ارض الله اوسع في البلد

يا دي البلاد السنبله
المخفية من عين العيال
النيل يمد خاطرو ويفر
يتمغي زي فرس الرهان
الطال لجامو ومستريح
يوماتي يجري لمن يمل
لاحقق احلامو استراح
لاقادر يتكلم صراح
حلمان يداعب للعروس
الجرتقوها علي العدم
بت باديه مصيونه وحنون
متغبشي وحزنانة
تندب حظها
لا لاقيه زولا يفهما
وخجلانه
تب سافه الاسف
لي مين تبوح ؟؟
والكل رحل ساب البلد
خلوها نايمة مكتحة
شيتا سفافي
ومره حر
عطشا يدلي الطيره
من وش السماء
عطشا يكسر ضلعة الشجر
الكبير
الما يلوكوه الصغار
عدما بعرفنو العوين
لايكات مع الصبر القرض
ارضا تقرب تستقيد
ترحل تهاجر
لمكان يعرف لقيمتا يفلحا
تنثر تحتحت لي بطانا
وتزدهي
ارضا بتل
حور الجنان
كل ماغشاها
المجتهد
تلقاهو بكره بكر مصون
ارضا تفج خاطر المسام
تنبع عيون تسقي الصغار
ما الارض ملت انتظار
شن فايدة الغايب هناك ؟
وارضو بتموت
دائما
عليه
اما تفتش لعيون
ود القسا
يرويها من عطش السنين
تضحك تفرهد وتنتشي
وترجع صبيه
متل عروس

ياالله نحنا بتين نعود؟
متين تعود لينا الحياه؟
بدل الموات والهم
متكن فينا حي
يوماتي يلسع جمرو كي
يوماتي
ارضنا تتلفت
منتظرة جية الامنيات
قالو الغياب :
خلوها راقده مع الالم
مافيها شيء
يابسي ومكتحة
بالاسي
خلوها للغولة السمان
يوماتي يخطبو ودها
يوماتي داقين الجرس
بالجبر في الاسواق جبر
علينا جاي
يوماتي يللا علينا جاي
يوماتي يوصفو
في سماتا وصف وصف
جاعت وصانت للشرف
متلمة في جوه الغرف
تحلف تشوفا تقول ولد
مابترضي غير النيل احد

وين الشهود ؟
وين العيال ؟
وين الرجال؟
وين البهزو ويعرضو ؟
ارضك تناديك ياولد
نيلك بهاتي عليك يقول:
مشتاق يعانق للحقول
بالزين والفال والعديل
زغرودة شقت للفريق
20 الف جوال ذره
وبابور يشق صوتو
الضلام
ينبح يشيل الليل عوي
ويوسد الموية السراب
بردانه تتغسل تفيض
وتتناول الخضره
وتجر مرواد دلالا علي العيون
مستورة بي توبا الجميل
بارماهو طورية وملود
زغرودة في ضحوة شغل
ضل ضهرية
حبلي ومبشره
بي ولاد
حرارة الميلاد عجول
وسماية الشفع
بشاري نضيف وحر
والراعي بهانك منتشي
يعزل في خرفان الضيوف
ومرات بيعزل في البهم
واخوه بحلب في البقر
لبنا مزبد في عمر
كل البجيبك يشرب وينف
وتزيدو انت وبالحلف
وهي شني الحياه؟
بسمه ونسيم
ارضا بتسند للقفا
واما تهدهد وخيرا
فاض
ضيفا يقول في الليل سلام
قدحا يخابت في قدح
لبنا مقنن وباقيه ني
بهما تكوس باب
الزيبه وتنطلق
املا يفج تعب السنين
وعدا يباعد للانين
قمحا متكل في الغلال
عيشا متل سن الغزال
سمنا ينز في ايدين صغار
سعنا ملان
اخوان يجو
وضحكة ولاد
يازول كفاك اهدي الحياه

زيت الولد
قطنا يهبهب
زي سحاب
بطيخ مفقع ومنتظر
بسملا يللا علي الجروف
بسملا يللا علي العزاز
بسملا يللا علي البلاد
بسملا لي غابة الصمغ
حمدلا الف علي الرجوع
باب الله اوسع من هنا
ارض الله في بلدك
هناك
راجياك تكفكف في الدموع
ارض الله في بلدك هناك
راجياك ذرفت للدموع.

[email][email protected][/email]