ساطور الحاج منزو وشرك حماده الساده..!
عبدالله عبدالوهاب
غايتو ! حكومة الناس ديل ما تخليك تستمرأ حالة الحزن التي أنت فيها و حزني علي توأم الروح والأحلام أحمد عبدالـمكرم ما يزال يطعن في الخاصرة غير أن افعال ناس ها الحكومة تجعلك لا تستمتع بهذا الحزن ومن هذه الأفعال رؤية الحاج آدم أو الحاج منزو وهو يحمل ساطورا قبالة شواطئ البحر الاحمر في إنتظار الصواريخ الإسرائيلية! أو رؤية محمد الحسن الأمين أو حماده الساده وهو يكج شركا للطائرات الإسرائلية غرب امدرمان.
وقبل التعليق علي هذه العبثيات أستميحك عزيزي القارئ سرد هذه الواقعة لك و للمرة الثانية وذلك لأنها تتطابق و حالة الناس ديل! عمنا خليفه عبدالله كدودي كانت لديه فرشة خضار في سوق كوستي فغشاه أحد معارفه فقال له:-{تعرف يا عم خليفه أم بارح مغصت ليك الحرامي جنس مغصه! الحرامي دخل البيت وعاينت ليهو في عيونه وقلت ليهو عاد ما بسألك يا الحرامي ! الحرامي فتح دولابي و دولاب الـمره وشال كل الهدوم وصراهم في بقجة فقلت ليهو موت بـمغصتك يا الحرامي ما خشمي وأنا سيدو! الحرامي ملص دهب الـمره غويشه غويشه و لامن غلبتو الحيله قلب اللحاف اللي نايمين فيهو و جدعنا في الواطاه وشال كل الـمطابق تحت اللحاف وقلت ليهو كمل الناقصه يا الحرامي! أها ياعم خليفه الحرامي طلع بالباب عديل وقلت ليهو كيه و غيظه فيك يا الحرامي! عشان بسألك!!}
أها يا الحاج منزو وأنت أستاذ لعلم الهندسة الزراعية بجامعة الخرطوم وأكيد إنك درست تلاميذك نسبة الفرق في الإنتاج عند إستخدام الـملود أو الحشاشة التقليدية و إستخدام تقنيات الزراعة الحديثة وعليه ألـم تستدعي ذاكرتك هذه الـمعادلة وأنت تتوعد صواريخ توما هوك بالسواطير ! ولا كنت مسطول عا الآخر!
ولكن عاد ما بسألك يا سعادة الـمحامي عن هذا الشرك فهل هو شرك قلوبيه ولا شرك مصنوع من سبيب ضنب الخيل ولا مصنوع من الدباره???
غايتو.! إسرائيل دي بقت ليكم زي حرامي كوستي تسرق تضرب وإنتوا نايـمين في العسل! و عاد ما بسألك يا الحرامي!!!!!
[email][email protected][/email]
يا ناس كدي خلونا من اليهود وإمكانياهتم شوفوا لينا ناس بدوي موسى ديل ، يحسبوا ساااكت في الغنائم البارده كلو يومين تلاته . ديل قاعدين في ارض الله دي وبيقلعوا حمرة عين عديييييل كده.
