تعليقات على عناوين صحف الأربعاء 14يونيو 2017م

على مسؤوليتي

تعليقات على عناوين صحف الأربعاء 14يونيو 2017م

🔹 فلنواصل الضغط من اجل :

* اعتراف النظام بوباء الكوليرا

* ايقاف قرار تصدير اناث الماشية

📰 الجريدة

🔹 مظاهرات في وادي حلفا للمطالبة بتبعية المحلية لرئاسة الجمهورية

يعني عاوزين تعالجوا المشكلة بالسبب الاساسي العملا ليكم 😳😳

📰 الجريدة

🔹 جدل في البرلمان بسبب تكفل الدولة بعلاج المستشارين القانونين

المستشارين ياتهم البستولو علي الاراضي ولا البمررو المخالفات 😡😡

📰 الجريدة

🔹 تشريعي الجزيرة يلغي قرار التربية بتجفيف عدد من المدارس الثانوية

علي الرغم من أنه لمصلحة الطلاب لكن السيء انه في إطار صراع المجلس والوالي 😬😬

📰 الجريدة

🔹 نواب بمجلس الولايات يطالبون بقرار لمنع اكياس البلاستيك

عاوزين تثبتوا للنائب البرلماني القال قاعدين ساي انكم شغالين ولا شنو 😅😅

📰 الجريدة

🔹 تحويل ملف التجارة العالمية الي وزارة التجارة

يعني حاتم السر خليتوهو عمدة بدون اطيان وشلتو منو السمينة 😂😂

📰 الجريدة

🔹 الكهرباء تعزو عدم توصيل التيار ل150 قرية بالنيل الابيض لرفض الاهالي

انتو حاولتو تدفنوا معاها نفايات زي سد مروي ولا شنو 😝😝

📰 أخبار اليوم

🔹 البشير يلتقي المبعوث القطري بالخرطوم

والله بتكون مزنوق لانو سيد دينك سيد روحك 🤣🤣

📰 أخبار اليوم

🔹 المهدي : لم أطرح على البشير مبادرة “جنتل مان”

رغم اعتراضنا حتي لو طرحتها مافي زول جنتل بنفذها معاك 😬😬

📰 أخبار اليوم

🔹 مروحيات حفظ السلام الصينية تصل إلى السودان.. الوحدة تتكون من أربع طائرات هيلوكوبتر متعددة الجنسيات

الصين بقي فيها اربعة جنسيات متين ولا دي بركات عوض الجاز 😳😳

📰 المستقلة

🔹 معلومات جديدة تكشف استمرار التجاوزات المالية بجنوب دارفور

السرقات لو سمحتو التجاوزات دي في ترقيات او علاوات الكلام دا سرقة وفساد 😡😡

📰 المستقلة

🔹 الكهرباء : الطلب المتزايد يستدعي ترشيد الأجهزة

يعني نخليها تتم 18 سنة حتي نشغلها ولا كيف 😂😂

📰 آخر لحظة

🔹 حجز 40 عقاراً وآلاف الدولارات في قضية غسل أموال

بالله خليتو الدهب والصابون بقيتو تغسلوا بالعقارات يا كمال 🤔🤔

📰 آخر لحظة

🔹 القبض على ساحر يستدرج النساء بأمبدة

ياحليلو قبضتوهو قبال يعرفوهو الوزراء والمسؤولين 😭😭

📰 آخر لحظة

🔹 البشير يعود الي البلاد بعد مشاركته في قمة ايقاد

المرة دي جاء راجع سريع مالو صحي مدير المكتب داسي منو الجوكرين 😂😂

📰 اليوم التالي

🔹 وفد الفيفا يتقص حول وجود اتحادين للكرة في آن واحد

والغريب شنو اي وزارة عندها مكتب بشتغلوا فيهو العمولات برة ووزير ووزير ظل كوز 😡😡

📰 اليوم التالي

🔹 البرلمان : الدولة تتكفل بعلاج الدستوريين والمواطن لا يجد ثمن الدواء

الدولة تنتزع علاج الدستورين انتزاعا من المواطن يابرلمان التعيين والموازنات 😡😡

📰 الرأى العام

🔹 إغلاق مراكز عزل الإسهالات المائية بالنيل الأبيض

كويس انكم اعترفتو انو دي مراكز عزل زمان كاشا قال دا كلام عزال وواتساب 😬😬

📰 السوداني

🔹 البشير : ساعون لايجاد حل للازمة الخليجية في اسرع وقت

بتحلوها بالكوليرا العندكم دي ولا بتلبسوا بامبرز وانتو ماشين للحل 😳😳

📰 السوداني

🔹 السفير القطري : مواقف السودان مشرفة ولا مزايدة عليها

لو اتلوم معاكم ببالغ لانو بالع ليهو قريب 20 مليار دولار ربعها في بنك السودان ودائع والباقي للاسرة 😂😂

📰 السوداني

🔹 بدء محاكمة أستاذ جامعي بتهمة التجسس

التحية لدكتور مضوي إبراهيم ولكل المعتقلين في زنازين النظام ✌🏻✌🏻

📰 الصيحة

🔹 غرق 18 سودانياً بالبحر المتوسط في طريقهم لأوروبا

ربنا يرحمهم جميعا مفترض نقتلع النظام البجبر شباب زي ديل يخاطروا بحياتهم من اجل لقمة العيش ✌🏻✌🏻

📰 التيار

🔹 القائم بالأعمال الأمريكي للتيار : سنظل ندعم الحقوق والحريات في السودان بكل الوسائل

ستظلوا تدعمون مصالحكم بكل الوسائل وعلي الشعب انتزاع حريته بيديه ✌🏻✌🏻

📰 التيار

🔹 متظاهرون في حلفا يقتحمون دار المؤتمر الوطني

يبدوء أن المواطنون اصبحوا يدركون تماما اين تؤكل حقوقهم ويسلب عرقهم ودمائهم ✌🏻✌🏻

📰 التيار

🔹 برلمانيون يطالبون يبسحب مخصصات العلاج من الدستوريين

والله لو سحبتو الدستوريين والبرلمان وخليتوها ساي احسن 😡😡

📰 الانتباهة

🔹 توقعات بهجوم جديد للحركات على دارفور

دحين دارفور دي انتو ووفد الاتحاد الافريقي والامم المتحدة الوديتوهم قندهار مش قلتو آمنة 🤔🤔

📰 الانتباهة

🔹 العدل : لا عقوبة للثراء المشبوه والتحلل

لما نجيب الديمقراطية والعدل ذاتو بنحاسبكم عليهم ياكيزان حساب عسير 👊🏻👊🏻

😝 بشير اربجي 😝
😝 Basheer Arbagi 😝

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق