إذا توقف

 إذا توقف العمل بما يعرف بالصراف اللآلي يكون كويس .. (صراف واحد شغال وعشرين ما شغالين )
 إذا توقف الحديث عن وحدة الإسلاميين يكون كويس عشان بيخلي المواطن يشعر إنو البلد دي حقتهم براهم

 إذا توقفت مشاركاتنا الخارجية في كرة القدم ربما نحفظ ماء وجهنا بعد أن اصبحنا ملطشة بين الامم
 إذا توقفت تعيينات الخريجين على (الواسطة) و(حامل هذا الكارت يهمنى أمره) فأعلم أن أمر البلاد لا يهم أحداً
 إذا توقف قضاء المصلحة على الرشوة في دواويننا الحكومية فالإثم (قطع شك) على المرتشي دون الراشي (يعني الناس تعمل شنو؟)
 إذا توقفت نقة (المدام) فأعلم انها تعاني من إلتهاب في الحنجرة
 إذا توقف التنظير والتغير في السلم التعليمي يكون أخير (طلعتو عينو ذاااتا)
 إذا توقف هتاف المشجع السوداني عقب كل مباراة (التحكيم فاشل) فتأكد إنو عندو (وجع حلق)
 إذا توقف تظليل عربات المسؤولين عندها فقط يمكننا رؤيتهم
 إذا توقفت كشات المرور فسوف يستقيل الجنود (تاني ياكلو سمك عند عوضية وين؟)
 إذا توقفت الحركة في الطريق وتكدست العربات على الجانبين وتصبب الناس عرقاً وتأخرو عن أعمالهم فده معناتو إنو في (موكب مسئول) جاي ماري !
 إذا توقفت (علوية باغات) عن الغناء فلن تتأثر خريطة السودان الفنية
 إذا توقف المسئولون عن التصريحات إذن لسلمت مرارتنا من الإنفقاع
 إذاتوقفت تقارير النائب العام عن إيراد الإختلاسات والفساد المالي عندها أعلم أننا قد بدانا في تطبيق الشريعة !
 إذا توقفت عربات حمل النفايات عن العمل فالحكاية واااحدة إذ أنها تنفض (نفاياتها) وهى تسير .. لمن تجي طبعن !
 إذا توقف التنقيب عن الذهب فلن يحدث أي شئ (هو يعني عامل لينا شنو؟)
 إذا توقف الدعاء بهلاك اليهود والأمريكان يكون كويس عشان برضو فيهم ناس كويسين وكده وإحتمال كمان يكون فيهم امريكان مسلمين !
 إذا توقف السؤال عن ملف خط هيثرو العند النائب العام أو لم يتوقف تظل الأوراق (حبيسة الأدراج) لنقدمها يوم الموقف العظيم !
 إذا توقف إستيراد العربات قليلاً فلن تتصاعد أختناقات المرور أكثر مما هي عليه الآن
 إذا توقف ذلك الفنان العجوز عن الغناء (يكون كويس) فحباله الصوتيه قد شارفت على الإنتهاء بعد (الإرتخاء)
 إذا توقفت الجبايات عن الطرق والأسواق فسوف تجد أن اسر كثيرة ما لاقية عيش ?(حرام)
 إذا توقف سعر صرف الدولار عند سعرو الأن (أكون طيرة ومباري السيرة) !
 إذا توقفت عربة لشابه تقف في شارع (عبيد ختم) الساعة عشرة بالليل فده أكيد (ما فضل ظهر) بل فضل حاجات تانية وكده
 إذا توقفت الإعلانات التي تقوم الشركات بصياغتها عبر لهجات مصرية وشامية ومش عارف ايه .. يكون وزير الإعلام شايف شغلو (لكن هو فاضي؟)
 إذا توقفت دعوة بعض القوم إلى الهجرة إلى الله يكون أحسن فالإنسان يجب أن يكون مهاجراً إلى الله على الدوام
 إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
 إذا توقف (الإمام) عن الحديث يكون أحسن لأنو دخل موسوعة (جينيس) للزمن المخصص لمسك العصاية (من النص) !
 إذا لم يتوقف (أبوهاشم) عن الصمت يكون احسن عشان ما معقول الزول يكون ساكت خير .. شر
 إذا توقف المسئولون (قليلا) وتريثوا عن التصريح إبان الفواجع لما دخلت (ماكينات اللحام) و (الجقور) القاموس السياسي .. (هم لاحقين شنو) ما يصبرو لحدت الحاجات تنكشف والناس تعرف الحاصل بالضبط
 إذا توقفت لك (حافلة ركاب) حتى تعبر الطريق يجب مراجعة القوى العقلية للسائق
 إذا توقف ضخ مياه الشرب في المواسير .. أكيد (العلة) تكون في (النيل)
 إذا توقف السودانيون عن أكل (اللحمة) بعد أن وصل كيلو الضان إلى 70 ألف فليهم الف حق !! (يعني الحلة مع بقية المكونات عايزه ليها 100 ألف) !!
كسرة :
 إذا توقف الموظف عن إستخدام (الواتسآب) فتأكد إنو (الشبكة كعبة)
 كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و
 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و
عن هذه الإعلانات

