الحكاية ( محاولة شعرية بالدارجي)

الحكاية ( محاولة شعرية بالدارجي)
يا حكاية
يا مشاعر باقية غاية
سكة كل الناس تخافا
يا اساطير يا خرافة
يا ( سخافة )
اتبدلي ما تبقي غول
للبفكر وللبقول
ادي الحقوق لي كل زول
وكوني للضالين هداية
واهدي للطلاب قراية
وابقي للعارفين مرايا
واتبدلي ما تبقي غول
ابقي انت المعجزات
واترجلي شوفي الفرق
بين النواح وبين الضحك
دي الآهة منك يا حكاية
واقفة في كل الطرق
وجوانا تب من غير فرق
انا غايتو ما عارف المعاي
لاكين براي — جواي حرق
مالياني آهات يا حكاية
لا بتشفع لي قراية
لا بتشفيني المحاية
والحمد لله كفاية
حالي في عز الشباب
باقي السؤال
اليهو ما موجود جواب
يوم انت اهملت الشياب
كيفن يكون حال الصبايا
السة ما حست وجود
والمواطن في الحشايا
واللي جاي من غير سماية
وانت لسع ماشة جاية
وانت لسع ماشة جاية
وانت لسع ماشة جاية
وما بلومك يا حكاية
مني ليك كل التحايا
وما تقولي خوف
زيي زي كل الالوف
انا زول ولوف
وشان شجاعتك يا حكاية
ماشة في الشارع تطوف
وشان محاسنك يا حكاية
باينة للزول البشوف
وشان ثمارك يا حكاية
ساهلة دانية القطوف
وشان حكاويك يا حكاية
ظاهرة في كل الحروف
اتمددي
طولي السحاب
وابقي للمطر السحاب
وغوصي اعماق البحار
والحقي قمم الهضاب
ما تعرفي خوف
اللمة ما عارفة الحكاية
وما تقولي خوف .
عبدالصادق ادم احمد

[url][email protected][/url]