قال ساطور قال
ههههههههه اه يا بطني والله انفقعت من الضحك ، يأخي والله دا مقال في الصميم ويكشف حالة السطلة اللي في فيها الكيزان ديل!! بالله الناس ديل ما فيهم رجل رشيد؟!! عشان يقول ليهم الكلام البتقولوا فيهو دا بضحك عليكم خلق الله!! وشر البلية ما يضحك ، الحمدلله لك يا ربي علي نعمة العقل !ههههههههه
الزول الوحيد الصائل و الجائل وسط الشعب السوداني عمر وهو ضارب لمبة صوت ربنا يشفيهوا
شكرا ليك ولى مولانا سيف الدولة
جدمتو الزول شديد ومسحتوا بيهو الواطه
ياناس عايزين واحد بتاع كاركتيرات ذي عمر دفع الله يترجم هذه المشاهد الى رسوم معبرة
1- وزير الدفاع ابو ريالة (زرقاء السودان على وزن زرقاء اليمامة) واقف قرب الحاج آدم الذي بيده (ساطور) ويسمعوا صوت طيارة ويقوم وزير الدفاع اللمبي بتحديد موقع الطائرة (بالنظر) ويحدد انها طائرة عدو ويقوم بتزويد الحاج آدم بالمعلومات والاحداثيات وبناء عليه يطلق عليها الحاج آدم (ساطور أرض جو)
2- رئيسنا البشير طبعا يحب الخطب النارية المفعمة بالكلمات الت تغيظ الطرف الآخر من شاكلة (كلهم تحت جزمتي) و (بنطبق الحدود علشان نغيظهم) و ووو وطبعا بعد المرض (نسأل الله ان يشفي جميع عباده لأنه لا شماتة في المرض بالرغم من كراهيتي الشديده لهذه الشرمذة وعلى رأسهم البشير) الدكاترة منعوه من هذه الخطب وصاحبنا خرمان بالخطب النارية ومغيوظ من الذين يدعون عليه ويشمتون في مرضه ويتمنون موته ولذلك نريد رسم يوضح ان الرئيس جالس وكلما يقرأ مقال في النت وينفعل وداد تهديه وامامه ورق يكتب فيه خطبه رنانة من شاكلة (لشذاذ الآفاق وناس الطابور الخامس وووو انا شفيت من المرض علشان اغيظكم) ووداد تقول له يا ريس بس انتظر شوية الى تأتي النتيجه من المانية بالبراءة
3- محمد حسن الامين شايل له شرك ويقوم بنصبه فوق جوه السحاب علشان يصتطاد طائرات العدو ((زي الشرك كده))
أول حاجة قصتك (بوخها يلوي)، تانة حاجة: صفة حاج منزو دي ناس الشمال وأنا منهم قاعدين يطلقوها على الحجاج من غرب افريقيا الذين كانوا يأتوا للحج عبر السودان، ثم يستقروا في السودان، كما هو معروف للجميع، وبطول الزمن أصبحوا مواطنين فيهم الصالح والطالح كحال جميع شعوب الأرض. ولا أظن اطلاقك هذه الصفة على نائب الرئيس ، لمجرد أنه ينتمى الى جهة معينة، مناسبا، فهو من قبيلة سوادنية معروفة، ومثل هذا الطرح العنصري لا يحصد الا تشرذما.
والله ديل مافضل ليهم الي يقولو الرووووووووب واحيييييييييييييه وما دايررررررررين ! التووووووووووووووووووووووووبة ياامريكاومعليش نتنياهو ما بحلكم
يا جماعة هذه الطائرات سواطير نائب الرئيس لا تعمل لان الطائرات في الجو وأفضل شيى هو السفروق لآنه يمكن قذفة في مقدمة الطائرة
والله حلقك والا حلقومك مابيحلك. دا حق الناس واتبين فيك. صاحبي جنوبي قال لي الرئيس دا ليه عندو مرتين إلا أنا ماعندو مرا؟ ليه بس كده بس كده بس؟. قلت ليهو في راجل بيعرس مراة راجل تاني؟.. وكان قام بعاتي يودي وشو وين؟. لكن قطعت المحكمة الجنائية حلقوم كل خطيب. بعد عرفات ما مات ورفعوا الفراش! قعدوا يفتشوا في الكتلو منو؟.. الجماعة ديل ماخاتين الرحمن في قلبهم والا شنو الحصل؟
غا يتو حا ج ا دم الكضا ب المتلو ن د ة خلوة لي عند ي لية عصا ية تما م كفا ء تة ا حسن من عصا ية الغزا في و ا طول منها شو ية
دى حكومة اناتيك ساكت!!!هو انحنا عندنا حكومة محترمة؟؟؟؟؟
هو نتنياهو ده لو راجل ما يطلع معاهم الخلا ونشوف البيدق التانى منو!!!عليك الله ناس الانقاذ ديل مش اناتيك؟؟؟؟