كيف أكرهك..؟

أنا بعشِقك ..ما بكرهك
أنا بكره الزول البخُت وطناُ بديل فى مطرحك
بيهوا احتمى..
رافض تمام الانتماء ليك ياوطن ..
هويتوا ذاتا على المحك
ما قادر يَميّز بين نظام حاكم عنيد
بين وطن راسخ تليد
فيهوا عزة الوالدة كانت ..تحتفل بى كل وليد
تلقاهوا ماخد ملمحك
كيف أكرهك
يا بلدى يا مهد الجدود
مين يشبهك..؟
أنا ما غشيم ..يا وطنى حاشا ولا لئيم
أنا من سلالة الزمن القديم
جدى ترهاقا الكبير
أمى من نسلٍ كريم
من ذهنى قط ما بمسحك
بينى بينك يا بلد ميثاق عظيم
محال أخونك أجرحك
عاشق تُرابك يا بلد فيك مستقيم
ما ناوى أبداً أبرحك
جاحد أنا..ناكر جمايلك ..يا وطن..؟
شان اكرهك..؟
إن جُرت يا وطنى الحبيب فى يوم علىّ
بسراع أجيك ..طالب السماح
يا وطنى أسعى أسامحك
كيف أكرهك..؟
بينى بينك ذكريات
مدفونة فيك من ماضى فات
مغروسة فى جوة الأرض..
مصونة زيها والعَرِض
كيف افترض
أجفاك يوماً أكرهك
أنا فيك ما نبات مزروع هنا ..
أثمِر أنا ..محصول وفير ..شان أفرِحك
أنا عندى فيك كم من رفات
أهلى الزمان أهل الثبات
الزينوها ملامحك
أنا بعشقك ما بكرهك

بلا أقنعة
صحيفة الجريدة السودانية
[email][email protected][/email]