لو

لو حبيبك.. قرر إنو خلاص يسيبك..
حقو تقبل بي نصيبك..
أوع تجزع من قرارو وترتفع أصوات نحيبك..
وما تخلي جروح غرامك في قناعاتك تريبك..
وتبدأ تكفر بالمشاعر والدموع للهم تسيبك..
الفراق – الكان خيارو – ما أظن في الريد يعيبك!!
الصبر لازم يلازمك.. ما يشيلك خوف.. يجيبك..
الله هو الكاتب عذابك.. وهو الرسم أحزان قليبك..
أبقى رضيان يا متيم.. قسمة المولى بتصيبك..
****
ولو.. حبيبك قال وداعاً.. وقرر إنو يفوت ودادك..
أوع تجري ورا سرابو.. وتستكين لي جور سهادك..
البحبك ما بضيمك.. وما بطيق نيران بعادك..
وما بيدور ليك المذلة.. ولا بيرحل من وهادك..
بيحتمل زعلك وجنك.. وبيحتمل لحظات عنادك..
ليك بيتمنى السعادة.. وإنو يتحقق مرادك..
راضي دايماً بي ظروفك.. وما بيحاول اعتراضك..
ولا بيصر يفرض أوامرو.. أو يصر يملك قيادك..
****
لو حصل كتر غيابو.. وعن لقاك قلل حضورو..
ولو شعرت بانشغالو.. وبي برودو.. وبي فتورو..
حقو تعرف دي النهاية.. وما تفكر يوم تزورو..
أصلو شوفتك ما ضرورة.. ولا بقت أسباب حبورو..
ولا بقيت إنت بتهمو.. ولا بقيت عطرو وزهورو..
ولا كمان لسع سميرو.. ولاكا ساعة الضلمة نورو..
ولا قريب من أمنياتو.. ولا بتعرف كل أمورو..
المحبين لما يقسو.. ديمة بيلفو ويدورو..
***
ولو.. حبيبك باع حنانك ومات ضميرو
أعرف إنك كنت واهم.. وإنو قدرك ما مصيرو..
انسى أي وعود كبيرة.. وانسى نسامو وعبيرو..
أرمي عشمك في عواطفو.. ما أظن تلقاهو خيرو..
بكرة الله يعيد سعادتك.. يبرى جرحك.. وتلقى غيرو .
تلويح:
الافتراضات في الحب يجب أن تحسم دائماً لصالح إنسانيتنا

اليوم التالي