وزير الماليه …هذا الرجل ماطبيعي أفقدوه قبل فوات الأوان

وزير الماليه مخاطبا الإحتفال بتدشين مشاريع البحوث العلميه الفائزه بالتمويل بوزارة التعليم ويطالب بمزيد من الصبر ومنتقدا هجرة بعض السودانيين إلى الخارج !!!! وطالب العلماء لتحريك البحوث لمشروعات التنميه لأنه خصص 200 مليون جنيه كاملة لهذا الغرض .. الرجل ده أكيد غير طبيعي أفقدوه . 200 مليون جنيه بالقديم ولا بالجديد ؟ أم بالدولار علي العموم لو كانت عملة مجرة درب التبانة وهذه المجرة عزيزي القاري في جيلوجي تابع للمؤتمر الوطني إكتشف إن السودان به معادن أكثر من معادن هذه المجرة.. وهذا الجيلوجي نموذج من مخرجات ثورة التعليم على العموم عملت هذا المجرة لن تنقذ التعليم في السودان بعد أن دمرتم بنيته التحتيه
والذي يدعو للإستغراب والضحك هو إنتقد الهجرة لبعض الدول يعني عاوزني السيد وزير الماليه أن أترك الراتب الممتاز والعلاج المجاني في أحسن المستشفيات والتعليم العالمي المتطور للأولاد وعربيه بكل خدماتها وبدل سكن بعد أدفع أوفر منه وأرسل مصاريف لأهلي ومويه نظيفه وكهرباء 24 ساعة , ولا بجي الخريف واللواري تقيف .. أترك كل هذا وأجي عشان أموت قهر من الذي أراه وأسمع به ؟
أرى وأسمع الظلم وعدم العدالة وأرى الدمار أمام عيوني وأشخاص لا يستحقون وظائف ومنحوا شهادات عليا لكي يعتلون أهم الوظائف؟ … أجي عشان أشوف دمار الخدمة المدنية التي ورثناها من الإنجليز كأفضل خدمة مدنيه في الشرق الأوسط وذلك بسبب سياسة التمكين …..وأرى مشروع الجزيرة كل يوم أمام ناظري صحراء قاحلة ؟ ويستقبل والى الجزيره الهمام الذي لم نر منه شئ بخصوص أعظم مشروع يستقبل بالدفوف والأهازيج في حين هرب في لحظة السيول والفيضانات يستجم في شرم الشيخ ؟ الزول ده مانصيح …..أجي لكي أرى عاصمة في القرن 21 ليس بها شبكة صرف صحي وشبكة تصريف مياه للأمطار والسيول ؟….عشان أسمع كل يوم بحوادث الطرق والموت يحصد السودانيين بأسباب عدة مرة بسبب الطرق التي تفتقر لأبسط وسائل الأمان بسبب فساد صاحب إنشائها لأن المقاولون وأصحاب الشركات هم أعضاء المؤتمر الوطني وتحصلوا على المناقصة بدون منافسة أو بسبب قطع الغيار السيارات التي سمح لها معدومي الضمير فسحها ودخولها بالرغم من عدم مطابقتها المواصفات ؟ … لكي أرى كل يوم المستشفيات الحكوميه عبارة عن مقبرة الداخل فيها مفقود ولو كتب له الخروج سيكون بعاهة دائمه أو مشلول تارة لعدم وجود الكادر الطبي المؤهل لهجرته وتحسين وضعه ووضع أسرته وتارة لعدم وجود البئية الصالحة للعلاج ؟ … الزول ده مانصيح أحسن تفقدوه أجي عشان أشوف شباب شارع الحوادث هم من يتولون مهمة الدوله في علاج الغلابة والتعابه وبناء عنابر وحضانات للأطفال بينما أبناء الحكومة يتعالجون في خارج الحدود وفي مستشفيات عالميه ؟ … أجي عشان أسمع بأنه في طفلة ماتت بلدغة عقرب ولم يتوفر المصل في المستشفيات ؟… الزول ده أحسن تفقدوه لأنه مانصيح أجي عشان أسمع بأنه في أستاذ أغتصب تلميذته ذات الثمانية أعوام مثل هذه الأحداث لم نسمع بها من قبل وهذا ناتج ثورة تعليمكم التي خرجت مثل هؤلاء فهذا حصادكم اقطفوا ما زرعتم … عشان أسمع بشاب خريج عاطل عن العمل أنتظر التوظيف سنيين فتعاطى وأدمن المخدرات إغتصب طفلة ذات 6 أعوام بل لم يكتفي قتلها ورماها في البئر وهذه مخرجات ثورة تعليمكم التي تشدقتم بها ربع قرن من الزمان ؟ …. عشان أقرأ خبر عن وزير الصحة في العاصمة فقط 23% من الطلاب يعانون من أمراض نفسيه ( حتى الشفع الصغار جننتوهم ) ….أجي عشان كل يوم نقرأ خبر عن حاويات مجهولة الهويه بها كميه من المخدرات تكفي الشرق الأوسط ؟ وحاويات مجهولة المصدر فيها كيماويات وداخل العاصمة عاوزين تدفنوها وفي النهاية تقولوا فيها مواد بناء بس ؟ … الزول ده مانصيح وما طبيعي أجي عشان أشوف جامعة الخرطوم تتباع بدلا من تطويرها وتحسين بئيتها التعليميه ؟ ومن المشتري رجل كان في الماضي حتى سنة 1989 رائد في الجيش والآن يمتلك أكثر من 30% من اسهم بنك الخرطوم ومصنعا للحديد وهذا نموذج لفساد المؤتمر .. دايرني أجي عشان كل يوم أقرأ الفاتح جبره يسأل عن خط هيثرو وله سنيين بالواواوت لحدي ما وصلت 180 واو ولا من مجيب ومن باعه الآن حرا طليقا من أكبر المستثمرين في ماليزيا ؟ … الوزير ده أفقدوه شوفوه مالو لي قال كده أجي عشان أسمع معتمد العاصمة يصرح وبدون حياء يقول جمع النفايات إستعصى عليه فأصبحت العاصمه مرتعا للذباب والناموس ؟ … عشان أقرأ خبر عن إكتشاف معتمد الخرطوم بأن شخص واحد إسمه اليسع يمتلك 1000 دكان وماتت القضية على كده ؟…. الوزير ده إمكن في موجة الجنون الضاربه البلد إمكن مخه إتلحس …. أجي عشان أحضر محاكمة شيوخ تحسبهم وكلاء الله في الأرض سرقوا شركة الأقطان بملايين الدولارات إكتفى القضاء الحكم عليهم فقط بغرامة 100 مليون جنيه وبعدها إفراج ؟ … أجي عشان أشوف وأسمع عن قانون إسمه التحلل ؟ الزول ده شوفوه مالو سببه شنو ليه قال كده ؟ أجي عشان نشوف ونقرأ عن ميزانية التعليم إنها تساوي 1% فقط من ميزانية الدفاع والأمن ؟…. نجي عشان نشوف وزير ماليه في عهده إرتفع الدولار لأعلى مستوى له في تاريخ السودان بالرغم من ذلك يكرم ويمنح شهادة الدكتوره هذا بدلا من إقالته والتحقيق معه ؟ …..أجي عشان لمن نسأل عن أكتر من 50 مليار دولار دخلت خزينة الدوله أين ذهبت هذا دخل البترول ولا أحد يعلم أين ذهبت ؟ وكل المشاريع طلعت قروض وودائع ؟ عشان كلو ده أنا بقول وزير الماليه ده ماطبيعي … حسبنا الله ونعم الوكيل

[email][email protected][/email]