كيفن تقول لى يا رزيل…؟

كيفن تقول لى يا رزيل..؟
المولى خالق الناس جميع..
فى محكم التنزيل..
كرمنى قال..
فى أحسن التقويم أنا..
أنا ما رزيل..
من حقى انتخب الرئيس..
أو حتى نائبنا القبيل..
لو شفت فيهم ..
البحقق لى مُناى..
أنا ما براى..
شوفوا كم واقفين وراى..
أنا برضى سودانى الأصل..
عازة أُمنا يا أخى..
أبونا كان إسمو الخليل..
هم الأرازل يا حبيب ..
القالوا لا..
هم المعاى..
من حقهم ..هم عندهم يا سيدى رأى..
رافضين يصوتوا بى وضوح..
قالوا وين فات الحوار..
شافوهوا مات ما فيهو روح..
بئس الوصف ..
يا سيدى قـف..
نفس الكلام قالوهوا من قبلك قبيل..
للتابعوا النبى الكريم ..
سيدنا نوح..
يا سيدى والقرآن دليل..
ما شفت كيف سيد الرسل..؟
نبى الهدى الممدوح..
قط ما أساء..
للخالفوا المولى الجليل..
ما قال أرازل..
حاشا لا..
قال ياقُريش..
أخٌ كريم..يا هؤلاء..
اذهبوا رغم الأذى..
أتأسوا بى نبى الرسالة..
احترموا للشعب الكريم هم ما حُثالة..
هم خالفوك الرأى..
وصفتهم يا سيدى بالقوم الرزالة..
أنا منهم..
أنا مارزيل..

بلا أقنعة..
صحيفة الجريدة السودانية..
[email][email protected][/email]