديدة، مايقارب العشرين عملاً، من ضمنها اغنية للشاعر الكبير تاج السر عباس وهى (الجرح الثانى) واغنية (دنياي) للوالد بدوى ابوصلاح.
اين انت من الحفلات الجماهيرية.؟
قمت بالغناء في حفلات جماهيرية خيرية، وسوف اقوم فى مقبل الايام القادمة برحلة خارج السودان اقدم فيها اغانى جديدة للجاليات السودانية المتعطشه للفن السودانى، وشاركت فى مهرجانات امدر الثقافية، ومثلت السودان فى الدوحة عن طريق وزارة الثقافة وقمت بإحياء حفل فى النادي السوداني بدولة قطر.
اين محمد بدوي من الاغاني الوطنية.؟
قدمت اغنية وطنية للوحدة من كلمات حسن فضل المولى، وحاليا سوف اقدم اغنية ارضنا الخضراء وهى من كلمات العميد محمود توفيق.
برنامج نجوم هل اضاف الى مسيرتك الفنية.؟
بالطبع هو اضافة حقيقية، و اضاف لي جمهور، وانا اعتبره الطائرة التى اقلعت بى الى مطار الشهرة، بالرغم من اننى كنت اغنى قبل هذا البرنامج، واذا تحدثت عن هذا البرنامج فلن اعطيه حقه وانا من هنا اتقدم بالشكر لقناة النيل الازرق والاستاذ المبدع بابكر صديق ولجنة التحكيم.
السوداني
الله يتولانا برحمته …
الناس في شنو و الحسانية في شنو و هل البلد ناقصة فنانين و ( رقاصين) ..
يا ناس الراكوبة فضلا و ليس أمرا أتحفونا بما يفيد و لا تجعلوا من راكوبتنا حائط يتبول عليه
( البقر ) و إن تحدثنا عن الفن فوالله لا يملك هذا اليافع أي من مقومات الفن حتى تفرد له المساحات للحديث عن موهبته ..
أتمنى أن نتابع أخبار الشباب الفاعل أكثر من ( الحناكيش ) و و الله لو كان هذا أبني و أبوصلاح والدي لما سمحت له بالغناء ..
و برضو نتوقع أن يغير الله من أحوالنا ، لكن كيف و نحن نصدر أبناءنا ( للفارغة) ..!!!
كيف اجازت اللجنة صوتك. صوتك فيه نشاز واضح جدا… نصيحه لله ركز على الرسم.. الغنا ما بحلك..
بصراحه انا ماشايف ليه صوت اللجنه دي الظاهر بتاعة مؤتمر وطني عايزه تكسب الاطفال ديل
لو توجه هذا الشاب ليكون موسيقيا أو عازفاأو ملحنا لأصبح له شأن. أما فى مجال الغناء فهو يغنى كالأطفال.
بتعزف اه اما تغنني لا بعدين قصة البكاء ما معناة انك بتغني وربنا يوفقك في حاجات تانية غير الغناء
المشكلة البلدكلها اصبحت فنانين وشعراء وبتاعين دوبيت وبتاعين نفرة .. الشى (( تكساس )) .
لاتوجد لدى هذا اليافع اي مقومات سوى انه عازف ماهر للعود ولكن صوته مملا ونشازا ، وهو معجب بتسريحة شعره الجميل فعلا
جده ابو صلاح كان شاعرا مخضرما ولكن ليس معنى هذا ان يتعاطف معه الجمهور استنادا على قيمة ابو صلاح الفنية
عليك ايها الفتى بالاتجاه الة الموسيقى والفن التشكيلي فربما صنعت من نفسك نجما في هذه الفنون اما الغناء فلا اعتقد ان بالامكان ان تستمر فنانا جماهيريا
واسمع نصيحة هؤلاء المعلقين الذين اجمعوا جميعا على عدم جمال صوتك
صحيح ليس الفتي من يقول كان جدي ولكن الم ترى ان لجان التحكيم قالتها له (كان جدك)..!!! وصحيح انه عازف ماهر على العود ولكن صوته لا يؤهله ان يكون فناناً البتة.. ولكن هذا هو السودان كل واحد صار فناناً وعازفاً وصحفياً وكمان جابت ليها (محلل سياسي) مع انه الواحد بعد تعب يكتب عمود في صحيفة ..!!!!!!!!! مش غريبة
كان بدورك الحس المكوة ياخ بي وشك الزي الضفر دا
الود دة بكورك ساي
إلى الإخوة فاروق وحمد عابدين وعمرابي وابو قصي وكودو وغيرهم : اذا كنتم بتفهموا في الأصوات ليه ما تدخلوا في لجان إجازة الصوت عشان تقوموا بالواجب ؟؟!!
