حديث المدينة
عشرة .. صفر.. و(فرحانين)!!
عثمان ميرغيي
لم أتوقع حجم ردة فعل القراء على ما نشرته أمس في حديث المدينة.. (طيبة) قلوب القراء وحسن ظنهم لم يعد يتحمل مثل هذه الفواجع.. وللذين لم يقرؤوا العمود أمس، اختصره لهم في أني رويت قصة ثري عربي تبرع لتشييد مستشفى لعلاج الفقراء في السودان . ودفع .. ودفع.. لثلاث سنوات.. وعندما وصل السودان بعد تلقيه دعوة حضور حفل الافتتاح فوجئ بأن المستشفى الذي دفع فيه ملايين الدولارات.. لا يستحق أكثر من لقب (شفخانة)..(لمواليد 1980 وما فوق: الشفخانة هي عيادة فيها حجرة طبيب واحدة ملحق بها صالة فيها الممرض.. وعلى جانبيها مسطبتين مبنيتين من الطوب ليجلس عليهما المرضى) والحقيقة.. أن القصة تكررت أكثر من مرة.. يتغير المشروع والمتبرع.. والنتيجة واحدة.. تشبه تماماً (الكاميرا الخفية).. رجل جاء إلى المطعم وسلمهم خروف ليذبح ويشوى كاملاً على أن يأتي في المساء لاستلامه لوليمة العشاء التي دعا لها أصحابه.. عندما وقف أمام موظف المطعم (وهو الممثل الخفي للكاميرا الخفية) .. سلمه دجاجة مشوية.. ثار الرجل وقال له أين الخروف؟ كان موظف المطعم يرد بكلمة واحدة أدخلناه الفرن لكنه خرج (دجاجة).. يا أهل السودان .. أنتم بالحساب .. من أغنى بلاد وشعوب العالم. ولكن في الواقع أنتم الأفقر.. وكلمة السر هي (المصلحة الخاصة.. التي تعلو على المصلحة العامة).. انظر حولك في أي مشروع .. دائماً عقدة الفشل فيه. أن القائمين عليه تحزموا بمصلحتهم على حساب مصلحة الوطن .. والنتيجة سقوط مريع.. هل أعطيكم بعض القصص أم نتركها حتى لا أجرح شعوركم.. على كل حال.. وأنت نازل من الكبرى.. انظر على يسارك.. على مسؤوليتك.. النظرة الأولى لك والثانية عليك.. لاحظوا جيداً وافتحوا أعينكم لحفلات الافتتاح.. افتتاح أي مشروع.. يكاد نكون نحن البلد الوحيد ? وأحلف على ذلك ? في العالم الذي (يحتفل!! كل يوم .. وضع حجر أساس.. تدشين.. افتتاح.. ولو حسبت بكل بساطة ما ننفقه في هذه الحفلات تكتشف موضع (الثقب الأزرق) الذي يمتص مواردنا ويجعلنا شعباً من الفقراء.. وليس المشكلة في حفلات الافتتاح في حد ذاتها.. لكنها أغلى ثمناً من المشروع نفسه.. كتبت مرة أنتقد حفلاً سنوياً تقيمه الحكومة.. اتصل بي المسؤول عن الحفل وقال لي بالحرف: (مالك علينا.. نحن نتنتظر هذا الحفل من سنة لى سنة.. عشان نعيش منو..) حفل واحد يعيش منه لعام كامل.. أحسب كم حفلاً في اليوم .. كم يهدر فيها من المال.. ثم بصراحة أسألكم: لماذا من الأصل نحتفل.. هل رأيتم صورة الفريق المهزوم عشرة صفر.. عندما يدخل مهاجمه الهدف الأول لا يخلع الفانلة ويجري نحو المدرجات.. رغم أنه هدف وجميل للغاية.. كل الذي يفعله يجري نحو الشبكة و يحمل الكرة ويجري بعدها بسرعة لدائرة السنتر ليكسب الوقت .. فالنتيجة بعد الهدف لا تزال عشرة ? واحد. لماذا نجري نحن ? في كل مشروع نفتتحه – نحو الجمهور ونخلع الفانلة.. رغم أننا مهزومين عشرة صفر..!!
