ثورة وعي

ثورة وعي

وعي الناس اتشكل بذرة
و غُبن الناس اتحول فكرة
لا للظالم لا للفجرة
يسقط يسقط حكم الكَفَرةَ
وعينا راسخ بي إيمانا
شيب و شباب قائدين الثورة
دكاترة صيادلة قيادة شريفة
و كل من ماسك لهب الجمرة
أكد انه سكاتنا مهازل
و قرر يضرب في بوم بكرة
فعل بسيط لشعب مقاوم
فيهو رسالة عنيدة قوية
نحنا الشعب الصامت قمنا
مافي تراجع عن الثورة

شعب مصادم و تب ما خائف
من الكوز أب ديناً زائف
شعاره عدالة و شعبا واحد
لا للموت للمدني الأعزل
الراونوا رصاص و قذائف
لا للغلا و النهب الدائم
لا خيراتنا حتبقي غنائم
كل الشعب اتلاحم كتلة
و من الموت اصبح ما خائف

جاهو الموت في بالطول و العرض
لا في علاج لا رغيف لا امن
و يدفع تمن الصمت خنوع .
كَسَر حاجز صمتو الطال
و قرر يحطم للأغلال
و َامن انه الشارع فرض .
و أمّن انه الشارع قيمة
إرادة شعبنا حرة قوية
و يملك شعبنا أقوي عزيمة

شعبنا صابر الا مثابر
يرتق صبره تميمة عِز
و مهما طال الظلم عليهو
لدرب خلاصو عارف و خابر
الكيزان فأكرنو ملجم
صمتا دائم و عزما خائر
طلعوا بنات العز للشارع
راس مرفوعة و فكرا فارع
قالن لا للظلم يا جائر
نحنا بنات الشعب مرقنا
لا بنخاف من لهب سياطكم
لا بترهبنا بكاسي الامن
نحنا صنعنا رجال امبارح
و جيل الليلة و احفاد باكر
و قادرين نكنس كل اوساخكم
و نصنع من أزمتنا روائع
يالجوعتوا الناس و شبعتوا
باكر شعبنا هادر و ثائر .
يكفي الشعب جميعوا اتلاحم
و صوت الثورة شعاره قرفنا
فكوا دربنا وجعتوا قلبنا
اصلوا الفكرة وطن يجمعنا
ثورة ثورة حتي النصر
من كافوري حتي القصر
جيب عرباتك و زيدا عساكر
نحنا الشعب الناهي و اَمر .

سمية هندوسة
[email][email protected][/email]