جواب لي الشهداء الكرام من ناس البلد

مليون سلام .. يا ناس تمام .. يا عز البلد
مليون سلام .. يا شهداء يا كرام .. يا أجدع ناس في البلد …
سنتين تمام من يوم الرحيل وفراقكم أرض البلد …
سنتين تمام ولسع الجدل ،
عربات بدون نمر
وما عارفين مين الكتل !!!
ما بنقبل فيكم أي تعويض ،
وما بننسى دم شهداء البلد …
سنتين تمام ولسع أحوالنا مايلة ..
والأُمات حشاها محروق
والدميعات سايلة في كل البلد …
سنتين تمام ونفس الناس ..
الضربوكم رصاص ..
لسع حاكمين البلد …
يبنوا سد .. ويهدوا كوبري
ويقدوا ألف قد …
سنتين تمام ونفس الفرعون الزمان
زوَّر تاني انتخابات البلد …
سنتين تمام ونفس الحرامية الزمان
النهبوا خيرات البلد …
سنتين تمام وكل يوم عربات جديدة .. و زيادات جديدة ..
هدت حيل البلد …
لسع يغيروا عرباتهم كل يوم وبرضو راكبين
فوق رقاب أهل البلد …
الخرطوم غرقانة وعطشانة ..
ووسخانة وسجمانة ..
وواليها الليمبي ..
وبرضو لسع عاصمة البلد …
الحروب ياها ذاتها شغالة لي الليلة
في كل جيهة من جيهات البلد …
دار فور موت شديد ..
وكلام أكيد ..
حا تطلع قريب وتغادر خريطة البلد …
جنوب كردفان لسع كاودا صامدة ،
وحلفت يمين ما يصلي فيها فرعون البلد …
حلايب وشلاتين ..
مشت للمصريين ..
والفشقة شالتها الحبشة
واتقطَّعت أوصال البلد …
مشروع الجزيرة ..
الكان جبيرة ..
صبح عضيرة ..
لا مدير لا غفير لا مفتش لا صمد …
البترول نضب ..
واليومين دي غاشننا بي شوية دهب ..
وبي الزئبق والسانايد قارضين أهل البلد …
من كم شهر ..
الجماعة من دبي لي قطر ..
شحدة شديدة في كل الخليج
وكل يوم كاشفين حال البلد …
والدولة بقت تبيع المخدرات ،
تضرب عصفورين بي حجر ،
تظبِّط الميزانية وتدمِّر شباب البلد …
الجامعات السواطير شغالة يومي ،
والسيخ في أركان النقاش
زي ما السلاح مالي أركان البلد …
المستشفيات اتفرتقت ، والدكاترة هاجروا وسابوا البلد …
وكل زول شايل جوازه كايس تأشيرة يتخارج بيها من البلد …
الناس ضاقت خلاص ..
أكلت حمير وفطايس جوة عاصمة البلد …
السرطانات ، وفشل الكلي ، والإسهالات
والتهابات الكبد ملت البلد …
الدواء فاسد ، والأكل فاسد ، والشراب فاسد والهواء فاسد ..
والفساد في كل زاوية من زوايا البلد …
سنتين تمام ..
نفس اللجام ..
وكل يوم تتصادر صحف و مافي زول يقول بِغمْ لي مك البلد …
سنتين تمام ..
نفس النظام ..
والكضب الحرام ..
وأي زول يرفع عينه يقدوها ليه ..
وأي زول يرفع ايده يكسروها ليه ..
والما عاجبه يسيب البلد …
سنتين تمام ..
ونفس البرلمان ..
الكان زمان .. خادم مطيع لي مك البلد …
تصفيق شديد لي كل زيادة ..
وتفصيل لي قوانين السيادة ..
وما مهم حال البلد …
نفس الجنجويد ..
وحميدتي البليد ..
أصبح عميد !!
وجيشنا جيش الهنا ..
يتفرَّج في حال البلد …
الأمن يا هو ذاته ..
محمد عطا بي سبحته وبي عصاته ..
نفس شغل الجنجويد ..
كل يوم ناهبين البلد …
الفرعون فلت من الجنائية ..
كانت زرَّة ككو دولية ..
فرحت بيها كل البلد …
لكن ليه يوم ..
لما تكتم الخرطوم ..
وترتاح منه البلد …
جونا بي حاجة سمّوها الحوار ..
زي قصة جحا وصاحبه والمسمار ..
وزادوا خازوق جديد لي خوازيق البلد …
وفرعونا قال مافي زول غيره حايكون رئيس الحوار ..
وشوية عليه يكون بس رئيس البلد …
وحارن تمام ..
وحالف طلاق ..
هو سيد الحوار ..
وهو سيد الحمار ..
و مافي تحضير للحوار بره البلد …
ناسي نيفاشا وأبوجا ،
والدوحة وأديس ،
وأوسلو وإنجمينا وأم جرس ..
زي كأنها مدن داخل البلد …
وآخر تقليعة جانا إمام الحرم ..
وسيط بين الرزيقات والمعاليا أولاد الأعم ..
يا ربي يكون الحرم اتنقل كافوري ،
وبقى واحد من مساجد البلد …
الجماهير مشغولة بالكورة ..
وناسية تمام حال البلد …
سنتين تمام ..
ونفس الحنك والكلام ..
منو الزعيم ومنو سيد البلد …
يعني في النهاية نقدر نقول ،
حالنا زي عايرة وأدوها سوط
وباختصار شديد دا تمام حال البلد …
في الختام مليون سلام لي كل شهيد
من ناس البلد …
Mahdi Zain
[email][email protected][/email]