حروف حرة
“قرنق” الفطيس” نسى قديمو “اللستك” و”الطشت”!!
لنا مهدي عبدالله
[email protected]
? نقاشان مختلفان حول الراحل دكتور “جون قرنق” رحمه الله والحركة الشعبية ومآلاتها بعد انفصال الجنوب جمعاني مع عدد من المثقفين بعضهم معدود (ساكت) ضمن زمرة المثقفين؛ النوع الذي إذا ما فتح فاه تمنيت لو يخرس!
? النقاشان كانا يسيران بمستوى راقٍ وكل ما يقال معقول وجميل، حتى حدث ما صعقني ألا وهو نعت البعض للراحل “قرنق” مرة بال”فطيس” ومرة أخرى بال”هالك” برغم أن الناعتين لا ينتمون لحزب المؤتمر اللاوطني حتى يكون من الطبيعي إلقاء هاتيك النعوت المحطة دون أن يرمش للناعتين رمش!
? كما استنكر البعض أنني كلما جاءت سيرة الراحل “قرنق” قلت (رحمة الله عليه) باعتباره كان مسيحياً لا يستحق رحمة الله؛ فهو ليس من الأمة المسلمة التي تضمن حظوتها برحمة رب العالمين!!
? كما صعقتني بشدة حتى انتفضت غضباً جمل على شاكلة: (هو جون قرنق دة لو ما المغشوشين فيهو العملوهو زعيم كان مصيرو شنو غير لستك وطشت غسيل؟؟ وفي ناس قالو هو زمان زاتو بدا حياتو بي لستك وطشت، صحي النسى قديمو تاه)!!
? الحقيقة أنني أيقنت ساعتها أن تقرير المصير الذي انتهى بتصويت أحبائنا الجنوبيين للانفصال لم تتم إجازته الرسمية في نيفاشا بل نبتت بذوره في وعي ولا وعي الكثيرين منا منذ أمد سحيق!
? الانفصال لن يتم عملياً في العام الجاري بل تم فعلياً يوم اعتبر جهلاؤنا بني وطنهم من جنوب البلاد مواطنين من الدرجة العاشرة، لا يحق لهم أن يعملوا سوى غسالين للملابس ولا أدري لم استنكار البعض للعمل بهذه المهنة الشريفة؟!
? الانفصال تم يوم اعتبر كثيرون أن المواطنين من جنوب الوطن لا يجب لهم أن يتمتعوا بكامل حقوق المواطنة مثلهم مثل (مواهيم) بقية أجزاء السودان، برغم أن الأحباب من جنوب السودان قد أثبتوا جدارتهم في كل المحافل حتى العالمية منها!
? إن العنصرية البغيضة التي ما انفك سفير الكراهية الطيب مصطفى يدعو لها والتي تبلورت في الفكرة الشيطانية مثلث حمدي فصلت الجنوب في عقول وأفئدة البعض قبل أن تفصله الانقاذ بغبائها المعهود وبغباء قياداتها التي لم تجعل خيار الوحدة جاذباً!
? أحبابنا الجنوبيون محظوظون فعلى الأقل لن يحكمهم هؤلاء الموتورين المتلاعبين بالدين المفرطين في مكتسبات الشعب السوداني الباطشين الكارهين لكل قيم الخير و الحق والجمال!
? لقد (نفد) أحبابنا بالجنوب بجلودهم وبإذن الله سأعمل جاهدة على أن أكون مواطنة بجمهورية جنوب السودان أو أياً كان اسم الدولة الوليدة، فيشرفني أحبابي هناك، يشرفني أن أكون مزدوجة الجنسية إلى أن تمتد أيادينا مرة أخرى ليلتئم الجرح ونجتمع في وطن موحد ديمقراطي حر يعرف أن ينظر قادته إلى قلوب المواطنين لا إلى ألوان جلودهم وسحناتهم!!
مع محبتي؛
سبحان الله كنت بتكلم مع صديقي عبر skype عن العنصرية المتأصلة فينا نحن السودانيين وانا في المانيا وهو في كندا وقلته ليه زمان كنت بسمع بان الالمان عنصريين لحدي ما جيت وشفتهم وعايشتهم وتزوجت منهم فأكتشفت بأنهم ليسوا بعنصريين ولكن هذه دعأوي مغرضة أطلقها اليهود وأعداء الالمان عليهم نسبة لكرههم لهتلر النازي،وقلته ليه لكن العنصريين بحق وحقيقى نحن السودانيين وياهو كلامي طلع صاح يا أخت لنا !!!