التيار
تعبير مصلحة خاصة ومصلحة عامة غير مناسب تماما,, فهل يقال للذي يسرق وينهب ويأكل أموال الناس بالباطل انه قد فضل مصلحته الخاصة علي العامة؟؟؟؟؟؟؟
ما تتكلم زي الناس ولا اسكت , الكلام الزي ده هو سبب البلا في السودان. المزج بين الحق والباطل الصاح والغلط الاسود والابيض أو بي بساطة , النفاق.
استاذ عثمان لماذا انت دائما تعاين في الفيل وتطعن في ضله ,,,
سبب بلاوي السودان واضحة وضوح الشمس والشعب السوداني فيها مغلوب علي امره ,,,,
السبب هو رأس الهرم في النظام الفاسد انتم دائما ما تصورونه بصورة الغلبان الماجايب للدنيا خبر وكل فساد النظام مستمد منه ,,,رأس الهرم هو البشير ونظامه كله نظام فاسد لا يمكن معاجة فساده او اصلاحه الا بالبتر ثم الحرق ثم الرمي في مزبلة التاريخ لكل من شارك فعليا في جريمة هذا البلد ,,,,
انتم كصحفيين عليكم ان تضربوا بقوة وبصورة واضحة وعليكم ان تحرضوا الشعب لكي يكسر الخنوع والخضوع والسلبية ,,,,
مجمع النور في كافوري يمكن يكون مثال واضح لقصتك التي لم تفصلها ولم تفصل ابطالها اللصوص والفاسدين مجرد مثال انفق فيه ملايين الدولارات لكي يصلي البشير في جامع vip لا يشبه كل جوامع السودان العتيقة ,,,,مع انه مستشفايتنا الحكومية غير مهيئه لاستقبال الحيوانات الاليفة وعلاجها ?????
عذرا استاذ عثمان انت كما الدرويش في الحلقة لا يفهمك القوم ولا تعرف انت ماذا يريدونك ان تفعل في الماضي كان السوداني يتركه السعودي بمتجره لوحده ويأمنه علي بيته لا خيانة ولا سرقة وكان السوداني ملء البصر والسمع والان يختشي اي منا ان يقول لك انا سوداني يا اخي كل المستثمرين هربوا من هذا البلد لينفدوا بجلودهم وبرضوا نحن الذين اسسوا الاتحاد الافريقي اول من ارسل طائرة لمطار هثرو ونجن الساس ونجن المحجوب والمهدي ان شئت وفي الدين ما بنتلحق ما اظن نتلحق يا سلام "
قروض ربوية ما مشكلة لنستغفر " اي والله نستغفر بس ومن يغفر الذنوب الا الله لا يغير الله ما بقوم حتي يغيروا ما بانفسهم
والله المستعان وعليه التكلان
اخر زيارة لعمر البشير للاقاليم كانت وين؟ المهم اتخيلو معاي كام واحد من الكيزان و المنافقين الانتهازيين المعاهم لقفوا فيها (؟)
برضو ياشيخ عثمان ما وريتنا الدستوري الرفيع الحضر حفل الافتتاح وقلنا ليك كان دا ود الخضر عليك الله اسالو عمل شنو للزول الماانتحر رجع ليهو كشكو واولادو الطشو؟
يعنى كلامك حق امبارح كضب وخيال -ياخ البلد فيها حكاوى كتيره وسرقه بالنهار أمشى حقق بدل ماتقعد تألف لينا –
الدولة الفاشلة التي لا تقدم لمواطنها الا السراب ، اكثر من عشرين عام و نحن " دولة عظمى" بالكلام و حكومتنا " حكومة الانجاز و الاعجاز" برضو بالكلام … و رئيسنا يرقص بالكلام … انجازاتنا احتفالات و تدشين لمشاريع الوهم و بطولاتنا حفلات و رقيص لبيع مزيد من الوهم ….
كلما كثرت الاحتفالات قل العمل … و كلما كبرت الحلاقيم صغرت النفوس …
الحكومة تبيع الوهم للشعب…..
للاسف الشديد بعض من الصحفيين يلعب على حبلين حتى يكون في مأمن كما يعتقد وابو عفان من امثال اولئك الصحفيين ما عاوز يوضح للناس هل هو مع اهل العريس ولا مع اهل العروس ؟بس نحن عارفين
والصحفي الصادق لابد ان يكون مع الحق ويقول قولة الحق ولو عند سلطان جائر كسلطان الكيزان المتحكم في شؤون البلاد والعباد.لكن نقول لهم!!
مضى عهد مضى ليل **** وشق الصبح استار
فلا زل…. ولا قيد **** يكبلنا ولا عار
نصون لارضنا استقلالها *** ونعيش احرار
عثمان قول كـــوع …. اذا قلتا كـــوع و الله انت ما عندك موضوع
رأيك شنو ياعثمان فى كلام الحامدى صحى انت كنت بتألف من رأسك ساى ولا خايف ولا أقول أمكن أنا الماجيتز
قال تعالى ;( لله أعوذ بالله من الشيطان الرجيم بسم الرحمن تبت يدا ابي لهب وتب ما أغنى عنه ماله وما كسب سيصلى نارا ذات لهب وامراته حمالة الحطب في جيدها حبل من مسد ) صدق الله العظيم …………………………….. الاخ عصمان أقرأ هذه السورة العظيمة عند النوم
الاستاذ عثمان لقذ لمست السبب ا لرئسي لتخلف بلادنا وهو تقديم المصلحة الخاصة على المصلحة العامة وفي كل المجالات وخاصة السياسية والاقتصادية فكل من يكلف بمشروع عام فكر اولا في مكاسبه الخاصة وتروي طرفة ان احدهم زار صديقه ووجده يسكن في قصر منيف رغم انه يعلم حاله فساله من اين له هذا فقال له اتري ذلك الكبري فقال له نعم اراه فقال له سيخة هناك وسيخة هنا فحفظ الرجل الدرس وبعد فترةزار الرجل صديقه فوجده يسكن في قصر اكبر من قصره فساله من اين له هذافقال له اتري ذلك الكبري فقال له لااراه قال له كله هنا0
ولو ما إحتفلنا بى كل مشروع نفتتحه كاروشة رقيص زولكم ده البحكها ليه شنو؟
انا حاليا في جدة هل تصدق انو تم بناء كبري في تقاطع يضاهي كبارينا عامة وتم الافتتاح علي يد عريف في الشرطة عن طريق ازالة الحواجز من الطريق
والله ما كانت مفاجأة ولكنك عاوز تختنا تحت باطك ..المفاجأة يا أخي هي أن يكون هناك مسؤول نظيف
أتحداك طلع لي واحد ما طالته تهمت فساد ..
نبدأ من منو … وزير الدفاع الكان وزير داخلية الكان شنو وشنو … قضيته معروفة
وزير المالية .. بعد ما أحبطنا .. أهو الآن يوزع الفلوس شمال ويمين بعقود ومن غيرها .
وزير الزراعة … أهو جايبن ليك خبروا ..
نافع … شفتو قصره … بالمناسبة نافع ده شغال شنو …
قوش الكان مستشار .. أسألوهو من العمولات .. مع الله يرحمه الصحفي صاحب الجريدة الكانت معارضة وبقت موالية ..
وكان جينا للأسر .. نسكت ساكت .. معقول يا عصمان ما عارف حجم الفساد وصل وين .. ولا أنت زي جحا .. مادام بعيد عن جريدتي ما لي دخل بيه .. ولما وصل جريدتك ما دام بعيد عن مكتبي ما لي دخلي بيه ..وأهو وصلك قوووووووووول الرووووووووب
القصة بها بعض الثقوب التى لا تتفق مع ما نعرفه عن الخليجيين. هؤلاء مهما كان ظننا فيهم الا انهم يتمتعون بخصلة نادرة اختصوا بها دون غيرهم من المسلمين هى الحياء و التى قال عنها نبينا صلى الله عليه و سلم عنها هى شعبة من شعب الايمان . و دونكم اسامة بن لادن فى الفترة قضاها فى السودان مثالا للتواضع . فالذى ذكرته من تصرف لهذا الرجل يتفق مع صورة السودانى اكثر من انطباقه على صورة الخليجى . فطالما المسالة قصة اريد بها التعبير عن واقع الحال . ارجو تغييرا فى خاتمة القصة لتقول ان الرجل قال فى سره انا لله و ان اليه راجعون وانه اكمل مراسم الافتتاح الى النهاية و انك علمت منه ذلك بمحادثة تلفونية لوجود معرفة بينكما
قال أية الجبهجى(((لم أتوقع حجم ردة فعل القراء على ما نشرته أمس في حديث المدينة.. (طيبة) قلوب القراء وحسن ظنهم لم يعد يتحمل مثل هذه الفواجع..)))
روح دهية تاخدكم ونظامكم الفاشى
قال صحفى
والله اموت واعرف انت شايت وين ؟ ياخي والله عزبتنا وبعدين جنس النقد الناعم هو فعلاً (safe side) بالنسبة ليك ولكن اها لما الكشة تقوم وتنجض اوعك تجي تحرف لينا كتاباتك !!!! اولاً: في اسلوبك حقائق لكن مطلية بالمديح المبطن وانت معارض وما قادر تقول بتتغزل فينا من طرف خفي والحقبقة لي الله ما بقدر اقول عنك كوز …. ياخي خليك مصادم ………………….الله
ياوحدوي
الراجل قنع من خير ود الخدر (الوالي الذي لا يظلم عنده احد ) واللعب اليومين ديل في ميدان ( المؤتمر الشعبي )
كدي اقرا حوار الترابي المنشور في اجراس الحرية ( منشور برضه في الراكوبة تلقاهو نفس الموضوع …..
الراجل حربوية يعني لو واحد شيوعي بكرة نطة علي السلطة تاني يوم تلقى اخونا ود ميرغني لابس ليه تيشيرت احمر فوقه منجل معقوف …فلا تستغرب يا اخوي دا حاله من يوم ما عرفناهو …..
اذكركم بالمناسبة دي بحفل افتتاح صهريج الحتانة …. بعد الانتهاء من الاحتفال الكبير الحضرو محافظ كرري وجمع غفير من المسؤولين قرروا ملء الصهريج بالمياه لم تمضي الا دقائق حتى انهار الصهريج تماما …ولولا لطف الله باهل الحتانة الحضروا الاحتفال لكانت كارثة كبرى … طبعا الموضوع مر مرور الكرام لا محاسبة ولا يحزنون …… اخشى ان يكون المشرف علي المشروع هو ذاتو المدير الحالي للمياه … فقد تعودنا هذه الافعال من الانقاذ حقت ناس اخونا عثمان ميرغني …… يعني اخونا وزير الداخلية عمل اخوه مقاول لكل منشاة الشرطة ولما ظهر الفساد وانهارت المباني قرروا ترفيعه ليكون وزيرا للدفاع …. ولا اخونا احمد هرون الكتل الناس في دارفور لما المحكمة الدولية طالبت بتسلمه قرروا تعينه واليا لجنوب كردفان …… حقيقي الاستحوا ماتو ا والناس ديل ما قاعدين استحوا وعينهم قوية ….
يا من تقول ان الخليجيين يتمتعون بالحياء؟! .. الاتستحي .. هل الجلافة من الحياء؟! .. هل التكبر والجفاء و العنصرية من الحياء؟! .. بل انت من الذين لديهم عقدة نقص تجاه الاعراب
نحن شعب موهوم يعشق التخلف وتأكيدا لذلك اذهب إلى معصرة .. بعد أن يسف سفة يشمر ويدخل يده في حلة الليمون ليسوط السكر ! اذهب غلى العيادات الخاصة لترى التخلف وفي أي مكان ومع ذلك نحن نتوهم أننا خير البشر وأعلم البشر وبذلك فقدنا الإحساس للتعاطي مع قضايانا الملحة .. دارفور تتحول إلى مقبرة جماعية ونحن صامتون .. ثلث مساحة الوطن تذهب مع الريح ونحن صامتون .. والشرق يئن ونحن صامتون حلايب وشلاتين ونتبرع بالمليون لأننا …وهم وحكامنا وهم ……..عندما يرقصون نطرب لاهتزازات الأرداف فلماذا لا ندعي الشطارة ونحن أغبياء.. فورت دمنا يا عثمان
امس مساءا كتبت تعليق على مقالة الاستاذ ده (( يا شعبى المكتول كمد)) و ما نزلّـتو يا ناس الراكوبة لعل المانع خير؟؟؟؟ طلبت فيهو من هذا الكائن يبقى عنده شجاعه و يتكلم بصراحه و يضع النقاط على الحروف على الاقل بالاختصارات تفادىا للملاحقات القضائية…..مثال الزول بتاعو دا هو طبيب لواء تاجر سمسار ولو متخيّل اننا ما حنفهم ممكن للاحتياط يقول ومدامتو لواء (لوائين ضمّاهم غرام) دى مقتبسه من اغنية الفنان مولانا سيف الدولة …و بالمناسبه براهو بخشمو قال قبل كده انو مشى للخليج و جاب مستثمرين .