اللجنة اجازت صوته خلاص إنتهى الكلام وانتو ما بتفهموا في الأشياء هذه لذلك لا تدخلوا في موضوع أكبر منكم .. محمد بدوي أبو صلاح فنان غصباً عنكم واللجنة ما أجازت صوته من فراغ بل هي ترى ما لا يراه الآخروة
محمد بدوى عايش على امجاد جده ابو صلاح ودى مافى عنزان بتناطحو عليها
يعنى (متسلبط) ساى فى الفن وصوتو اجش لكن للامانة والتاريخ (جضام)فى العود ..
شوف قرايتك يا ابني والله الغناء ما بفيديك وما فيهو مستقبل خاصة في السودان وقروشو ما بدوم ولا بتقعد شوف الفنانين الكبار اعمامك او جدودك بماذا طلعوا الواحد بس لمن يموت يجوا الجماعة يعددوا في محاسنه كان اول من لحن الاغنية الفلانية وكان اول من غني لشاعر الهامة فلان وكان اول غزف السلم التماني وكان صديق للأولاده ما كان بضربهم . وكان يصلي مع ناس الحلة وكان يتفقد جيرانه وكان صوت متفرد وكان كافل يتيم .
ما عندو اى شى لا صوت لا حضور لاغنا ……….والدو زمان حاول يغنى لكن فشل غايتو ربنا يصبرنا على كل المصايب الجاب لينا برنامج نجوم الغد
حرم فنان مافيهو كلمة
ليست اجازة الصوت جواز مرور..الحكاية دي ذكرتني وردي الله يرحمو….لقي عبد الوهاب ولدو يغني في البيت قاليهو ياعبد الوهاب ولدي انت القاليك بتعرف تغني منو؟ قاليهو اجازو صوتي يابوي….قاليهو غشو عليك ومابتعرف تغني ممكن توزع او تعزف لكن ماتغني….ودي شهادة من اب لابنو واب زي وردي…عشان كده ياجماعة ما اي زول اجازو صوتو بيعرف يغني..اهو محمود عبد العزيز صوتو مجاز لكن صدقوني مابعرف يغني ولو ناس الاصوات عندهم معايير محددة للصوت الجمهور ليهو زوقو الخاص…عشان كده يا محمد البدوي خليك في عزف العود.
والله أنا لوكنت والدة الشافع دا كنت شلت مفراكة و دقيته بيها. أولا دى حنجرة صغير و بعد يومين بتتأثر بالغناء ما تفرح ياشافع و بعدين غير تسريحة شعرك دى عامل كدى زى و لد الهنود كابى زيت أملا فى الشعر. أمشى أقرأ و ذاكر و شوف ليك مستقبل
فنان تشكيلي آه
موسيقي آهين
مغني لعععععععععععع
بس بقول للشافع دا إنتبه لدراستك و مستقبلك و غنى شنو البتغنيه إنت؟؟؟؟؟ الغنى راح مع أهله. و بطل زيوت الهنود الفى شعرك دا. شايل ليه عود أكبر منه. أين دور الأب و الأم
أنتو يا جماعة الجنا دا سوداني ولا اندونيسي*** أنا أول مرة في حياتي اشوفوا هنا في الراكوبة دي ** التلفزيونات بتاعت الغناء دا كلها ما شفتوا قاعد يغني*** وهل هو من برنامج تشاهد غدا بتاع النيل الازرق***
عشان شعرو مسبسب وناعم
سبحان الله .. والله قريت الخبر دة ونمت بالنهار.. حلمت بالود دة بالتفاصيل الاتية:
انا شغال اكنس البيت وناس امي قاعدين واخواتي الكبار..(جزء حقيقي)
شوية شوية جو اخواتي من المدرسة(حقيقي) وقفت قت يتموا شغل البيت هم اصلو انا اكبر منهم
نفضت يدي كدة شربت موية قعدت وجا خاشي محمد بدوي سلام يالخالة وشرب موية وين صاحبي دة (قاصد اخوي الاصغر صحبو) قات ليه مافيش.. يا ولد انت بتاع الغنا في التلفزيون دة انت ودمنو.؟؟
قام قال ليها اسم امه (بينة) ما معروف دة اسم امو الحقيقي ولا لا ؟!!!