يالنا صباح الخير
الموضوع بسيط
ساتنازل لكي عن وظيفتي في جامعة جوبا بس حضري شنطتك
احييييييييييييييييييييييييييييييييييييييييييييييييييييييييييييييييييييييييييييييييييييييييك على هذا الكلام الجميل
المزدوجة دي وين…؟؟
بالله ورينا دربها علشان نكون أول المسجلين فيها
قبل ما الكيزان ،الما عندهم قشة مرة ديل ، يملوها علينا
الأطباء قالو ليهم خلينا ليكم وزارتكم ماشين السعودية
جماعتك ملو الكشف بتاع السعودية..؟؟ ما قلتو "إنقاذيون"..!!
وانا والله ما عندي مانع اشتغل في جوبا ولا قوقريال
"غسال بى طشت" كان نقدر نغسل عار التصريحات
البليدة والعنصرية اللي ما زال بعضنا خادع بيها نفسو….
تحية وتقدير لك ….
متعك الله بالصحة والعافية اختنا العزيزة .الاخوة الجنوبيين نالو مانالو من الشماليين من نعت مرة عبيد مرة جانقي .صبرو علي الازي حتي نالو المراد كونو دولتم الكلام لينا نحن الشماليين هنافي السعودية لما السعودي يشوف السوداني عندو شلوخ في خدو يقولك دا شيخ العبيد ،ونستاهل لاننا اطهدنا الانسان الاسود السوداني الاصيل الما وافد !!!ولاننسي ان السعودية دعت الاخوة الجنوبيين لي اقامة علاقات وهم سود اللون !لكن قلوبهم زي لونا انحناالشماليين الحاقدين الحاسدين
الاخت لنا
اولا نشكرك علي هذه الروح الطيبة التي ان وجدت بيننا لكفتنا شر ما نحن عليه من ازمات نتجت عن سلوكيات وتصرفات قلة عمقت جرح الروابط الاجتماعية بين ابناء الوطن الواحد. المرحوم جون قرنق (رغم انف من ابي) اكبر بكثير من ان يتناول سيرته شواذ الافكار واكراما وحفاظا لما تبقي لنا من صلات ارجو من الاخت لنا الا تعكس لنا اراء العنصريين مثل ما ذكر بحق قرنق لان ذلك وحده مدعاة لتقليب المواجع . شعب جنوب السودان وضع رجله الاولي علي عتبة الانعتاق والتحرر بمجرد ان حدد مصيره وستتم كرنفالات فرحه رسميا بعد اسابيع قلائل ( خلوهم في حالهم وفكروا في عدم تكرار التجربة مع من تبقي من المغلوبين في الشمال)
انت برضو قلتي تجربي الكتابة ؟ انتو حزب الامة مافيهو شغلة ولا شنو ؟ بعدين ياخ العمود أو المقال عنوان في الأول , ما ممكن يكون العنوان قدر العمود !! و عنوان سوقي بعد ده كلو !!
لك التحية استاذة لنا..
هي بحق أفكار وأقوال جاهلية ممن لا يعلمون أن رحمة الله وسعت كل شيء، ولكن احتكرها بعض أخصياء الرأي في انفسهم فقط، وليتهم كانوا ممن يستحقونها من الله ز
فالاسلام في بلادي مبتسر
والحق عندهم منكر
والكذب سيد الخبر
فماذا ينتنظر من أمة يستقوى علماؤها على فتاة ترتدي بنطال ويجهتدون في استخراج إقامة احكام الحدود عليها، بينما يصمتون الكشياطين صامين إذانهمم ومخرصين ألسنتهم عن قول الحق لأجل فتاة تغتصب من كلاب ولاة أمرهم، بل يغضون أطرافهم الكفيفة عن قتل الحاكم لعشرة آلاف نفس من البشر.
لك الله ياوطن.
