قالوا ? وقلنا

لا يَفُلُّ الحديد إلا الحديد : المغالطني يمشى شارع الخرطوم ? مدني


* المرء بأصغريه قلبه ولسانه : : أهم شيء ما قالوهو ? و(جيبه)

* إذا حضر الماء بطل التيمم .: ده إذا (الموية) جات

!

* الدراهم مراهم : مراهم بس؟ دى مراهم .. ومضادات حيوية .. ودربات .. والأكسجين ذاااتو..


* إذا تخاصم اللصان ظهر المسروق : فى الزمن ده 60 لص يتخاصموا المسروق ما يظهر.


* حبل الكذب قصير : ده كان زمااان هسه بقى طويل جنس طول ربع قرن ما يظهر


* حرامي بلا بَيِّنةٍ شريف : بعد ما نجيب البينة برضو شريف. 


* بليلة مباشر ولا ضبيحة مكاشر : والله بعد اللحم البقى غالي ده المثل ده عاوز ليهو مراجعة
*اطلبوا العلم ولو في الصين : ليه الصين البعيده دي؟ ده كان قبل ثورة التعليم العالي هسه تجيب 50% تقرأ طب ? هندسة .. ذرة .. الكلية البتعجبك. 


* إذا تم العقل نقص الكلام : وأقول المذيعين والمذيعات ديل نضامين كده ليه ؟

* لكل جَوَادٍ كَبْوَةٌ : وبعد داك (ترقية) كمان.


* لا يضيع حق وراءه مطالب : هذا يعتمد على سرعة التقاضي وهل القاضي نقلوهو وإلا قاعد ؟ والاستئناف ح يرجع من المحكمة الفوق بعد كم والعجب لو القصة مشت (الدستورية) !


* في التأني السلامة وفي العجلة الندامة : شعار (الحوار) البنسمع بيهو ده 


* إذا كان الكلام من فضة فالسكوت من ذهب : شعار (نوام الشعب) فى البرلمانات منذ الاستقلال
* عصفور في اليد خير من عشرة على الشجرة : أعتقد أن المسألة تعتمد على نوع (الشجرة) .


* لا يلدغ المؤمن من جحر مرتين : إن لم يكن داخل (الجحر) شرطى مرور.


* الصديق وقت الضيق: الأيام دي الصديق ذاااتو متضايق. 


* ليس في مقدور المرء أن يخدم سيدين : بالعربي كده ما ممكن الزول يكون مع السيدين ويكون (أنصاري) و (ختمي) في آن واحد (لكن في ناس بيعملوها) .


* من كثر كلامه قل فعله : المثل ده بالذات (قطعوهو) في المسؤولين. 


* لا تضع كل البيض في سلة واحدة : هو البيض وينو؟ الطبق بقى بالشيء الفلاني.


* من كان بيته من زجاج لا يرشق الناس بالحجارة : لو القزاز (مظلل) ممكن 


* ما خاب من استشار: مثل ما (شغال معانا) بدليل إنوعندنا 77 مستشاراً.


* الوقاية خير من العلاج : طيب لمن الاتنين يكونوا مافيشين؟


* لا تبدل القادة في منتصف المعركة : يعنى أبدلهم بعد المعركة ما تخلص؟


* كل لتعيش ولا تعش لتأكل : جيبوا الأكل فى الأول وبعدين نتفاهم.


* الصانع الرديء يلقي اللوم على أدواته : وناس الموية يلقون اللوم كل عام على (الطمي)


*لمن تشكو إذا كان خصمك القاضي!؟ : الأمم المتحدة طبعن!


* من تأنى نال ما تمنى : ما طواااالي.


كسرة :
كان عشقتا أعشق قمر .. وأكان سرقتا أسرق جمل ? وخلوها مستورة وكده !!

تنبيه :
يوجد (واو) جديد !

? كسرة ثابتة (قديمة(
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
? كسرة ثابتة (جديدة) :

أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

تعليق واحد

  1. يا جبرا بصراحه كده (غلبك التسويه او بالأحرى غلبك التكتبو او بالأحرى أكتر كيسك بقى فاضى!!) الحكايه شنو؟!! انا في رآى خدلك إسنكر !!.

  2. يا جبرا بصراحه كده (غلبك التسويه او بالأحرى غلبك التكتبو او بالأحرى أكتر كيسك بقى فاضى!!) الحكايه شنو؟!! انا في رآى خدلك إسنكر !!.

  3. يا جبرا أعمل نايم أوألبد (أخد ليك إجازة صغيرة )لأنو الجماعة ديل عامليين أضان الحامل طرشاء

  4. اللمبى قال فى اخر مؤتمر صحفى ليهو العندو دليل يجيبوا ونحنا ما بنجامل احد بس هو نسى موضوع جامعة الرباط ومبناهو الانهار وكدة يا جبرا ما تخليها مستورة

  5. حرامي بلا بَيِّنةٍ شريف : بعد ما نجيب البينة برضو شريف.

    بعد تجيب البينة بتحلل والموضوع يروح شمار في مرقة

  6. قالوا اسكتو
    قلنا السكات غلبنا
    قالوا امشوا
    قمنا قعدنا
    قالوا دقوا راسكم بالحيطه
    شلنا الحيطه دقينا بيها راسنا

  7. ( عصفور في اليد خير من عشرة على الشجرة : أعتقد أن المسألة تعتمد على نوع (الشجرة)) —لكن الشجره اللى انا شايفو شجرة الزقوم اخير!!

  8. يا فيها يا نطفيها: دا المؤتمر الوطني
    تلتو ولا كتلتو: الاتحادي الديمقراطي (الاصل)
    من خلى عادتو قلت سعادتو: والي الخرطوم
    ريسين في مركب بتغرق: دا لو في ريس (حايمة ساااااكت)

  9. كان عشقتا أعشق قمر .. وأكان سرقتا أسرق جمل

    في الحقيقة دي اهم حاجة ملتزمين بيها الجماعة..

  10. دي فضفضة عشان ما تطرشق ونحن نطرشق ولاكين مافي زول من الجماعة ديل بيقرا ولا بيسمع عاملين اضان الحامل طرشا
    الدراهم مراهم تجبر العظم الكسير يا جبرة

  11. لا يبدغ المؤمن من جحر مرتين …. حديث رواه البخاري في الادب المفرد
    ما يناسب تستخدم احاديث الرسول صلى الله عليه وسلم في سخرية
    استغفر الله و اكتفي بالامثال فرسول الله لا ينطق عن الهوى

  12. الكديس مالحق اللحمه المعلقه في المشلعيب
    قال ،،،عفففففففففففففففنه هي وينه اللحمه البعلقوها .

  13. دي فضفضة عشان ما تطرشق ونحن نطرشق ولاكين مافي زول من الجماعة ديل بيقرا ولا بيسمع عاملين اضان الحامل طرشا
    الدراهم مراهم تجبر العظم الكسير يا جبرة

  14. لا يبدغ المؤمن من جحر مرتين …. حديث رواه البخاري في الادب المفرد
    ما يناسب تستخدم احاديث الرسول صلى الله عليه وسلم في سخرية
    استغفر الله و اكتفي بالامثال فرسول الله لا ينطق عن الهوى

  15. الكديس مالحق اللحمه المعلقه في المشلعيب
    قال ،،،عفففففففففففففففنه هي وينه اللحمه البعلقوها .

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..