غضب كبير على القلعة وانصاف مدني…بودي قارد الفنانين…ممنوع الاقتراب و(التسبيل)..!!!
فلاشات : نهاد أحمد
اطلت بالساحة الفنية خلال الايام الماضية ظاهرة جديدة ودخيلة على الوسط الفني وهى ظاهرة (البودي قاردية) حول الفنانين، والى وقت قريب في السودان لم يعرف (البودي قاردات ) الا لحماية السياسيين من الوزراء والرؤساء لكن ان يتم الاستعانة بهم لحماية الفنانين فهذا أمر جديد شاهدناه عند النجوم العرب والغربيين فقط ، كما لوحظ ايضاً ان الحفلات التي تقام ببعض الدول العربية من قبل الجاليات السودانية هناك، انتشرت فيها مثل تلك الظاهرة.. وآخرها حفل انصاف مدني والذى تم بثه عبر قناة النيل الازرق مؤخراً، حيث لوحظ ان (البودجاردات ) يلتفون حول انصاف اثناء نزولها الى الجمهور، الامر الذى استنكره الكثير حول لماذا ومن الذي يحاول الاقتراب منهم فالكل اما يكون مستمعاً لما يتردد من اغنيات او يتمايل طرباً معها ، وجاءت الفنانة ندى القلعة لتجهز على ماتبقى من ضبابية توفر لتلك الظاهرة حيث حفلت الصحف بأخبار متعددة عن غضب جمهورها منها بسبب مرافقة بودي قاردية لها في حفلها الاخير في عيد الفطر بصالة سبارك سيتي، تلك الجزئية التى قالت عنها ندى انها غير مسؤولة عنها وان اهل الصالة هم السبب في ذلك.
ظواهر غريبة:
ويعتقد بعض الموسيقيين أن الساحة الفنية مؤخراً بدأت تظهر فيها الكثير من الظواهر الغريبة، منها ظاهرة الاعتداء على المطربين لاسباب مختلفة، من مسبباتها اقتحام بعض المعجبين للمسرح ومداهمة الفنان اثناء تأديته وصلته الغنائية، كما ظهرت كذلك ظاهرة تخريب المسارح من بعض المشاغبين، والتى تناولتها الصحف بصورة متكررة، بالاضافة لعوامل اخرى ربما استدعت بالبعض للاستعانة ببودي قارد.
حماية للفنان:
الموسيقار انس العاقب قال لـ(فلاشات) ان الفنانين في جميع انحاء العالم لديهم مايعرف بالبودي قارد، وذلك لحمايتهم من الجمهور ، وقال العاقب ان السودانيين ليس لديهم ثقافة الاستماع الى الفنان من مقاعدهم ?يعني الواحد لازم يطلع المسرح ويبشر للفنان- بعكس اوروبا فهناك الجمهور يردد مع الفنان فقط ولايحاول ان يصعد الى المسرح لكي (يبشر) له ، واشار العاقب الى انه خلال الايام الماضية قرأ في احدى الصحف خبر تعرض احد الفنانين وعازفيه لمشاجرة عنيفه وقال ان هذه احد الاسباب التى تجعل الفنانين يحتمون بـ(حرس) لحمايتهم مما قد يتعرضون له اثناء الحفلات.
حفلات اعراس:
الفنان احمد البنا بسؤاله عن الاستعانة بالبودي قارادات قال: في الحفلات العادية وهى حفلات (الاعراس ) والمناسبات لا استعين بهم ، وذلك لان الاسر تكون موجوده والجمهور لايستطيع ان يبدر منه تصرف غير لائق ، اما في الحفلات الجامعية وحفلات التخاريج او اي حفل خاص استعين بالحرس لان الحفلة الجامعية تجد الجمهور كثيفاً جداً واحياناً تجد ان الحاسدين او البكرهوك ممكن (يندسوا) وسطهم، او ممكن تلقى (هاوين الشغب) لذلك احرص على ان يكون الحرس معي في تلك الحفلات.