احييك يا استاذه لنا علي هذه اللمحه الانسانيه التي تنم علي لا قلب انساني خالي من شوائب العقد المركبه والانتقاص0 ما رايت شخصا يحاول ان يقلل من قدر الاخر الي سوف تكتشف ان وراءه كم هائل من التعقيد النفسي0 فالطيب مصطفي وزمرته ومن هم في شاكلته من اصحاب العقد هم سبب كل البلاوي التي حلت بوطننا وفقا لدعاويهم الغير موضوعيه التي لا يمكن لها ان تعيش في الضؤ ولكن وجدت من يمهد لها الطريق ويصمت عن افعالها بل هناك من ينتسب لاهل الراي ويباركها كما يفعل بعض الذين يحسبون علي رجال الدين من الفتيه الذين درسوا في الخليج0 واتوا بكثير من العقد التي لا تشبه مجتمعنا بل هي مفصله علي مجتمعات اخري ما زالة تعيش حياة الجاهليه والتعصب العرقي الاعمي 0 فتجد ايسر شيئ عندهم تكفير الاخر لترضية السلطان0 وما ساعدهم في ذلك الوسائط الاعلاميه التي يتربع علي راسها عديمي الموهبه والحس والذوق الانساني السودانوي امثال الخال الرئاسي والصادق الرزيقي
وود العتباني بتاع الراي العام وكل الذين تتلمذوا علي يد اعلامي الغفله من جماعة الاسلام السياسي اصحاب المشروع الحضاري0 الذين وجدوا جوا فافرخوا وباضوا فيه0 صحافه كان روادها امثال بشير محمد سعيد ومامون حسن شريف ومحجوب محمد صالح0 كانت تقدم ما ينهض بالامه السودانيه جمعا نحو المعرفه الانسانيه وتثبت دعائم القيم النبيله والان اصبح روادها امثال ضياء الدين بلال الفتي الزئبقي الذي يميل حيث ما مال جيبه وامثال النكرات كابن العتباني ربيب مواخير الامن والطيب مصطفي المافون والصادق الرزيقي المعقد0 فكيف لامه هؤلاء يشكلون الراي فيها ان تنهض لتلحق بركب الامم0
مجددا شكرا لك يا استاذه ونقول للمعلق عثمان الاستاذه لنا صاحبت قلم مشهود له وكاتبه محترمه ولكن العين الكليله لا تري الا ما يحلو لها وهذا داب جماعة ابوعقين واذنابهم كلما راوا امراءا التف الناس حول ما يكتب يسعوا الي صرفهم بايراد ما هو بعيد عن موضوع النقاش فسؤالك مردود اليك0 والاعيبكم اضحت مكشوفه للقاصي والداني في انكم تريدون ان تصرفوا البوستات التي تتحدث عن ما لا يتوافق مع طرحهم واستهبالهم وظلمهم للعباد0
اختنا لنا تحياتى وشكرا على هذا الموضوع الهام الذى يمثل اس المشكلة السودانية..
نحن كسودانيين كنا فى طريقنا الى التخلص من هذه العصبية والعنصرية الساذجة قبل قدوم حكومة الانقاذ التى فى سبيل بقاءها فى الحكم استثمرت فى كل المتناقضات السودانية واتنهى بها المطاف بالاستثمار فى اثارة النعرات القبلية والعنصرية حتى تتمكن من كسب انسان الشمال الى صفها الذى لم تستطيع كسبه خلال سنوات حكمها …ولا ندرى فى ماذا سيستثمرون فى الفترة المقبلة ؟؟؟
الحمد لله ان انفصل الجنوب وانشاءالله ماتنوم للكيزان عين
الاستاذه المحترمه لنا مهدي لك كل الود والتقدير
هنالك فرق بين نقد الذات وجلد الذات ومرمطة الذات بالوحل عند الكتابه عن اي موضوع يخص مجتمع وفي قضيه شائكه وحساسه مثل هذه يجب ان يتم تحديد الشريحه التي تحمل تلك المفاهيم العنصريه وبلاش العقليه الجمعيه ..طشت غسيل!!!!!!!حرام عليك يااستاذه لو كان السودانيين عنصريين ما كان جون قرنق ترأس المؤسسه العسكريه الاقتصاديه وما كان من الاول الدوله بعثت به لنيل الدكتوراه وافتكر التوجه العنصري للدوله او المواطنيين بيكون مثل امريكا الستينات عندما كان غير مسموح للملونيين بالدراسه في جامعات البيض ولا ركوب وسائل المواصلات معهم 00سبحان الله معظم التعليقات بتصب في اتجاه ان الشماليين سيئين وعنصريين وما عارف المعلقين ديل كانوا عايشين وين؟؟