المرور: مقترح لاستخدام طريق الخرطوم مدني كإتجاه واحد ذهاباً

الله يحفظ مواطن العيلفون خاصة والشرق عامة من خطر الفكرة لان طريق العيلفون الان مزدحم وضيق وسئ كثير الحفر وبلا صيانة وكثير الحوادث المميتة

الصحيح ان يكون المسار الشرقى للذهاب الى مدنى
والطريق الحالى المسفلت للذهاب للخرطوم
والسبب سرعة الوصول للخرطوم في حالات الطوارى

هذا المقترح فاشل من قولة تيت لأنكم تفكرون لحل مشكلة ناس المدن فقط في الخرطوم ومدني فما بال مستعملي الطريق الذين يقطنون القري والمدن الصغيرة على طول الطريق، يعني الواحد جاي بالبص من الكاملين إلى الخرطوم يركب إلى مدني ثم إلى الخرطوم عن طريق الشرق هذا كلام فارغ ومش كل الناس عندهم عربات خاصه ياهؤلاء وهذا المقترح يضيف أعباء مالية جديدة على المواطن المسكين، قبل كده ناس الحركة ديل قالوا القلابات والشاحنات لا تعبر كبري كوبر إلا بعد الساعة العاشرة صباحا دون الرجوع لناس الطرق والكباري مما أدي إلى تحميل الكبري أكبر من حمولته عند مرور هذه الشاحنات في وقت واحد داخل الكبري وقد الغيت تجربتهم الفاشلة من البداية لتعريضهاالكبري لخطر الإنهيار. هؤلاء العسكر بجميع تصنيفاتهم جعلونا حقول تجارب فاشلة لانهم هم اساساً فاشلين في كل شئ، حسبي الله ونعم الوكيل، على المواطنين الذين يقطنون حول الطريق رفض هذا القرار جملة وتفصيلاً فهم المتضررون اولا واخيرا

…برضو انا عندى اخقتراح او اختراح او اختراع ,بانو ناس القيفتين يستعملوا النيل للاتجاه المعاكس ,تكون فى قوارب سريعة الى الخرطوم , وح تكون اسرع من العربات ,ولاناس حركة ولا مخالفات ولا غيرو , اهو مصدر رزق جديد بدل الرقشات والكوارو ..والزراعة الما جايبة حقها وتعبها..!!

مقترح غير عملى…..

من دقنو و فتلو !!!

قروش البترول وين ؟؟؟

عليكم الله دي فهموني ليها ؟ ابت تقع لي عديل
وبعدين الزول الشفت دا منو الااخترع الاختراع العجيب دا
والله كلام غريب ؟
دا غباء والله الجماعة ديل بتغابو ؟ ولا ما حاسبننا معاهم؟
الوجججججججججججججججججججججججع راقد؟؟

ياخ ذبحتونا والله طريق هو ولّ قمر صناعي الحل كالاتي …تتعمل توسعة للطريق القديم ويصبح مسارين رايح جاي مع اكتاف اسفلتية بعرض متر ونصف من الجهتين ويخصص الطريق البمر بالشرق للشاحنات ويكون اجباري لها ياخ زي طريقكم ده نحن هنا بنشتغلوا في سنة واحدة بس وبي مواصفات امريكية اشتوووو شنو الحكاية ياخ مواد الردميات متوفرة والبتومين موجود والطريق مهم جدا المانع شنو طيب ؟

الاقتراح فعلاً يشبه ناس البوليس لأنهم هم أيضاً تفكيرهم (إتجاه واحد ) معقول لو انا ماشي الهلالية ، اسلك الطريق لغاية الحصاحيصا ثم اعبر كبري الحصاحيصا ثم اتجه شمالاً لحدي الهلالية؟؟؟؟؟ هل هذا الطريق لخدمة ناس ودمدني والخرطوم فقط ؟؟؟؟؟؟؟
كراع في الحصاحيصا وكراع في الخرطوم يا ها ذاتها مقولة (يابخت ناس الكاملين!!!!!!!!!
والله دي ابوالقاسم محمد ابراهيم ما فكر فيها ولم يسبقكم عليها أحد من قبل ……………….أختشوا يا …………………….

الحل في عمل طريق جنب القديم من على بعد 50 أو حتى 30 كيلومتر من الخرطوم وكذلك من مدني . اكرر عشان في ناس مخها تخين ومابتفهم يعني يدبلوا الطريق بس جنب الخرطوم وجنب مدني لان دي اسمها منطقة عنق الزجاجة وغالبية الحوادث في المنطقة دي عشان اللمة بتحصل هنا ياناس افهمونا وحكاية الشرق دي نكته سخيفة وممكن طريق الشرق ذاتو يعملو فيهو دبل في عنق الزجاجة . آمل ان تكون الفكرة واضحة لانه ده الحل وليس غيره أللهم إلا طريقين جنب بعض ألا هل بلغت اللهم فأشهد .

كم عدد المواطنين الذين ماتوا في ايام عيد الاضحى المبارك من جراء الحوادث …اضربوا الحصيلة في سنوات حكم الكيزان …اكيد النتجة صادمة ,,اذا كان هناك حكم رشيد وحكام لهم الغيرة على الوطن والمواطن لخصصوا ميزانيات الصناعة الحربية في التنمية واخراج السودان من قائمة الدول التى تفتقد للبنية التحتية وفي هذه الحالة اذا فكرت اي دولة مجرد فكرة بس لضرب السودان لاستنفرنا خفافا وثقالا لصد العدوان الخارجي …ولكن ان نلبي نداء مسئولين افسدوا في البر وفي البحر وفي الجو ونهبوا اموال العباد والبلاد وابادوا وشردوا ابناء جلدتهم وسبوه بابشع النعوت بدءا بلحس الكوع وانتهاءا بشذاذ الآفاق فهذا لا ولن يحدث حتى ولو بقوة السلاح .

طيب انا لو طالع من ابوعشر ماشى الجديدالثورة ولا المسعودية ولا ماشى من ودراو الى الهلالية يا العسكرى الفراق اقعد احاحى وازازى بالوديان والفرقااااان فعلا صعدت فكرة الى حاااافلة ونزل عسكريااااااان واللبيب بالاشارة يفهم

اين اموال الجزية التى تؤخد اناء الليل واطراف النهار من المسافرين على الطريق مند اكثر من عشرين عاما . انتو عاوزين تحاربو اسرائيل وغالبكن تعملو طريق مزدوج باربعة مسارات بدل ستة
والله الاموال التى تؤخد فى خمس سنوات فقط تكفى لعمل دلك ولكن هده الكروش لن تمتلئ.
مرة يقولو تفويج ومرةمسار واحد شغل بتاع محششين عليكم بالعلاج الجدرى اوقفو نهب اموال الطريق ووجهوها لخدمة الطريق وبلاش كلام بتاع مساطيل

عندنا أزمة عقول عشان كده القرار عند الجهلة.. وين ميزانية التعليم؟ اتلحست!! وين ميزانية الامن والدفاع؟ اتلحست!! وين ميزانية الصحة؟ اتلحست برضو.. وبقى المواطن جاهل وملوع بالضربات الاسرائيلية ومكوي بالامراض دون تحصله للعلاج.. ولا تعليق على الطريق اتجاه واحد لغباء من اتى بهذه الخزعبلة