بهيسة عثمان: حين خوف من حال البلد
بهيسة عثمان
حين خوف من حال البلد
#نص
افترضي انو رئيس جبان
افترضي ياخ ملعون عديل
رفع الدعم ..خلي الدعم
رقص القرد ..
قفل محل كل العلاج
خلي البلد محتاجة ناس
جاب الحبش
مرض انتشر
مش البلد حقت ابو
خلي خوفك يابنية
مش من الزول الجبان
اللا بخاف من الله
لا بيعرف هوية ولا وطن
ايه البيحصل ليك
اغتصبوا كل العفاف
من يوم مسكوا البلد
قتلو الولد
نهبوا البلد
ضاقت معيشة الناس عديل
ماخلو ليك حقا حلال
ماتو الرجال يابنية
لو راجية الخلاص
صبحت ضمائر
الناس حجر
ونفسوها اوسخ
من امس
كل اللي هموا
علي البلد
هاجر رحل
مشي واغترب
شان الحال صعب
خلي الوطن بعدو بيئن
في شنو بيموت
في شعب بيهاب الخلاص
بيحب الكلام
وحفلة وداع
ومعرض كتاب
والجكس انضف من زمان
والخرشة في كل الوطن
وبيوت دعارة مفتحة
وصحافة بتبيع الضلال
اطفال ملاجئي كتار خلاص
ليه بتبكي يابنيه
خلي دمعك في عيونك
بتخافي من بكرة يجي
مستقبل اولادك يضيع
بتخافي من يتحرشوا
بي ولادك البكرة بيجوا
قلبك علي شارع الحوادث
شان قفل
يابنيه هوووووي
ضاع الوطن من كم زمن
وانتي في ذات المكان
منتظرة بكرة يكون جميل
وشعبا يقوم من كل طريق
يطفي جواك الحريق
المن زمان كاوي القليب
وتسمعي الشارع يضج
ارحل خلاص خلي البلد
وحرية سلام وعدالة
والثورة خيار الشعب
وعائد عائد يا اكتوبر
يابنية ماترجي الحلم
مات العشم جواتنا
من كمين سنة
ولسة في ذات الكلام
وزير سرق
واحد اغتصب
ماعادي يابنية الكلام
بس الفعل حق الرجال
الانتي منتظراهم يجوا
طال انتظارك مش صحيح
ماتبكي وتزيدي جواي الرهق
ماتصحي في الاحزان
بعد ما الكل خلاص ودع رحل
والوطن في يوم بطيب
والله بطيب
من دون جدال
الله قاعد يابنية
وكل الملائكة معاك
والله يعينك في البلد
خلي الدموع يوم الخلاص
وخلي بالك في الطريق
وخلي بالك و
السلام
بسيوني تربال