و اليوم اطل علينا يـغـمّـنـا تانى ..و الله لما قرأت اول سطر من كلامو قلت فى نفسى خلاص عثمان راسو جا…تصوروا كلامو
(( لم أتوقع حجم ردة فعل القراء على ما نشرته أمس في حديث المدينة.. (طيبة) قلوب القراء وحسن ظنهم لم يعد يتحمل مثل هذه الفواجع ))………
طيعا فهمت انو داير يستغفلنا ….و بعدين كلامو حق امس وشوفو كذبو المنافق (( وللذين لم يقرؤوا العمود أمس، اختصره لهم في أني رويت قصة ثري عربي تبرع لتشييد مستشفى لعلاج الفقراء في السودان . ودفع .. ودفع.. لثلاث سنوات.. وعندما وصل السودان بعد تلقيه دعوة حضور حفل الافتتاح فوجئ بأن المستشفى الذي دفع فيه ملايين الدولارات.. لا يستحق أكثر من لقب (شفخانة)..(لمواليد 1980 وما فوق: الشفخانة هي عيادة فيها حجرة طبيب واحدة ملحق بها صالة فيها الممرض.. وعلى جانبيها مسطبتين مبنيتين من الطوب ليجلس عليهما المرضى ))) ……..
دا زوّدا شديد……يا عثمان….. يا تبقى عندك الشجاعة زى الصحفى الواجه وزير المالية بشجاعة يا خليك مدير ساكت !!!!…هو الصحفى دا شنـقـوهو؟؟؟ !!!!!!! ياها خوفتك حتى من صاحبك الوالى ود الخدر الما بتظلم عندو احد ….و الما رجع للزول الما إنتحر….كشكو…و…لا ..اولادو الطشو
لان الجمهور لا يرى لا يسمع لا يتكلم:lool: :lool:
The word between the two bracket in the first line is wrongly written, it should be with ( open taa)..I am surprised why these linguistic errors has become rife and of frequent occurrence amongst the journalists although Arabic language is their mother tongue.
Sorry Osman, I wrongly read the word in your first line . You have written it correctly.
ياعثمان ميرغنى
الحمد لله البقت شفخانة ما قبة
انظر حولك في أي مشروع .. دائماً عقدة الفشل فيه.
عدا مشاريع صاحبك والى الخرطوم المارجع للراجلالما إنتحر كشكو وأولادو الطشو
تعرف ليييه؟؟؟ لأنهامدعمة من ميزانية الولاية عبر جبايات المحليات
يعني هسي قلت إنه الراجل قال ليك بالحرف (مالك علينا.. نحن نتنتظر هذا الحفل من سنة لى سنة.. عشان نعيش منو..) طيب صحبك ده ما فاسد مالك اتسترته عليه انت ما عارف التستر ده جريمه يجب أن يعاقب عليها الشخص؟ يا عثمان ميرغني إنت راجل صحفي وصاحب رساله عايزنك تكون انسان شجاع وما تخاف إلا من الخلقك والحاجات البتتستر عليها دي مسؤوليه إذا ما كنت قدرها اتركها وكفى الله شر المؤمنين القتال
شوف عثمان اي مشرو ع (دسم ) واسال عن ال(main contractor ) تلقاه من الجماعه يا اخوي ديل بيعملوا المشاريع لمصلحة ناسهم وليس لمصلحة البلد ولك في شارع الانقاذ الغربي ومباني وزارة الداخليه التي انهارت خير مثال هسع احفر وراء اي مشروع كبير ستجد العجب العجاب