فالت لا حول ولا قوة الا بالله انت ما ولدي كان كدي.. اتبسم ودقر راسو ومشي قعد ..
قعدت قت ليهو انت ما عندك اغانيك الخاصة .. عندي اغاني اديتم لي زول وهسة خلى الغنا بقى بتاع كمبيوترات وبلاوي زي دة (الجزء دا حقيقي ) .. قال لي مافي عوجة يازول.. المهم جا واحد خاشي ما عرفتو لكن دخولو بينتا عادي معناهو قريبنا .. المهم انا بتكلم في التلفون بيهظروا وداك اداة علقة كدة .. انتهيت من المكالمة وكلي حنية عليه .. شنو الحاصل ؟؟ قال لي عوارض بس يا قرابة .. ونفس الزول الاداه العلقة وواحد برة في الشارع اتلموا كدة ماشين مشوار .. وقت شنو يا اخواننا ماشين ..؟؟؟ اي ماشين وجايين .. رجعت جوة البيت قفلت الباب كدة وصحيت زهجان زهجة وكاتمة وسخانة ..
مش حاجة غريبة ؟؟؟؟
الجدير بالذكر انو حضرت تصوير الحلقة اللى فاز فيها مع ابتهال في والبقية .. وعرفتو اليوم داك ومنها تاني الا في السوق العربي جاي من مدرسة ولا جامعة ما عارف؟؟ وتاني الا الخبر دة
دة معناهو شنو؟؟ حاجة غريبة
أنا وأعوذ بالله من هذه الآنا بعزف علي العود والكمان والطنبور والناي والجيتار والحمد لله كمان برسم و صوتي لا بأس عليه لكن ما بغني وما إتمنيت أكون فنان مغني لكن عزف ورسم نعم إتمنيت … طبعا ما درست الفنون دي لكن هي هواية ورغبة … محمد صلاح مجيد في العزف علي العود إلا أحيانا ( بشطح ) وما بتقيد بالزمن .. لكن صوت لا لا لا وألف لا , ولو صوتوا كان جيد كان ظهر بعد سن البلوغ خاصة وهو الآن بالجامعة زي ما بقول.
وهو الجن دا لم عرضو صوتو على الفنان عثمان حسين قال ليهو شنو لو بتزكرو الكلام دا
(( صوتك هسع جميل لكين لم تكبر ما اظن يكون كدا ))
وانا فى راى كلام الفنان مش وجى والود دا هسع صوتو ما جميل واتغير ما بق زى ما دخل التلفزيون من الاول
وكان رسمه زي غناه أحسن يدخل معهد والمسيقى والمسرح ويتخصص في آلة العود إمكن ينجح
كيف حالك يا اخ السنجاوي وهلا بيك : والله أنا ما عندي علاقة لا بي ود أبو صلاح ولا غيره والفن بهذه الطريقة في نظري حرام : بس بشوف السودانيين بيفتوا في أي شى عشان كدة أنا سألتك , وصراحة ما أقتعتني على أي أساس الجمهور بميز ولماذا الجمهور عندو المقدرة للتمييز ولجنة الصوت ما عندها هذا الحس ؟؟ هذا هو الذي أسأل عنه .. يعني ما هو الضابط المتفق عليه لتقييم أي تجربة صوت حتى نحكم على أسس علمية أرجو أن يكون كلامي واضحاً يا أخ السنجاوي مع خالص الشكر
بهاء