الشاعرة نضال حسن الحاج : هذه أسرار القصيدة التى أغضبت المريخاب مني

حوار: عمران الجميعابي

الشاعرة نضال حسن الحاج صوت نسائي عرف كيف يشق طريقه جيدا وشعريتها العالية ساعدها في ذيوع صوتها داخليا وخارجيا التقيناها على عجالة من خلال مشاركتها في ملتقى شعراء السودان بولاية الجزيرة ممثلة شاعرات الولاية مؤكدة أنه متى ماجاء نداء الجزيرة تسقط باقي النداءات ، موضحة أن النجم يصنعه الجمهور وليست المؤسسات والمحافظة على إيقاع الجماهير هي كامل النجومية. تطرقت الشاعرة نضال الى العديد من المحاور فإلى مضابط الحوار :
* كيف وجدتم ملتقى شعراء السودان بالولاية؟
نحن سعيدون بالملتقى ونتمنى أن يصبح سنوي وهذا جهد تشكر عليه وزارة الثقافة والإعلام بالولاية والمثل السائد في الخرطوم (انو الجزيرة بتلد والخرطوم تربي) والمبدعين كلهم من مدني والخرطوم تقوم برعايتهم وتقدم لهم المنصات التى يمكن لهم من خلالها تقديم إبداعاتهم، منهم من تنطمس فيه ملامح الجزيرة وفيهم من يحافظ عليها وأنا مبسوطه انو يكون في محفل في ولاية الجزيرة على أساس أنها تحافظ على مبدعيها ومهما جار بيهم الزمن يعودا لولايتهم. ومتين ماجاء نداء الجزيرة تسقط باقي النداءات.
*هنالك مؤسسات إعلامية لها الإمكانيات في صناعة النجم؟
صناعة النجم أنا ضدها تماما والنجم بيصنعوا الجمهور مابتصنعوا مؤسسة مهما اجتهدت المؤسسات في الشخص عشان يبقى نجم مابيبقي زي زول وهبو الجمهور النجومية وبأكد انو المحافظة على إيقاع الجماهير هي كامل النجومية.
* حدثينا عن تجربة تقديم برنامج وطني يجمع شعراء الدوبيت والمسادير لعكس قيم ومضامين الشعب السوداني ؟
مثلما ماوافقت على برنامج ( قهوتنا) لانو بيحافظ على تراثنا وبيشبهني لأني زولة بسيطه وبالتالي كانت الموافقه على برنامج (مواسم ) لأنو مابيدخلني في توب ماحقي لأنو في النهاية برنامج هادف بيمس كل المجتمع السوداني ولسة في البداية أتمنى أن ربنا يوفقني.
* إذا عرض عليك برنامج بزي معين في فضائية رؤيتك ؟
لم أمر بمثل هذا الموقف بعد، وأنا مازلت ( بت الجزيرة ) وزول قدر يحافظ على لهجتو كيف مايقدر يحافظ على قيمو السمحة. وبعتقد أن أي زول يدير نفسوا أفضل مما تديروا فضائية ولا يديرو مدير وبالتالي الزول بيمش بدون مايحرج روحو ومجتمعو ومديرو.
*الشعر لغة غنائية والشاعر مهندس حاذق لصناعة القصيدة أين تجدين نفسك بين ضروبه الفصحى والعامية ؟
الفصيح له ناسه المبدعين في مجاله والأمثلة كثيرة وأنا بكتب الفصيح لكن مانال كثير من اهتمامي لأني لاقية روحي في الدارجية لأني بديت بالدارجية وبالتأكيد دا مابمنع أن أكتب فصيح وكانت مشاركتي بيهو في بيروت ورفضت أن أشارك بأكثر من نص واحد باعتبار أني أتيت الى بيروت لأمثل الدارجية السودانية وعشان أجبر الناس البرة يفهموا الدارجية السودانية.
*هل نظمت نضال شعر غنائي ؟
وأنا بردد على طول ان مافي زول بيكتب قصيده غنائية لكن بيجي فنان بيلقى فيها روحو عشان يغنيها. وكتبت الكثير من القصائد البسيطة الممكن تتغني اتغنت منها واحدة غناها ضياء السر واتذاعت في القنوات السودانية.(والقصيدة عروس متين مالقت العريس البناسبه حتكون ليلة زفافه).
*إدارة التنوع الثقافي والاجتماعي في الأجناس الإبداعية المختلفة هل يمكن أن يكون معبر قوة يوحد أهل السودان ويحل كثيرا من المشاكل السياسية ؟
بالتأكيد لأن بنقول الثقافة هي الوعاء البيجمع كل السودانيين فبالتالي بيكون دافع قوي يساعد على توحيد السودانيين لأنهم متوحدين بي قلوبم حتى لو كان في كثير من الحاجات الطرأت عشان الناس تطلع بره وعشان الناس تتمرد لكن ساعت الحارة بنبقى واحد والحارة بنجيبا بالثقافة.
*انقسام القاعدة الجماهرية تجاه نضال في الوسط الرياضي بسبب القصيدة المنتشرة مؤخرا عن نادي المريخ هل هذا لا يؤثر على القاعدة الجماهرية لنضال ؟
نعم الحديث بيعتمد على الكثير من المبررات اولا القصيدة الانتشرت بواسطة mb3 اتسجلت قبل اربعة سنين وهي كانت رد في مسرح بين شاعر هلالابي وشاعر مريخابي وأنا كنت بمثل الهلال لأنو ماكان في شاعر بيمثل الهلال (لكن اليقول أنا قريت القصيدة في وسط مافيهو شاعر مريخابي عشان يرد وعشان يستمتع الجمهور يكون كضاب ) وكانت القصة متعة جمهور ومشت لأكبر من كدا وامكن أكبر دليل اني الآن ماعندي علاقة بالوسط الرياضي بس المسألة شلاقة مسرح.

السوداني