تعليق واحد

  1. اذا توقف الفاتح جبرا عن الكتابة… اكيد يكونو الجماعة عكشوة…ما معروف يمرق تانى متين

  2. يا ستاذانا جبره ما تشوف لينا قصة الطلبه الاردنيين ديل شنو ؟ ما دام الوزيره مشغوله وايدها في الحنه وكرعينا في الدخان (شغل كيزان) !!

  3. استاذنا الفاضل الفاتح امد الله فى عمرك ومتعك بالصحه والعافيه -اذا اذاواذا اذى لو تتكرر الى يوم القيامه لن يتغير شى طالما الجماعه فى اذانهم وقر – مثلا اذا صاحبنا الباع الخط هيثرو وهو معروف وعارف قبض كم وهو متاكد مافى زول حايسالو
    واذا فى زول سالو يكون عائز نصيبه -واذا ناس الاقطان والاوقاف وزعوها بيناتهم صاح ماكان مرقت وسمعنا بيها – واذا كان كل واحد جمع ليه شوية عواطليه وعمليه فرقة نهب سمى نفسه جبهة تحرير السودان قام ادوه وزاره وكم والى وكم معتمد -واذا استمر الحال هكذا لاادرى متى يتصلح بلدنا – واذا استمرت هجرة اهل البلد الى الخارج وزاد عدد القادمين من دول شرق فتاكد بعد كم سنه ما حاتلقى اى مواطن سودانى اصلى ينتمى الى قبيله معروفه فى السودان ولتغيرت اللغه العربيه الى لغات دوا الجوار الى صدرت ومازالت تصدر طالما ان الحدود مفتوحه للجميع

  4. اذا حضر جبرة بخفى حنين من شرطة القسم الاوسط لندن اكيد يكون بلة الغائب شايف شغلوا تمام لانه قال خط هيثرو ده انا مفرمل اوراقه .

  5. والله يا ود جبرا يوجد بعض (بعض إيه ديل بإذن الله كلهم) واقصد المفروض إنهم مسئولين لن يوردوا الجنه ولن يشموا رائحتها وخاصة المسئولين عن المرور في هذا البلد الهامل!!هل رايت او سمعت في حياتك مسئول همه الوحيد من صباحية ربنا حتى المغيب هو فرض الجبايات على المواطنين في مخالفات من وحى خيالهم السقيم تاركا عمله الاساسى وهو تنظيم وتوجيه قادة المركبات ؟!! زياره واحده لقلب الخرطوم عاصمة السودان والتي تقع بين النيلين سوف ترى العجب العجاب وغياب تام لشرطى المرور وخاصة تلك المنطقه التي تفتقة يوما عبقرية احدهم وقرر نقل المواصلات من موقعها القديم بحجة التكدس المرورى وصَعب على المواطنين واضطرهم للتوجه لميدان جاكسون ولما لم تُحل المشكله فإشتغلت العبقريه مره آخرى وأنشاؤا محطه جديده (محطة شرونى)فزادوا المعقد تعقيدا وضاعفوا عذابات المواطنين!! عمرك يا ود جبرا شوفت صاحب سياره عاطل عن العمل تجده يركن سيارته في نصف الطريق(اى والله) ويترجل منها ليجلس على بنبر ليحتسى كوب شاى والما مصدق عليه أن يسجل زياره سريعه للمنطقه الواقعه شرق واحة الخرطوم وشمال شرق برج حراء في الفتره من العاشره صباحا حتى الخامسه مساءا وحوالى فندق اراك والمدهش أن سيارات شرطة المرور تتمون يوميا بالوقود من محطة البنزين الكائنه شمال شرق واحة الخرطوم وطبعا مع مرور الزمن والإغراءات المالية المصاحبه للجبايات فشرطى المرور نسى واجبه الاساسى (متين يتمون ليحصل الكمين الذى سينصبه للفريسه!!)وقطعا فرائسهم لا يجلسون على البنابر ليحتسوا كوب شاى هذا فضلا عن كونهم عطالى لاشغل ولا مشغله!!.

  6. إذا توقف الدعاء بهلاك اليهود والأمريكان يكون كويس عشان برضو فيهم ناس كويسين وكده وإحتمال كمان يكون فيهم امريكان مسلمين !

    كيف اليهود فيهم مسلمين ؟( اليهودية ديانة أم جنس) ، بسأل عشان أعرف ما نقد للكاتب الكبير الفاتح جبرا ….. لو فى أحد يتكرم بالشرح.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..