يوم ما تقوم ثورة..ما تقول أنا السويت..وأقضولي حاجة البيت( قصيدة)

بسم الله الرحمن الرحيم
يوم ما تقوم ثورة..ما تقول أنا السويت..وأقضولي حاجة البيت( قصيدة)
يا الولدو في الغربة
أو في الوطن تاتيت
شاركت في هبة
أو حتى إتمنيت
أو تسكنك حسرة
على ثورتين وبكيت
لما الوطن فجأة
قسموه وانت أبيت
لا شاوروك فيه
لا بيه يوم ناديت
لا يوم رضيت بالهم
لا ليه يوم أرضيت
أوعاك من تقنع
من شعب منه أتيت
تاوق من الشباك
الثورة جمب البيت
شيل الهتاف وامرق
ومعاك ناس البيت
ويقوموا أهل الحي
لو بالصدق ناديت
لو للجموع باريت
ما خفت واتدسيت
واختا الكلام الني
يوم ما تقوم ثورة
ما تقول انا السويت
واقضولي حاجة البيت
لو كنت متظاهر
أو حتى كاتلت
ما تخت في بالك يوم
تاخد تمن من شعب
برعاك من تبيت
النفس طماعة
ودين الوطن أغلى
من كرسي أو منصب
حب الوطن أعلى
ما تسك ليك مكسب
تكفينا حرية..
وعداله ثورية
في سكة ابدية
ما فيها جهوية
ما فيها قبلية
والراية قوميه

معمر حسن محمد نور
السبت 1/ نوفمبر 2014
[email][email protected][/email]