قائد منشق يبدأ محادثات مع جنوب السودان

اها يا ناس المؤتمرنجيه تصريحات مسئوليكم الحبتنجيه ديل بخصوص طرد الجنوبين من الشمال بعد الاستفتاء , كشفت خباياكم كلها حتى اللى كنتو متكلين عليها من خططكم التخريبيه برضها انهارت تماما . بسببها حتى الجنوبين بتعون حزبكم فروا منكم و إلتقوا بالحركه الشعبيه و ناس المليشيات الجنوبيه اللى كانت تابعه ليكم و انتو كنتو مخططين تلعبو بيهم فى الفتنه الداخليه لاشعال الحروب بين الجنوبين و اللى بسببهم اتماطلتو فى تطبيق الاتفاقيه على اساس انو الجنوبين ديل لو انفصلوا ح يدوروها بيناتهم و ح يستنجدوا بيكم عشان كدا ما ح يسوطوا للانفصال خشية من الحروب الاهليه , برضو دا كلوا فى ليله انهار تماما و الجنوبين كلهم بما فيهم الموالين للمؤتمرنجيه فروا الى الجنوب و بيتوددوا على سلفاكير عشان يعفيهم و يقبلهم عشان ما يتشردوا بعد الاستفتاء . لكن حكمة و سياسة الحركه ظهرت فى قبولهم كلهم و العفو عنهم كلهم حتى الناس اللى اتسببوا فى قتل عشرات المواطنين الجنوبين و كانوا مطلوبين للقبض عليهم كمجرمين امثال قوبريال تانك و غيرهم بس عشان يكون فى سلام . و الجميع من الجنوبين المعارضين للحركه الشعبيه هرولوا الى الجنوب بعد اقل من اسبوع من تصريح السيد سلفاكير بالعفوا العام . و هم اصلا ما اترددوا فى الذهاب لأنهم عارفين تمام انوا سلفاكير ما زى ناس المؤتمرنجيه اللى يوعدوا و يكتبوا الاتفاقات و اول ما يضمنوا انو الناس وثقوا فيهم يقوموا ينقلبوا عليهم و ينكروا كل شئ , عشان كدا مشو على طول . يبقى يا ما مؤتمرنجيه وسائل اليات الفتنه اللى اعتمدتو عليها انهارت تماما , يبقى شوفوا غيرها . …..

و انا احكى ليكم قصة قبريال تانك اللى استخدمو ناس المؤتمرنجيه و عملوا بيهو فتنة فى احداث ملكال بتاعة سنة 2009 اللى ماتوا فيها العشرات من الابرياء , و انا كنت فيها شهود عيان و عاصرت المشكله دى والله ستر ما رحت فيها زى باقى الابرياء بعد قذيفة الهاون اللى مرت جنبى . دا عشان على الاقل تعرفو اساليب الناس ديل كيف فى اشعال الفتن …. فقبريال تانك دا قائد بتاع مليشيا تابعه لناس المؤتمرنجيه فبعد ان عمل الفتنه الاولى بتاع سنة 2006 و هربو الى الخرطوم اخذ ليهو فتره فى الخرطوم و فكر يبيع البيت بتاعو اللى فى ملكال عشان تانى ما ح يقدر يرجع ليهو فكلف واحد من ضباط الجيش الشمالين برتبة عميد كان صاحبو من زمان عشان يبيع ليهو البيت و يرسل ليهو القروش الى الخرطوم فقام الضابط دا باع البيت و رسل نص القروش بس ليهو و قال الباقى الزول اللى اشتراهو ما ادانى … و لسوء حظ الضابط الزول اللى اشترى البيت جاء الى الخرطوم فلاقاهو قبريال تانك و طلب منو باقى القروش بتاع البيت فحكى ليهو الزول انو القروش كلو استلموا صاحبو فى ملكال , قام اتصل بيهو و قال ليهو الزول اللى اشترى البيت معاى هسه و قال القروش كلو معاك , فرد ليهو الضابط انو القروش الباقى معاهو و لو داير قروشك و راجل تعال شيلهم بنفسك …. قبريال قام اتحمق و ركب اول طياره ماشه الى ملكال و لامن وصل ملكال و ناس الامم المتحده المتواجدين بالمطار منعوه من الدخول الى المدينه بسبب الاحداث بتاع 2006 اصر عشان يخش المدينه و لامن الخبر وصل لقوات الحركه الشعبيه اتحركت كتيبه منها بقيادة بيتر قديت و اصرو ان يلقو القبض على قبريال بالمطار .. هنا فى المطار لامن قبريال تانك ضايقوا جرى و انضم لبعض من جنودو كانوا منضمين ضمن القوات المشتركه اللى كانت تحمى المطار و اخد ليهو دبابه تابعه للقوات المشتركه كان بداخلها افراد من مليشيتو فاشتبك الاطراف بوابل من الرصاصات و جميع انواع القذائف بما فيها اشتباكات بالدبابات . الامر كان ح يكون اسوأ مما يتصور لولا تدخل نائب رئيس حكومة الجنوب رياك مشار الذى اتسم بشجاعه منقطع النظير و جاء على طائرة هليكوبتر و نزل بيهو فى ملكال رغم تحذير قوات الامم المتحده من خطورة مجيئه وسط ذاك المعارك الضاريه … إلا انه اصر على النزول فى ميدان يتوسط الاطراف المتقاتله و اللى سهل عليهو انو الاطراف كلهم كانو من نفس قبيلة السيد رياك مشار و هى قبيلة النوير فقد استطاع بلغة القبيله مخاطبه جميع الاطراف حتى اوقف المعارك . و قام بتهدئة قائد كتيبة الحركه بيتر قديت الذى كان اقسم بعدم الرجوع بدون رأس قبريال تانك … و المدهش ان بيتر قديت هو ابن اخت قبريال تانك زاتو . و سبب كرههم لبعضهم البعض بهذه الطريقه انو ايام حرب الجنوب لامن بيتر قديت انضم للحركه الشعبيه و اخته اللى هى والدة بيتر قررت الالتحاق بابنها فى الحركه فقام قبريال تانك قتلها فغضب بيتر غضبا شديدا و بدأ يدور عليهو فما لقى إلا نساوينو فقام قتلهم انتقاما لوالدتو و من داك اليوم اتولدت هذا النوع من الكراهيه بيناتهم . المهم فى خلاصة القصه دايركم تشوفو المؤتمرنجيه ديل شغالين كيف و بيشعلو نيران الحروب كيف !!!!!! اللهم انا نعوذ بك من الفتنه و من سفك دماء الابرياء بغير وجه حق و نستبرأ مما فعل هؤلاء فى الجنوب و فى جنوب كردفان و دارفور و حتى فى بيوت الاشباه فى الخرطوم …