بلوا رأسكم

بلوا رأسكم

أسماء الجنيد
[email protected]

الوقعت في رأس قوش وكشحتو بره الحوش
حوش القصر الجمهوري ، وريحتو من البرطعة مع رفاقتو ، وقعة كبيرة خلاس.
وقطع شك جاية على البقية بالدور ,
دحين بلو رساكم من طرف يا اللسة بتبرطعوا في القصر?? كلمناكم قلنا ليكم اتقوا شر ابو العفين,,
نافع ده لامن يبرق عويناتو اختوه يا أخوانا، ما بكون راقد على أمان ضمة ,
كل ما يلبد كده بكون بدبر ليهو في نصيبة لي زول .
اها الضحية المرة دي كان قوش.
إن ما شالوا ما ارتاح ابو العفين ، ردح وردح وردح للبشير في صنقورو لامن كشح قوش برة الحوش .
اها البقية الدور جاييهم من طرف , ما يقعدوا يتلفتوا ساي ويرقدوا على أمان..
وانت زاااااتك يا ابو العفين ,, ما تقعد تقنطر في الناس وتشوتها ضفاري,
ما دايمة ليك يا اللخو ,, وحات الله بجي اليوم التقعد تطقطق في اصابعينك لامن تطبقها لحيمات برا عضم ولا مفصل..
وكلووووو من عمايلك البتشبهك . وطمعك وظلمك الفات حدو
اها قوش قالوا حميتوهو السفر لي بورتسودان ..؟؟
مالكم خايفين منو ولا خايفين عليهو ؟
يا اما كمان خايفين منو يقوم يعوم ويختر بالبحر لي جدة
ويعملا عمرة وزوغة، وزوغتو طبعا بتكون معاها جراب الحاوي الملان بلاوي ,
آآي النعمنو كان ببرطع معاكم و وسطكم في القصر الجمهوري ..
معقول ما يكون ضاير ليهو شيتا جاي ولا جاي؟؟
قطع شك ملأ عبو وقام سداري . الشوتة دي بكون متوقعها وعامل حسابو يخمش ليهو شوية فتنة ترمي رفاقتو الكان وسطهم وما بخليها تعدي ساي. ، وعليا وعلى اعدائي .
والشيء الضايرو ده ، اكيييييد بغتس حجر زلطكم كلكم جت من طرف,,
واما كمان لو خايفين عليهو من بورسودان البقت هملة لليهود يضربوها زي ما دايرين ويرجعوا قواعدهم سالمين تامين , وكمان ضاحكين في البلد الهملة والحيكومة بت الهرمة.. ده يبقى شيء تاني
لكن النكلمكم كان لي قوش اليهود بالنسبىة ليهم صيدة سمينة خلاس , وسحارة ملانة درر وجواهر , يقايضوا بيها ناسنا الهنابيل ديمة تنابلة السلطان الهمهم كروشهم المتندلة والدولارات الفي البنوك, ما بحسبوها صاح . عشان كده لامن تجيهم واقعة , بتقع تااااااااااخ في نص النافوخ تخليهم يتلفتوا زي طير الرهو ما خابرين رأسهم من كرعيهم,,
اليهود المرة دي كان جوكم ما بضربوا قوش المكشوش , بلقطوهو في كريعاته زي الصبرة . ويحنكلوه ويشيلوه بي جرابو ويطيروا بيهو ويتلبوا في تل ابيب محل بنوم الدبيب وبنقطع النصيب .
اها ومن هناك هيلا هوب علي امريكا ,, ودفتر طالع ودفتر نازل ,, والبرطعة الفي القصر هنا ,
بتعادلا برطعة دفاتركم هناك في البيت الأبيض . شفتو الحال والنعيم ده كيف!!!
اها بدل مو البشير براهو المطلوب في لاهاي , يزيد الكوم وتتملي المطمورة ربوب وخبوب معفن.. الله ليكم يا ناس لاهاي من الفطيس الجاييكم , علا تسولوا سجن تحت الواطة ، لازمو بير غريقة وغفيرها رجل آلي, زولا كدي بي لحمو وشحموا ما بتحمل النصائب الجاياكم ضمة ,,,
