صدقنى ديل ..كان باعوا أحجار الحرم ..(قصيدة)

بسم الله الرحمن الرحيم

من وين أتوا ؟ كان السؤال في المبتدا
والحيرة كانت هي الخبر والمنتهى
ما من شبهنا..ولا أكيد من دمنا
لا يومنا هم..لا بكره ..لا هم أمسَنا
يا ربي من دهب المعز..
كاسوا الدريبات للغنى ؟
لموا العيونهم بي صفاره بيجهرا؟
من سيفه كان سفك الدما؟
من كل تاريخ الخيانات القبيل..
والخزي والعار والخنا…
شايلين في أحشاهم جنا؟
هل هم مغول العصر ..أحفاد التتار..؟
هولاكو كان شافم تأفف من فعايل منتنة ؟
إبليس تعوذ لو سمع بي سيرتم..
هجر البلد ..ساب اللعب ..للعلموه الشيطنة
أم في الحكاية ..جذور قريبة ..
من الطفولة المزرية ؟
في خاطرم جمعاَ..حكاية قديمة من..
موز القرود..لحم الأسود..
بتزن في إضنيهم على طول السنه؟
بس في المحافل..بي تواضع..يرقصوا..
ويدوبوا زي ناساً بساط..
ويعودوا للقصر المنيف بالفارهات..
والعلاج والنزهة دولاراتا في الخارج..
تسوي الزغللة ؟
من كل شي لله سريعاً حولوا ..
لي كل شي للبيع وهاك يا سمسره
في الواجهات بالدولة هم البائعين..
باللفه هم المشترين..
لا خلوا ساحات في المدينة ولا خلا
ومضاربات.. في كل شي..في واطه أو..
في العملة بتزيد الغلا
وعشان قريشات السدود..
آثارنا باتت في الخطر ..ومهددة
والحسرة في الآخر كمان..
جامعة بلدنا مقنطره
يا أمة عيب ..تاريخ تليد
وإسم كبير ..يتباع وتبقى المهزلة ؟
وقال شنو ؟ قانون بيمنع بيعه شان..
من قام هو فات مية سنة
ياخ اختشي..دستور بيتعدل في يوم..
قانون يروح في ساعة والموضوع قضى
يا غافلاً..يا مصدقاً ..خليك حصيف
ديل لو تمكنوا في الحجاز..
كان باعوا أحجار الحرم
كان الحمام في عشه بسكن بالإيجار
حاذر تفوت على فطنتك ..
وتكون شريك في المهزلة
وتكون جريمة منظمة
وتكون فضيحة مجلجلة
ويكون خبر كالزلزلة

معمر حسن محمد نور
12/أبريل 2016
[email][email protected][/email]