تناكح الفساد وتناسل الاستبداد

#تناكح_الفساد_وتناسل_الاستبداد
تعالو النوريكم المحنة الواقع فيها وزير العدل السوداني عوض الحسن النور ..
قبل سنتين تلاتة ظهرت قضية ميدان في المعمورة استغلتو مدارس كامبردج والمواطنين جاطو وقالو المدارس دي بتاعة قرن كبير في الحكومة.. القرن الكبير في الحكومة انا واجهتو في صفحة السائحون وتوعدني بالملاحقة القانونية.. قال المدارس ما بتاعتو وعلاقتو بيها انو (فقط) عضو في مجلس الادارة .. المدارس بتعة خالو و دخلو في مجلس الادارة واهدى ليهو 15% من اسهم المدرسة .. وقال انا رشحت ليهو اخوي في الله السعيد عثمان محجوب يكون معاي في مجلس الادارة وبرضو اداهو نفس النسبة.
طبعا بكلام الكفار دة اسمو (تداخل المصلحة conflict of interest) و بنهج النبوة اسمو (فهلا جلس في بيت ابيه فينظر ايهدى له؟)
طيب لو وزير العدل عايز يفتح تحقيق في قصة المدارس دي واراضيها حيلقى انو المسؤول الحكومي دة هو (امين حسن عمر) .. اللي هو اخو زوجتو … يعني خال اولااااااااااااااااادو.. حاجة محرجة موش كدة؟
نجي لقصة الادوية ..
وزير العدل قال لناس البرلمان انو في شركات و بمساعدة من موظفين في (بنك السودان) استولوا على 230 مليون دولار مخصصة للادوية .. و وزير المالية بدرالدين محمود قال (هناك ايادي خفية استولت على اموال الادوية).
وزير العدل قال انو القصة دي انتهت باتفاق مع الشركات النهبت القروش انها تتحلل وترجع القروش المنهوبة على اقساط… وذلك بالاتفاق مع القيادة السياسية …
القيادة السياسية المفروض تكون مهتمة بالموضوع دة هي:
1- رئاسة الجمهورية
2- وزارة المالية
3- وزارة الصحة
4- جهاز الامن
ليه وزير العدل قبل بتسوية في الموضوع دة بدل تحقيقات اوسع ومحاكمات؟
انا عشان افهم القصة دي ختيت نفسي مكان وزير العدل … فحدثتني نفسي الامارة بالخوف بالاتي:
طيب يا ود يا ابوالسعود … تمشي تحقق في الموضوع دة و تجرجر المجرمين ديل قدام المحاكم:
فرضنا يا ابوالسعود يا وزير العدل خشيت بنك السودان قلبت عاليهو واطيهو.
ممممممممممممم… طيب قبل يومين طلع منشور من بنك السودان فيهو توقيع مديرة السياسات والتخطيط اسمها مين كدة (xxxxx عطا عباس) …. ديشااااااك .. معقول تكون اخت الفريق هناي مدير جهاز البتاع الوطني؟ .. مع الكيزان ديل مافي شي بعيد.
طيب سيبنا منها قول اختو .. اصلا المتورطين موظفين عاديين …
اها قوووول يا وزير العدل ظهر ليك في التحقيق انو ابن السيد عوض الجاز الموظف ببنك السودان متورط… اممممممممممممك ..دي مشكلة كبيرة .. ابوهو مساعد الرئيس لشؤون الصين وروسيا .. ومن جهة تانية متزوج 😳ابنة السيد/ بدر الدين محمود وزير المالية شخشيا ..
اوفففففففففففففففففففف
طيب ياخ هسة قول ساكت ظهرت شركة باسم الزبير بشير مثلا .. ضرب مثل ساي .. الزبير دة نعم والي سابق لكن بنتو معرسها 😳ودنافع علي نافع.. ايوة نعم نافع مساعد رئيس سابق لكن ما زال عندو وزن في الحزب.. غير كدة بنتو معرسها 😳ود الزبير محمد صالح .. ايوة نعم ابوهو نائب رئيس اسبق و استشهد لكن اختو معرسها😳 ودبكري حسن صالح نائب الرئيس الحالي … اهااااااااااااااااااااااا .. دي عوجة.. شربكة شديدة.
هسة قول ظهرت شريكة بتاعة زول عندو علاقة بخليل عبدالله بتاع الاوقاف داك و والي غرب دارفور .. ولدو محمد خليل معرس😳 بت نافع علي نافع وبرضو نفس الشربكة.
يا ابوالسعود يا وزير العدل مشكلتك كبيرة ..
طيب تحلها كييييييييييييييييييييييييييف .
ياخ انت مالك ومال المشاكل والبهدلة والاحراج .
ياخ بلا شفافية بلا محاسبة بلا بطيخ .
نشتغل بفقه التحلل و ونتكتم على اسماء الشركات واصحابا وخلاص.
.
.
.
يا جماعة عشان نتجنب مشاكل زي دي نبعد من الاستفراد بحكم البلد ومؤسساتها لافراد تنظيم واحد وانسباءهم واقرباءهم واصهارهم .. الكفاءة فقط .. والمحاسبة والشفافية .
لانو تناكح الاستبداد يؤودي لتناسل الفساد … او العكس
.
.
كامل التضامن مع وزير (العضل) في محنته .. انا لو مكانو بقدم اللوتري

أسعد التاي