مظاهرات ببحري المحطة الوسطى

قرررررررررررررررررررررررررررررررررررررررربت……….أهلى الغُبش
البظام يترنح فلا تدعوه يلتقط الانفاس…………سكوهو سك….لامن ينبرش

غرقان بيرقص منتشي ..
ووطنا مقطوع من خلاف ..
وبأسم الله ما خلالنا شي ..
وفصلنا في آخر المطاف ..
يا ناسي أقدار الرجال ..
ما تخشى غدر الله وتخاف ..
كتر عوج الكلام والميل ..
وتحت الجزمة مليون ميل ..
تحت الأزمة طاحونة حوافر الخيل ..
سقط تلت البلد عفوا ..
سقط نص البلد لهوا ..
سقط كل البلد سهوا ..
فهل صحاك ضمير الأمة في هجعة هوايد الليل ..
على زبد الغنا الممحوق؟ ..
شنو الخلاك تنوم تحلم على على خرطة وطن مسروق؟ ..
وطن في السوق .. وطن أشتر ..
مرق من ذمة التاريخ على ذمة كلاب الحر ..
ينوم في جبة الدرويش ..
يقوم بي بدلة العسكر ..
.. فيا ويلك في يوم الويل ..
ويا ويلك .. تقوم تحتك قيامة الناس ..
أفواج الضحايا ..
ستات الكجيك والشاي ..
والناس البعرفو شليل ..
حشود الطلبة والعمال ..
وبنوت الغياب والليل ..
طفولة مشردة ونازحين ..
وكم حجاج .. يجيك من ديل يجيك من وين ..
أولاد الشوارع عووك .. المعدمة ومعدومة ..
قطامة وقرضمة وراندوك ..
لماضة وطرقت حلقوما ..
من كل حتة يجوك .. يوم التسود يوما ..
ناسات حكومة الجن .. وناس جنها الحيكومة ..
ما طالا الشوارع في .. في ولاد بعرفوا القوما ..
ولاد راقدين .. وأولاد اسمها المايقوما ..
ديل أولاد شريعة قوش .. المستضعفين في الأرض ..
يبنوا ويهدوا عروش ..
لا بتخون البعض لابتشتريها قروش ..
في كل حته وراك تمرق تلاقي جيوش ..
أصدق لسان الحال من نضمك المهبوش ..
نفس الولاد جايين من طينة حضارة كوش ..
حافظين شعر حميد ..
فاهمين قصايد الدوش ..
ما تمشي يا محجوب دايرين نظبط بوش ..
يا داب عرفنا الصاح ..
دخل الكلام الحوش ..
وشكرا .. شكرا سيدي الحجاج

يلا يا سودانا أصحى
المواقف باينة واضحة
يا مهندس في المصانع
ويا طبيب عصيانو صحة
ويا مُزارع في المزارع
وكل موجوع في مصحة
يبقى عافية وبلدو صافية
ماخدة من إيمانو لمحة
بانية ضد الجوع صوامع
ورافعة راية الحق مدافع
تهزم الطغيان وتمحىَ
في الرواكيب والجوامع
وفي ملفات الشوارع
وكل حارة وكل سرحة
ثلة الفاسدين تزيلا
والقوانين الهزيلة
شعب ثائر لينا أوحى
إنو في العصيان مصيرو
والكفاح يهدينا لوحة
والنضال سكة مسيرو
والصلاح منك تنحّى
يا متاجر باسم دينو
كل خطوة مشيتا جنحة
الضلال جواك ندينو
وتهري صدر الذل ذبحة
ونحن ما نامت عيونا
ولـّا صوتنا العالي بحّ
لسة بي حبك نهاتي
يا وطن مقدام وعاتي
الصمود ما عمرو زحّ
كنا صابرين فـ احتمالو
بس صبُرنا الليلة شحّ
وعد صادق بانهزامو
بعدو نفتح ألف صفحة
لي بلد مليان محافل
بيها قلب الثورة فحّ
نخنق الضيق والمهازل
والروابي الطيبة تضحىَ
امتداد حنية ماهل
شايلة من أعماقنا نفحة
مالية أرض الخير جداول
رافعة للبنيان معاول
وزارعة في احساسنا قمحة
يلا أمشو وطيرو غورو
تبقى كل الدنيا سمحة
يرجع الحق لي ديارو
والجنوب الراح وضحىّ
يلتئم جرح انفصالو
وجرحنا الأعمق ألحّ
تشفى آلام انكسارو
غنية غنية ومدحة مدحة
وتبقى دارفور النبيلة
في بلادنا أساس ودوحة
والمناصير البواسل
وكردفان الخيرا واصل
والشرق مستني فرحة
يلا يا سودانا فرهد
ثورة في حبك تزغرد
ألف مرحب وألف مرحى.

ياحرامى.. ياسراق..
لمتين بتحسب أنت براك
ياضلالى.. يافاق..
لمتين.. تشرع ونحن معاك
أنحنا الدين فينا فطره والاسلام لينا سترة
وتقاليد فينا.. سمحة.. قديمة ما كانت ليك فكرة
وشرع الله فينا قديم
والإسلام لينا….. حميم
والإيمان فينا …عظيم
وبالغفران لينا..رحيم
وكان للكرم و الله مشهود فينا
وكان الحارة جات بن شداد ما بدانينا
وكان للطيبة مافى تب زولا بخاوينا
الا الحقارة ما بتدار ونحناالبينا اصبح تار
لانوا..حقارتك.. مست فى ..القلب اوتار
والراجيك كثير فيهوا النار.. وفيهوا الصارم البتار
زى مابترت رقاب وحرقت قلوب خالية من اوزار
حنقطع راسك ونرفعه فى صاريه فوق تذكار
ونسلخ جلدك ونعمل منه خمار
لبنوت عازه ألما هجلبن فوق زار
وتعود عازه عزيزة يبقى ليها مدار
مكرمة وحاملة من العلم……. اسرار
وحامية للإسلام دوام من هجمة الفجار
وتعود عروس فى ليلا تضوي عازه فنار
والتغير واجب ولازم تتغير الأدوار