وبعدين لماذا يتم تحميل كل الاوزار للباشمهندس السيد الطيب مصطفي هل كان الطيب موجود عندما فتك الجنوبيين بالشماليين في توريت 1955 ؟؟هل كان الطيب هو السبب في المجزره التي حدثت للشماليين الابرياء في الخرطوم سنة 2005 عقب مصرع زعيم الجنوبيين جون قرنق ؟؟؟هل الطيب هو السبب في تصويت الجنوبيين للانفصال بنسبه تقارب 98% ؟؟؟بعدين كيف الشماليين عنصريين واثناء الحرب الاهليه وابناءنا يموتون في الجنوب وسمحنا للجنوبيين بالعيش معنا في الشمال لعمري انها قمة الشهامه والتسامح ولو كان شعب اخر لنكل بهؤلاء الجنوبيين شر تنكيل 00الجنوب كان حجر عثره في سبيل تقدم الشمال والجنوبيين لديهم تطلعات واشواق في اتجاه معاكس للشماليين وفي النهايه تم طلاق بالثلاثه لارجعه فيه ويجب ان يتحلي الناس بالواقعيه والعقلانيه وان يتفرغ كل منا ومن الجنوبيين لتنمية بلادنا وخلق علاقة حسن جوار امن خالي من التربص والحقد والمؤامرات ودمتم
? الانفصال لن يتم عملياً في العام الجاري بل تم فعلياً يوم اعتبر جهلاؤنا بني وطنهم من جنوب البلاد مواطنين من الدرجة العاشرة، لا يحق لهم أن يعملوا سوى غسالين للملابس ولا أدري لم استنكار البعض للعمل بهذه المهنة الشريفة؟
المواطن من الدرجة العاشرة لايحق له ان يملك قرش احمر
إنت عايشة وين في السودان ولا برة
الجنوب اتمرد كم مرة وكم مرة وهل الجنوبيين الفارين من الحرب استخدموا في الشمال كعبيد ؟
الجنوبيين اولادهم بيتعلموا في الشمال ودا اول دليل إدانة لي عمودك المتهور المامسؤل دا!
الجنوبيين حاولو يخربو الخرطوم كلها لموت رجل في جبال الاماتونج ولاذنب للشماليين في موته
الجنوبيين صوتوا للانفصال بي نسبة 98% وانتي خمي وصري
وعليك الله قبل ما تمشي اتزوجي جنوبي وامشي معاهو عشان تكوني مواطن درجة اولي وتكوني حققت مرادك
اوفقك الراى مرات الواحد يحس بكره شديد للانتماء لهذا المجتمع
العلامه عبدالله الطيب شبه علاقة الشمال بالجنوب بالزول الماسك مرفعين من اضنينو ولو فكاهو حياكلو ولو خلاهو حيعطلو ……وفعلا المرفعين عطلنا وسبب لينا خسائر بشريه واستنزف اقتصادنا 00السياسه لا تعرف عواطف او سعاد بل تعامل مع معطيات والمعطيات بتقول اي تباين اثني في اي بلد الناتج دمار شامل والسودان خير دليل
بس يااستاذة لنا من تحدثت عن الطشت واللستك لم تتحدث عن اوهام بل وقائع يعلمها المجتمع السودانى ويعيشها واقعا ((. حلوا كان ام مرا)) وتغيير الواقع لايكون بين ليلة وضحاها للاسف الشديد_وهو جزء من ثقافة العنصرية العربية التى جسدها المتنبىء فى هجائه لكافور حين قال
من علم الاسود المخصى مكرمة اقومه البيض ام ابائه الصيد
ام اذنه فى يد النخاس دامية ام قدره وهو بالفلسين ممدود
لاتشترى العبد الا والعصا معه ان العبيد لانجاس مناكيد
مايقبض الموت نفسا من نفوسهم الا وفى يده من نتنها عود
هذا الشعر يدرس من ضمن منهج الادب العربى -فهل سار من تحدث عن الطشت واللستك بعيدا؟؟؟؟!!! -من لايتحدث جهرا يردد مثله سرا — وقد يجد من القوم من يلومه على ذلك …… ولكنه لوم اقرب للاستحسان!!!