عادة دخيلة:
من جانبها ترى الفنانة سمية حسن ان هذه العادة عادة دخيلة علينا مشيرة الى ان الشعب السوداني شعب متسامح ومسالم وصاحب قيم ومبادئ وقالت ان المجتمع السوداني يحب و يقدر الفنان فإذا حدثت مشاجرة اثناء الحفل يهب الجمهور لفضها، ويسعى لسلامة ولتأمين حياة الفنان ففي وجهة نظري الشخصية ان ظاهرة حرس الفنانين او مايعرف (بالبودي قارد ) ظاهرة دخيلة علينا ليس الا.
السوداني
هما زاتو الجمهور من الرجال… بقعد يحضر حفلات غناء البنات ليه… والبقعدكم تحضروها شنو!! بس ولا شلاقة وعدم موضوع..وفراغ وعدم تمييز…. تحضروا في غناء البنات مع بنياتكم الصغار… وقت عايز يستمع غنى ما شايف محمد الأمين ولا حمد الريح أو صلاح مصطفى [الغناء الحديث] ولو دايرين غناء الحماسة عندكم غناء قيميم وخلف الله وبادي محمد الطيب.. وغناء العرضة على قفى ما يشيل… أي واحد من الفنانيين الكبار.. الغريب أنو نحن بنلوم الفنانيين والفنانات الهابطين لكن نحنا من ساهمنا في ترسيخ هذه الظاهرة.. تسوي بودي قارد تسوي أي حاجة.. أنا شخصياً لا اعرف انتصار مدني دي لكن هي نفسها مقتنعة أنهاما عندها صوت لكن عندها مؤهلات تانية خايفة عليها من عين وحسد الجهور الرجال…
الواحد يتحكر ولابس عمتو والشال والجلابية البيضاء المكوية.. ويحضر في شاكلة كنتك لي وعاين لي.. وقلتو ليهو افتح لي الباب… وما فتح لي الباب…
وسيد الكارو تعال بلباسك أبوي بلابسك.. بالله دا كلام دا.. اسه دي دايرة ليها عمة وشال ودايرة زول يقطع ليها تذكرة ويتحكر في كرسيهو عشان يسمع…
وايضا: يا يمة قلبي وجعني وكرعيني ما شيلني… بالله اسه دنا غناء زول يلبس ليه جلابية وشال وعمة ومركوب.. ويقطع ليهو تذكرة ويقول اليوم أنا حضرت لي حفلة وسهرة جميلة… طيب انتصار مدني ما تسوي بودي قادر لو سوته…
بالله اسه لو جبتو محمد ا لأمين دا… وغنى ليكم أغنية زاد الشجون الطويلة والرائعة دي بس … براها ما سهرة ممكن تستمعتوه.
كل زول ينوم على الجيهه البتريحو الحسادة فى شنو
طيب البودي قارد دة بحمي الفنانة او الفنان من الاذي اها بعدين في القبر البحميهم منو ؟ يا جماعة انا ما كوز اعرضو لي التعليق — ومسالة الدين عند الكيزان هي شعارات ليس الا ولا يطبقون ربع ما يقولون انا بس عندي نصيحة لي اخواتنا الفنانات لو سلمنا بان الغناء حلال اقول لوسلمنا لان الايات والاحاديث كثيرة في هذا الشان وقضت رغما عن محبي الغناء بحرمته وحرمة الموسيقي نصيحتي للفنانات وكل يوم طالعة واحدة جديدة اذا كان الغناء حلال هل صياح المراة في وسط جمهور غفير وان تصدح في سماعات كبيرة حلال ؟ والاية امرت النساء بغض اصواتهن لان صوت المراة عورة وامرتها بالاحتشام والله عندما تسمع وتري فنانة وهي تصيح باعلي صوتها وتغمز لهذا وتسبل لذاك تشفق عليها من آخرتها الله يرحمنا جميعا لسنا رسلا ولا اولياء ولكن الدين النصيحة وسؤال طالما تبادر لذهني ( هل لوماتت فنانة ودفنت ثم ماتت انسانة اخري صالحة ودفنت بجانبها وجاورتها في قبرها هل يكون الحال في القبرين سيان ؟؟؟؟ سؤال اجيبو عليه بالله عليكم حمي الله عروضنا وعروض المسلمين جميعا وغفر لنا ولهم .
