٣٠ يونيو الأسود

٣٠ يونيو الأسود

قبيلك كنتو بتسوولو عيد وحفايل…
وهسع فيكن العار والتدسدس خايل…
البلد اللكان شماخ كرامة وطايل…
هسى مرمى جاموغه ومهورب ومايل…

قبل ما تجونا يالعار البقالنا ملامه…
كنا على الشعوب لينا احترام وكرامه…
الجيش اللكان بتدك حوافرو الهامه…
هسى مدنقد الجرتق بجيبو تمامه…

بعد عشرين سنه فوق سبعه يا المحسوره…
دمك سال بحور وكراع مشيك مكسوره…..
الكانن معاك شامخات عوالى قصورا….
يا اللسع بشيرك بفتح الماسوره…..

قبيل بتحلبو يا عمر الابوها كنانى…
ساند البو وحاكل شاة كريت بالتانى….
هسى تراك سارح بالفساد متفانى….
تحلب فى تراب بلدى وضرع سودانى….

قبيل بنقول مجاعة الحبشه والصومال…
و هسع ديلا طارن تنميه واعمال….
واته تراك يا خيبة ام رعوده شمال….
مأجر جيشنا للمابقدروك…. بالمال…..

يا البغله المباريه الخيل كفاك زليتنا…
ارحل ياخ مليناك ومغسه مليتنا…
قبل تنقذنا اريتك فى الوعر خليتنا…
بعد ما كنا فوق روس الشعوب دليتنا…

ولد سلمان هدا البديك تعليماتو…
اته رئيس وكت يادوبو تحت اماتو…
خساره عليك ها العمه وشنيبك زاتو….
شوفلك موس واحلقو ان ماك قدر كاراتو….

قبال كان نقرر والشعوب بى ورانا….
من عن فاس ولا عند الخليج تبرانا….
هسع سيتنا للدول البقت بطرانه…
زى عنز المحل اخر المراح فترانه…

يوما تابع السيخ ومره عبد الشيعه…
حد ماليك اضينه مع الرجال وتبيعه…
ياخ وكت اصلو بايعنا ومسيها زريعه…
اتقل فى العروض امكن تغلى البيعه

السايمو بصلات فى سويق قوز بره….
بعرض حبه واحلف هن عقاب الصره….
الا تراك يا كيشة الملوك يا عره….
لاعبنبك جهال ساكت كتابه وطره….

السودانى عزة نفسو كانت سيمتو…
القاضى المهندس والبراشى بهيمتو…
سنين عازنو فى البلدان ورافعين قيمتو…
لامن جيت تمهزلبو وهدمته قديمتو…

قبيل عمتنا فوق راس العقال والتاج….
واسى وجوهنا اسود من رماد الصاج…
حكمكن جوه حكم النازى والحجاج…
وبره تقعدو بينات الاسوده نعاج….

مره يرسلولكن شافع استقبلكن…
ومره يقولو ليكن شوفو مستقبلكن…
بدل ها الزله ولا المصرى يستهبلكن…
كان تتغتو بالستره وتقعدو قبلكن…

كل الماضى حافظين يالرخيس اخبارو…
فى الاكلونا فى الغشونا لفو ودارو…
قبالك كتار حكمونا ظلمو وجارو…
لكن حفظو للوطن العزيز مقدارو…

كفاره وسلامتك يا بلد محنانه….
حاكمنك خيابه ومرجفين وخيانه….
واقفنلك صفوف للمويه بالجركانه….
بلد النيل بقت تصحى وتنوم عطشانه….

يالسد البنوك بى مال ربا وجربندى….
هسع وقفو ديانتك خليجى وهندى….
الصينى البناك جبهة خزلتك تندى…
ايها زول يقول مرهون ورقتك عندى……

القطرى السعودى والكوايته معانا….
واقفنلك صفوف اتناترو الديانه….
بعد رهنوك جميعك يابلد ورطانا….
هسى املصو منك وقالو ما همانا….

الدين والوطن وشريعة الاسلام….
مرقن ونسه ساكت يا وجيع وكلام…
الباعو الكتاب واتدرعو الهدام….
ما بخلوك تتطور تمش قدام….

الدقن التبيع دينها وتعبد المال….
ما بتبنيلها امه ولا بتعدل الحال…
ديل حراس رزق فسده وبواقى رجال….
سرفو بلدنا بالمغسه وملوها ضلال….

يوم البعث ياالفسدة الظلم مدحور…
وين تندسو لاملجا ولا فى جحور …
شغلتو الشعب بالجنة وبنات الحور …
وعطشتونا فى سهلة وتلاتة بحور …

قالو الثوره نحنا وقالو نحنا انقاز…
والطاقات بدشرن بالسدود والجاز…
وعود تعليم وصحه وكل يوم انجاز…
وهسى مرقنا ساكت لا فحم لا غاز….

ليه ما سمعتى يا بلد الغوالى حديسى….
قبل تنزلى من هادا التقولى رئيسى….
انت تراك تعببرى فى المغيس وتقيسى…
واحنا رمانا للحبشى وكلاب السيسى….

مادام حاكمك الديوثى هادا الخايب…
تشبعى فى الهوان كل يوم تشوفى نصايب…
ديشك فى اليمن فاتك مأجر غايب….
ما خساهو فى الفشقه ام دموع وحلايب…

نحنا ترانا هسى بعاد غسب من دارك…
الا قسمته فى الغربه بنجيبلك تارك…
قبيل فوق صحه كنا فداكى واولاد كارك…
وهسى تشوفى حد قدرتنا نوقد نارك….

يا من قت بجيب عبدى ان بقيتا دعانى…
براك. شايفنا ياجبار نئن ونعانى…
انا والمظاليم و كل اضان سامعانى…
ندعوك بالسكات والوجعه فيها معانى…

من سيد فكرة البلوه ونوايا الجانى…
واى عميل وخاين مستبد كيزانى…
النار البتاكل الزول وتطلب تانى…
تبقالهم مطامح فى ام لهيب وامانى…

محمد الحسن ابنعوف
فيسبوك