المثالية فى واد والواقع على ضفة الوادى الاخرى
نسأل الله جمع الشتيتين
يا جماعة الناس ديل انفصلو خلاص …وده خيارهم قبل الانقاذ …خلونا من قالو وقلنا دى وتنبشو فى حاجات ماليها داعى ونتمنى للشعبين الشمال والجنوب العيش فى سلام …انت كان شايفة القالو الكلام ده جهله وما مثقفين كتبتى عنو ليييه .. يا المثقفة انت ..قصدك تشعللى النيران وصبى الزيت فى النار واللا تورينا انك متحضرة وواعية ..تذكرى قول رسولنا الكريم (ص) (فى ما معناه)الذوول اذا سمع اى كلام ينقل الكلام السمح بس اما الكلام الشين يعمل ليهو اضان جلد..واللا كلام الرسول كمان مابتعرفيهو ..حجابك وطرحتك دى حلوات
يا ام الحسن ارى فيك عقدة القرى تجاه الحضر….تقدرى تقولى لينا ما هو عيب التحضر والوعى…..وبعدين لو ما حافظه ليك حديث ولا آيه مافى داعى تستخدمى عبارة فى ما معناه لأن هذا يصيبنا بجهالتك.
ام الحسن العلقت دي ولا ام اربعة واربعين؟ تعليقك لديح:D :D :D :D
بعدين لئيم
بعدين مسيخ
وانتى الرسول البتدعى عرفتك لكلامو ما قريتى ليهو اصو كلام عن لطيف الكلام والكلام بالحسنى؟
تتحدثين عن العنصرية والجهل وتستبعدين دور حزب الأمة الذي أضاع أو ساهم بالقدر الأكبر في إضاعة النظام الديمقراطي مرتين في تاريخ السودان، كانت الفرصة أمامه ليفعل الكثير إلا انه أثبت ضعفه وفشله ليلقي بنا في جحيم الإنقاذ، وها أنتم اليوم يا منسوبي حزب الأمة أصبحتم كتابا تسكبون جام غضبكم كل يوم على النظام وكأن الأمم والشعوب تحرر بالمقالات والكلام المنمق والاشتر كما مقالك هذا، أحسست بالخجل وأنا أقرأ عنوان المقال، الإنسان العظيم دكتور قرنق نفسه لم يكن يفكر كما تفكرين وإلا لما أتى إلى الخرطوم بعد ربع قرن من الزمان في النضال من أجل سودان جديد، ولا اعتقد انه كان يشعر بعقدة نقص أو دونية، كان واثقا من نفسه متسامحا وجميل النفس، إن مشاكلنا وعقدنا الاجتماعية لا تحل بهذه الأساليب الجارحة لمشاعرنا، هناك العديد من الأساليب والوسائل لنرتقي بها بمفاهيمنا ونبني بها وطنا متحررا وحياة أفضل، ارى انك أخفقت هذه المرة في توصيل الرسالة.
تحياتي أخت لنا مهدي
المقال ملئ بالعاطفة أنتن النساء حتى في المواضيع المصيرية لا تستطعن الإنفكاك من هذا القيد حكمته بالغة في خلقكن سبحانه و تعالى..
كثيرة هي المتناقضات في هذا المقال..ذكرتي أن الإنفصال قديم و منذ أمد سحيق على حد تعبيرك فما ذنب هذه الحكومة في شئ كهذا ؟هل الإنقاذ تحكمنا منذ أمد سحيق؟…إتركونا من الكلام النظري و لينظر أحدكم إلى نفسه إبتداءً منك أنتِ كاتبة المقال..كيف هو مستوى العلاقة مع أحباببك الجنوبيين؟أخشى أن لا تتعدى الكلمات المكتوبة هنا من شاكلة أحباببنا و اللقاء في المنتديات ..أنا الذي أكتب هذا التعليق النصف أسرتي نصفها الجنوب و أخي الأكبر متزوج من الجنوب….
الجنوب كذلك سيحكمه المتورون و المهوسون و المتاجرين بالديمقراطية بل هم الان يمارسون القهر و الذل..و لا أظنك يا لنا مهدي أكثر جنوبيتةً من أطور أو قاديت و لام أكول أو السلطان عبد الباقي..
