شبيه أحمد الصادق: المالقى شبهو…الله قبحو…!!!

الخرطوم : بكري خليفة
عندما يجعلك القدر شبيهاً باحد المشاهير تتعرض للكثير من المضايقات والمواقف الطريفة واحيانا المحرجة، وهذا ما يحدث للشاب عادل احمد عبدالله الملقب بجابر فهو شديد الشبه بالفنان أحمد الصادق وهذا جعله يتعرض لمواقف محرجة درس بمدرسة البحر الاحمر بورتسودان الثانوية وجامعه السودان، يقطن ام درمان الثورة الحارة السابعة… (السودانى) دردشت معه اسفيرياً عبر موقع الفيسبوك من محل اقامته بالامارات العربية المتحدة فماذا قال..؟؟
*متى اكتشفت انك شبيه بالفنان احمد الصادق..؟
منذ 6 سنوات اكتشفت الشبه الشديد مع الفنان احمد الصادق، وانا ادرس في جامعه السودان واحسست بذلك من خلال تعليقات الطلاب والاصدقاء وحتى فى الحي ويضيف: مشكلة الشبة دى تاعبانى شديد في السودان لكن هنا الواحد مع الشغل ومافي حفلات كتيرة تلمنى بالسودانيين ما بتعرض لمواقف كثيرة عكس السودان وذلك للشهرة الكبيرة للفنان احمد الصادق فهو فنان شاب متطور وصوته جميل بالرغم من انى ما كنت بعرفه فى الزمن داك يعنى ما كان مشهور وبعد ذلك حبيت اتعرف على هذا الشخص الذى بشبهنى.
*أحكى لنا عن المواقف الطريفة التى مرت بك فى السودان.؟
والله مواقف كتيرة فيها البضايق وفيها البضحك احلى هذه المواقف مر علي كان فى صديق لى مرسل معاي شنطة لي اهله الشنطة اتخلفت طلعت بعد 3 ايام مشيت استلما من المخزن الضباط رفضوا يفتشوها افتكرونى الفنان احمد الصادق وهذا بالتاكيد يدل على حبهم للفنان احمد الصادق، وكثيرا ما التقى بشباب يوقفوني ويسالوننى (كيف ياأحمد وكيف حسين)… ونحن من المعجبين بيكم بل البعض منهم خصوصا الجنس اللطيف يطلب ان يلتقط معى صورا تذكارية.
*متى التقيت باحمد الصادق..؟
اول مرة في حفلة في دبي وتاني التقيت به في السودان فى مناسبة زواج قابلتو معاهو محمد موسي وحسين الصادق.
*لما لاقيتو ما اتكلمت معاه عن الشبه بينكم..؟
محمد موسي بخفة دمه قال لي تعال اخلي احمد يشوف الشبه بتاعو ده والمالقى (شبهو الله قبحو) واعترف احمد الصادق فعلاً أن هنالك شبها كبيرا جداً…ومرة الفنان صديق متولي ناداني بأسم أحمد الصادق، ولما عرف الحقيقة اعتذر لي، وبرضو الشاعر الكوبانى في النادي السوداني قال لى: ممكن اسالك انت بتبقى لي احمد الصادق ولا عندك صلة قرابة معاهو..؟؟
*رسالة اخيرة توجهها لشبيهك الفنان احمد الصادق ؟
بسمع عنه انه زول انسان فى المقام الاول واخو اخوان، وانا بتمنى ليه التوفيق وربنا يوفقو ويسعد جمهورو ومستمعيه .

السوداني