يا مدعي الفن أنتو لو الجمهور كارهكم لغاية ما تخافوا منو ما تشوفوا ليكم حاجة تانية غير الغناء
((الموسيقار انس العاقب قال لـ(فلاشات) ان الفنانين في جميع انحاء العالم لديهم مايعرف بالبودي قارد، وذلك لحمايتهم من الجمهور ، وقال العاقب ان السودانيين ليس لديهم ثقافة الاستماع الى الفنان من مقاعدهم ?يعني الواحد لازم يطلع المسرح ويبشر للفنان- بعكس اوروبا فهناك الجمهور يردد مع الفنان فقط ولايحاول ان يصعد الى المسرح لكي (يبشر) له ، واشار العاقب الى انه خلال الايام الماضية قرأ في احدى الصحف خبر تعرض احد الفنانين وعازفيه لمشاجرة عنيفه وقال ان هذه احد الاسباب التى تجعل الفنانين يحتمون بـ(حرس) لحمايتهم مما قد يتعرضون له اثناء الحفلات.))
دة العذر الأقبح من الذنب يا استاذ انس،
يعني علملتنا اننا شعب همجي . و زي ما بقول المثل النسى عادو قلت سعادتو . هذه موروثاتنا الفنية و يا ها عاداتنا . اما عن ناس بارة المعجب بهم ديل حالهم افظع حال . ديل الواحد تلقاهو ناصب لخيمة عشان يكون من اول الواقفين قرب الفنان في الحفلات .
ما تعملوا هولة لروحكم أنتو ما أحسن من ود الأمين و وردي و ابو عركي.
يا امة ضحكت من جهلها الامم.
(الفنان احمد البنا بسؤاله عن الاستعانة بالبودي قارادات )!!!!!!!!!!!!!!
حسبنا الله ونعم الوكيل .. الله يرحمك ياوري ويرحمك يا عثمان حسين ويرحمك ياالجايري ويا صالح الضي ويا هاشم ميرغني ويا أبو داؤود ويا زيدان.. الحمد لله الذي لا يحمد على مكروه سواه وولا حول ولا قوة إلا بالله .
فعلا هي عاد دخيلة ولا تناسبنا ولا نحن نناسبها ،، لان البودي قارد بكون للناس الناعميين والجميليين فما بالك بهؤلاء ،،، والذين لديهم نقص في ما يقدمونه ويحبون لفت الانظار اليهم بتكملته بالبودي قارد ، لاننا بصراحه كشعب نتشبث وننطلق بالاشياء السالبة والساقطة
يعني لما ندي القعلة وانصاف مدني وطه سليمان وغيرهم يعملوا بودي قارد
طيب الفنانين الكبار زي المرحوم محمد وردي ومحمد الامين وأبو عركي البخيت وغيرهم يعملوا شنو
وبعدين الفنان الذي يذهب معه البودي قارد فنان اجوف ،، لان ما يقدمه غير جيد ، يثير للنعرات والجلد والحماس ومفاتن الجسم وعورات الانسان ،،، وهذا الحضيض مشترك فيه الكثير من شعب بلادي
لان هناك على ما اظن ثقافة سائدة ،،، تجد الفنانة تكتب القصيدة وتلحنها وتغنيها وأيضا الفنانين ،،،وهناك شعراء بشك بشك وموسيقين لا حولا لهم ولا قوة ، وانا لا اعرف الخريجيين الذين يتخرجوا من كلية الموسيقا اين هم ،،، وما هو دورهم في المجتمع ،، اين اضافاتهم وبصماتهم
واصبح الغناء في السودان غناء الهزازات والمتبرجات والمتلمعات وكله من شعبي المغلوب الذي لا يعرف ماذا يعمل وأين هو يقف من الثقافة الغنائية
والله المستعان ،/، وسوف يأتي يوم تركهم قريبا بمشيئة الله لانهم غير جديرين بالاهتمام ولا باستمرايتهم
انس العاقب فى كل شئ اشتر
ياجماعة انا ماعارف المشكلة شنو يعني فنانا اجيب حارس شخصي خصوصا في السودان انا افضل اكون مع الفنان حارس لان ماعندنا نظام في الحفلاات والمنااسبات تاني حاجة البدفع راتبو الفنان الناس خسرانا حاجة؟؟؟ حسد بس!!