بصراحة مثل هذا النوع من المقالات العاطفية ضحك على العقول..إذا أمكن أخبرينا عن تنزيل أفكارك و مشاعرك هذه على المستوى الأسري أو العائلي في شكل علاقة زواج أو تواصل إجتماعي حقيقي..عشان ما يكون طق حنك ساكت.
لا تسقطوا مواقفكم السياسية على قضايا لن تحلها الكتابات…المطلوب حلول عملية و عدم إستعجال النتائج…
نتمنى أن نسمع أن آل مهدي قد أصبحوا مثل آل هارون.. "يعني تعملوا خلطة" عشان ما تحتاجي لجنسية مزدوجة..
تسلم خى ابراهيم هارون . الا يستحى حزب الامه من الاخفاقات المتكرره ولسا عشمان !!!!
الاخت ان ما تقول الان هو عين الحقيقة المر التى جعل الجنوب والجنوبين يقرروا الانفصال بنسبة التى سميتها.
هى ذات السبب التى سوف تجعل كل سودانى وطنى قيور على هذاالبلد يطالب بالانفصال.
يا الاخت العزيزة لنا انت مرحب وكل من اراد الحياة فى جمهورة جنوب السودان الكبير مرحب ليس انتم اخوتنا بل حتى الاجانب من بلاد السام.
هووى ..هووى …يامعشر الانصار ماتشبو لى فى حنكى…..الحفظ انا مابقدر اجاريكم
فيهو ….لكن الرك على الاستيعاب ثم ..التطبيق
(من راى منكم منكرا فليغيره بيده ..فان لم يستطع فبلسانه فان لم يستطع فبقلبه وذلك اضعف الايمان ) يعنى الواحد كان شاف العوج مايسكت ومايرضى بيهو….
(ولاتنابزو بالالقاب بئس الاسم الفسوق بعد الايمان)..يعنى …كلام زى ام اربعة واربعين ..وزى…شوف مقبولة شوف(عيونها) تحت الكبرى فارشة فولها ..مش بودى البلد دى فى ستين داهية بس ..ده بودى جهنم الحمرا عديل
(اتركوها فانها منتنة ) يعنى ناس اللستك والطشط ديك ماسكين درب الخلا
اها…. لقيتونى كيف فى الحفظ
الله يعلم ذكرتونى بى حصص الدين فى المدرسة زمان كنا لمن نشوف استاذة الدين نقعد نكورك من الخوف…..الليلة الدين سجم الماحافظين الدقة عشرة والذيادة اتنين..
نرجو من(القايمين على امر التعليم فى هذا البلد والمهتمين بالشأن التربوى) انو يخلو الشفع فى المدرسة لمن يشوفو استاذ الدين يكوركو ويقولو …الليلة الدين سجم المافاهمين…
ختام الكلام ..ان هذا الدين متين فاوغلو فيه برفق
ختام الختام…اللهم ارحمنا..فانك ان رحمتنا انعمت علينا فهديتنا الى صراطك المستقيم يارحمن يا رحيم ويا مالك يوم الدين
ياسيد سوداني متحير انا سمعته سمع ان البروف ضرب مثل بعلاقة الشمال بالجنوب بحكاية المرفعين ولا ندعي انو الرجل عليه رحمة الله من دعاة الانفصال او العنصريه لانو كان اكبر من كده بكتير والجزئيه التانيه بتاعت التباين الاثني ما نسبناها للبروف دي قناعه شخصيه وعارف كتاب الرايخ النته قلته عليهو وبعدين ضربته مثل باستراليا وفرنسا يااخي قول كلام غير ده استراليا ياراجل برضو !!!!بعدين نحنا ثقافتنا وتركيبتنا مختلفه عن اوروبا وامريكا الناس ديل الوصلو ليهو ده نتاج تجارب لعشرات السنوات تفتكر نحنا حنستحمل كده ما اعتقد يااخي العزيز وكمان انته هنا عند التباين الاثني معاهو تباين ديموغرافي يعني حلها سهل والجنوب انفصل وياريت نحاول يكون اخر الاحزان ونركز علي ايقاف انفصال دارفور والشرق باي ثمن والله يعطيك العافيه ويزيل حيرتك وحيرتنا