وطبعا دي بتعجب البشير الختير , يا حليلو بدور الونسة والرفقة والحكاوي ، ما بدور الوحدة والغربة في بلد الخواجات العجم ,, هو زااتو ببقى اعجم بعدما يدوهو خبتتين في نص صنقورو, ببقى يبرطم ساي زي برطعتو الكان بسويها في القصر الجمهوري,, وقطع شك بيأخدلوا رقصة رقصتين يحت الشرا الخاميهو في قفاهو من مصايبو الكتيرة ,,
اما ناس ابو العفين ورفقته الميمونة الونسة الكنتو بتونسوا بيها ابناء الشعب المسكين في بيوت الأشباح
بتضوقوها ونسة هناك مجيه ومصلحة وبالطريقة الخواجاتية كمان , صوت عنجهم زااتو مو زي صوت عنجنا حق بيوت الأشباح..
هناك بمحطوا بالكهرباء , طاااااااخ دي ما بتجي في الضهر براهو , بتجي في نص النافوخ
تخلي العيون تحوص , والخشوم تريل .. و الجكة تحصل والروح تتشحتف وحاجات تانية كتيــــــرة بتتنهز تمرق لا برة ,
ده غير الهلوسة , وتكبيرة النفاق الكنتوا بتسوا فيها هنا دي , هناك بتنقلب وبتبقى (بريك دانص )
يعني الواحد يقعد يتحرقص في الجو براهو ,, شي مشابحه ، وشي مهابشة في الهواء,
والعجب الجرسة , عاد تتجرسوا كيفن بالإنقليزي !!! دي عوجة كبيرة خلاس ,
لو جابوا ليكم ديكشنري في الحبس الإنفرادي برضو بتفضحونا وتشرطوا عينا..
كدي يا اخواني ناس الترجمة الليلحقونا بي ترجمة الجرسة المتوقعة ادناه ويرسلوها لي سريع في الإميل عشان انزلا في الجزء التاني كان الله هون ..
يعني ابو العفين ده كان قام سوا كضبوا وجرستو وزوغانو من الريس داك بالإنجليزي لي ناس اوكامبو بقول شنو بس ؟
حرررررررررم وما مني وعلي بالطلاق ده ياهو اب فاخورة ريسنا ده . كان دايريني احلف ليكم بي اي شيء بحلف، وبكب ليكم الفي جراب الحاوي كلو وبفضح ليكم ناس شيخ على ومن لف عمتهم ,, ويا روح ما بعدك روح ..
اها والبشير يا حليلو نلقاهو خلاااااص الفيهو كملت
ويهابش في التلج في بلد التلج,, ويقولوا ليهو درجة الحرارة صفر,, يقول ليهم خلاص خلوني النمد راسي بي طاقة الزنزانة ,, بدور ابرد شوية .. ويتوحوح بالإنجليزي كيف ؟؟ والله دي ورطة معتبرة بالحيل ,,
التسوي بي ايدك يغلب اجاويدك.. والبزرع الشوك بحصد الضريسة
دحين يا الضيقتوها على خلق الله , وجبتوا الفتنة وقسمتوا البلد نصين ,جاتكم الدائرة وبدت الفتنة فيما بينكم ,
والحكاية جابتلها جز عديـــــل وزيانة بي فرامة مصدية ,
دحين بلوا ريسنكم كلكم , الحلاقة راجياكم , وجاياكم جاياكم مافي مفر
خسوووسا بعدما سمعنا إنه قوش اخدلو هبرة لا برة البلد , يعني قدر يتخارج مش لي بورتسودان بس!!
لي ابعد منها , القرش الما طاقيك فيهو حجر دغش بسوي اي شيء وبشتري الزمم ,
لكنو كان لحق و مرق صحي صحي ، وحات الله دقستو لا أكلت لا شربت , الله عامي بصيرتو بي حق الظلمهم ويتم وليداتهم غير العذبهم في بيوت الأشباح..
منو البلد البتمسك ليها بلوة زيو وقاتل هارب ؟؟, ده لو ما سفروهو طوالي لي لاهاي .
يجهز باقي الحجوزات لي الريس وابو العفين وباقي الشبيبة التانيين
شفتو الجز ده كيفن ؟؟؟؟
حلاقة مارينزي يا اللابس الجينزي ,, دقر العين
يمهل ولا يهمل
ودعتكم الله