اغنية تبحث عن ملحن ( 1 )
بين حروفى و بين عيونك
كون مودة و كون قرابة
و رعشة القلم البساسق
لى ورق ( كوفر ) كتابة
زى حنين النيل و شوقو
لى جزر ضجت صبابة
و زى حوار بين جوز أصابع
و بين حنين تلك الربابة
…………..
بين حروفى و بين عيونك
قصة طالت سرمدية
و كل نبضة ريد جوايا
تضوى زى نار التكية
و كل رعشة شوق حنينة
زى طوابى النيل أبية
و كلما اتشابت جوايا
كلمة لى عينيك هدية
الضفاف تصدح غناوى
والمدن بتضج حكاوى
وإبقى درب الريدة ضاوى
و اقعد اسمع فى عيونك
زى جنا بيسمع وصية
……..
و يا عيونك يوم تعاند
تبقى اكبر من غنايا
أفرد الآفاق دفاتر
و الرويحة تكون دواية
والزمن يفتح اضانو
و السنون زى فضة بانو
و الوجع يبلع لسانو
و المدينة تنوم فى حضنك
طفلة حلمانة و رضية
…..
مهدى يوسف ابراهيم عيسى
ابريل 2013
[email][email protected][/email]
نص جميل جدا …اتمنى يقع فى يد زول جاد …
يا سلام . فيك شى من جمال الدوش يا استاذ مهدى . يا ريت ناس حرامى القلوب اشوفو كلامك دا …
مهدي يوسف يُعيدنا الى زمن بهي ٠٠ولى راح !
هذا النص الجميل شكلا وموضوعا وفكرة واتساقا .. يناسب الفنان محمد النصر .