الكلام المسكوت عنه هو تنامي ظاهرة الهوس الديني ولماذا ينتظر الفنان حتى يسبب له اخر متشدد عاهة مستديمه………………
عدم الوثوق في الشرطه وبانها اصبحت يد للسلطه وليس يد لاستدباب الامن ………..
هنالك معجبين يجتازون الخطوط الحمراء………..
المجتمع السوداني تغير وهو تغيير حتمي وان التغير شمل كل مناحي الحياة وسلوكيات المجتمع….
نحن مجموعة من الشباب بصدد تكوين مجموعة مناهضة للبودي قارد اسمها انتي بودي قارد مكونة من عتاولة الشباب سنقوم بضرب البودي قارد والفنان البجيب البودي قارد والقوي ياكل الضعيف ومن الآن وصاعدا شوفو ليكم شغلة غير الغنا يا بتاعين البودي قارد
…البودى جارد الوحيد للفنان ,هو احترامه لفنه واحترامه لمعجبيه , وتقدير جمهوره له..غير ذلك لاشئ يذكر..!
ياخوانا افراح ما دايره ليها بودى قارد انا متطوع ومجانا
البودي قارد هو علامة للنقصان للفشل للسقوط عرفنا البنات الرجال البودي قارد ليهم شنو الديك يقاتل في سبيل دجاجاتة
رحمكم الله ووالدي يا خلف حمد ويامحمد احمد عوض وغيرهم من عماقة الحقيبة وابوداود حسن عطية وردي زيدان الفلاتية بت الخير فاطمه الحاج العاقب محمد حسن الجابري وعيييييك *** اخر زمن
البلاوي كله جايبها الود طه سليمان لبس كيف وغناء كيف وفي الاخر مشطه كيف وبودي قارديات في حفله في الامارات.
اذا كان الرجال جايبين بودي قاردات البنات ليه ما يجيبو
الفنانات ديل بتاعين غنه ساي المفروض يكون عندهم مستشار ثقافي يثقفهم وينور ليهم هو الجمهور المعجب بغناء الفنانه ده في حد ذاته ما بودي قادر ولا العازفين اللرقبتهم زي رقبة التور ديل ما كفايه .
اذا جابت ليها بودري قارديات للفنانات دي دليل على خراب البلد وانها بقت ما امنه خالص .
حريقه في الانقاذ وفي الصادق المهدي الجاب الانقاذ وفي الاحذاب ذات الافق الضيق سبب بلاوي السودان
المضحك و المبكي ان تستعين انصاف مدني ببودي قارد … والله انصاف مدني دي
ملامحا اكثر رجولية من البودي جارد بتاعا مرا طول بعرض لو ادت زول بنية الله قال بي قولو
دي ممكن عادي تشارك في المصارعة الحرة ( وبتاعة الرجال كمان ) و قطع شك زول
حا يفرزا من كين مافي
انصاف مدني عندها بودي قارد !! امال شاكيرا عندها دبابة ولا شنو
المطلوب مقاطعة اى فنان يجى اويظهر ببودى قارد
الفنانة ندى القلعة (حسب راى كمستمع) ؟ حنجرة صوتيه مكتومة غير طربة لذا دائما تميل الى الكواريك مع ارتفاع صوت الموسيقى لاخفاء هذا العيب الفنى , كما تجدها دائما تضطر لفتح ( الفم لاقصى درجة) لاخراج اكبر قدر كافى من الصوت (خاصة فيما يسمى بالصوله(انفراد اوشبه انفراد بالنغمة الموسيقية او الصوتية للمغنى )وتحاول اثناءها ترقيق الصوت لكن حسب امكانيات الفنانة ندى وما حباها الله من حبال صوتية محدودة
القدرات ,فتخرج انغام صوتها فى تلك الصولات ( صراخ مكتوم لا ينسجم لتطريب اذن المستمع )وهى كثيرا ما تعانى عند اداء تلك الطلعات او الصولات العالية .
