أمي الوطن ..

مشغول بفكر في عينيك ..
ملهوف وبتخيل وشيك ..
وكل الجمال بلقاهو فيك ..
وياريتني مطلوق السراح ..
وبقولها ليك بي كل صراح..
عصفوري مكسور الجناح ..
بين العواصف والرياح ..
ونار ..المواجع والجراح ..
وشوق العيون ..الما ..استراح ..
ومنك العفو والسماح ..
ويا ريتني أرتاد البراح ..
زي النسيم أسرح .. أجيك ..
***
يا يمة شان الثم ايديك ..
وباقي العمر اهديه ليك ..
عيدية .. إلا قليل عليك ..
وياريت تعود أيامنا ديك ..
فرحان أطير .. اتهنى بيك ..
أرجع كما الطير الصغير ..
وأنوم قرير ..أحلم كتير ..
يا أمي في الحضن الحرير ..
العب علي طرف الفريق ..
الناس أهل و الكل رفيق ..
لا فينا هم ..لابينا ضيق ..
والليلة شوفي شقاء الحريق ..
في سكة ما بتعرف صديق ..
ولابتلقى ..في همك شريك ..
***
ياروحي كيف أصبح لديك ..
القى الأمان ..وإنتي الوطن ..
فيهو الفصيح .. وِمنو الرطن ..
ايديكي أبداً ما سطن ..
في خسة .. ما اتورطن ..
وللخير دوام يتوسطن ..
وعند السلام يتبسطن ..
طيبتك صفاء و غيمة وفاء ..
وجملة خصال مـتآلفه ..
ونفسك دوام متعففة ..
عفوية .. ما متكلفة ..
والحكمة من فاهك شفاء..
دربك عديل ..وللضيف دليل ..
كرمك نهار .. وللغمدة ليل ..
رزينة من معدن أصيل ..
باعك طويل وكأنه نيل ..
وعز الدهور .. قال مصطفيك ..
***
وانا أصلي راضع من ثديك ..
زلال صفاك وحليب وفاك ..
وذروة طموحي أعيش معاك ..
باقي العمير ..جنبك هناك ..
تسقيني من أنفاس رضاك ..
فرحي من بسمة ضياك ..
سعادتي في سجدة مساك ..
وكيف الصبُر وانا روحي فيك ..
***
دولة الإمارات العربة المتحدة / العين
الثلاثاء ..
11 ذو الحجة 1437
الموافق
13 دسمبر 2016
[email][email protected][/email]