الرسالة الثانية الى امي

الرسالة الثانية الى امي
[CENTER][/CENTER]

أديني يمة رضاك
خليني امرق افوت
واشيل سلاحي هتاف
اقيف في وش الظلم
اهتف اقول يارب
خلصنا من ناسا
سرقونا بي اسمك
حكمونا بي دينا
والله منو بريئي
شالو الغلاف مصحف
جواهو اسوا قول
اتحلل السراق
واتمكن المخبول
خليني يمة افوت
شن فايدة القعدة
خايفاني امرق اموت
ماماتو قبلي كتير
شان ينصلح وطني
واستر كمان عرضي
يمة البنات مرقن
ارجل من الباقين
هتفن بصوت مبحوح
ارحل كفاك رقيص
ضربوهن ناس الامن
مش قلتي لي زمان
انو الحريم سترك
وامونة جات تبكي
يايمة تتوجع
ضربوها ناس الامن
يايمة كان شفتي
كل الرجال زحوا
خلو الحريم واقفات
دم البنات بيسيل
ورجالنا متأنسين
رفعوهن في بوكسي
ودوهن التحقيق
يايمة ديل رجال ؟؟
وايه العرض يمة
مش كلهن عرضي
ياعازة ماترجي
راجلا يقيف حداك
ويسندك كان فتي
ماتو الرجال زمااان
يوم اغتصب وطني
حكموهو رباطة
يمة البلد خربت
خليني امرق افوت
واموت كان مت
واصلوا الخلاص لابد
خليني انزف دم
اديهو لي وطني
اديني انتي رضاك
واعفيلي كان مت

بسيوني تربال
[email][email protected][/email]