اقول رائ هنا كمستمع عام ولا اقلل من شان الفنانة ندى القلعة باعتبارها فنانة ,ولكن اقول قد تكون ندى القلعة فنانة اعظم صوت لمزيعة تلفزيونية وتنجح فى ذلك اكثر (ولها ان تجرب ذلك مع نفسها لاكتشاف امكانياتها الصوتية فى عدة مجالات اخرى).
اما فى راى بمناسبة (البودى قارد) لاغبار فيه اذا كان الفنان فى بداية طريقه الفنى قد اكسبه فجاة جمهور هائل من المعجبين به , وجمهور هائل آخر لا يطيقون سماع صوته سواء من الناحية الفنية التطريبية
اونواحى اخرى مرتبطة بالاعتقادات السياسة او الدينيه و..الخ وكان هذا الفنان يخشى من اعتداء يهدد حياته قد يقع عليه من هؤلاء الذين لا يطيقونه اواصحاب الدوافع السياسية او الدينية و..الخ. وقد يكون هذا الفنان فنان عريق معشوق الجماهير ,فهذا ايضا قدلا يامن كل الظروف المحيطة بسلامته (والمرحوم خوجلى عثمان خير شهيد على ذلك .
ملحوظة اخيرة : بعض مقدمى البرامج الاذاعية او التلفزيونية ومراسلى الاخبار لهم ايضا ملكات صوتيه قدينجحو فى مجالات الغاء( وبصورة عامة يجب على الانسان ان يجتهد ويبحث اولا عن امكانيات نفسه الكامنة
فى داخله ).
واخيرا (برغم الجو الماطر والاعصار,كما قال الشاعر نزار قبانى)ظل معشوق الجماهير فقيد الوطن الاستاذ محمد وردى واستاذنا محمد الأمين وغيرهم كثر بلا (بودى قارد) مختلطين بعشاقهم من المعجبين وكذلك المشنفين المرتبطين بالاعتقادات الدينية و السياسية بدون تكلف .
ياخ اليعملوا يودى جارد نحن دخلنا شنو مالو وظايف وأكل عيش للعتاولة ديل بدل ما يلموا فيك فى زقاق ضيق و يكسروك خليهم يسترزقوا
ياجماعة يطلوا الكلام الفارغ والساذج وأنحنا شعب راقي ومتسامح ومهذب وخلافة . النظام شئ مطلوب وضروري حتي نحفظ لكل واحد حقه في كل المجالات وليس مجال الغناء فقط . فهناك السكاري والمشاغبين والمتفلتين والحاسدين والمغبونين والحاقدين والمأجورين والغير مربين في كل مجتمع والذين في قلوبهم مرض ونحن جزء من تلك المجتمعات فلابد من وجود أفراد الحراسة في كل النشاطات حتي نضمن أن تلك النشاطات تؤدي دورها دون اي تشويش أو إخلال سواء كانت حفلات مختلفة أو ندوات أدبية أو سياسية أو علمية الي آخر ما هناك وهو نوع من تنظيم المجتمع وغرس مبادئ النظام فيه ونبذ للغوغائية والعشوائية المتخلفة!!!!!!!أيه رأيكم دام فضلكم ؟؟
غضب كبير , في حبلون موشربك, و شريتنو لاسك , ههههههههاي دايرين البقر فيه لبن كتير
والله عجائيب أهل الغناء الأصيل وهم أصحاب الأغانى المردده لا يملكون بودى قارد يجو ناس إنصاف مدنى يعلموا بودى قارد عجبى ( على شنو؟
أحمد البنا ده منو ؟؟؟؟؟