من سجين لابسلو وزنه (شعر)

بسم الله الرحمن الرحيم
من سجين لابسلو وزنة !(شعر)
( 1 )
همَّ قالوا..ونحن أديناها صنه
بقينا نسمع في العجايب..
في بلد لافاها محنه
بي صراع وصل القرايب
والمصالح هي الأكيدة ..
وهي الحقيقة هي المظنة
في سبيلها دواس بهمة
وكم ضحايا بلا جريمة
كم ثكالى وكم يتامى ..
وكم مظاليم ضاقوا ذله
كم مطاريد من ديارم..
وكم قبايل في نزوح..
لا قراية ولا علاج يلقوهو ضُمة
والليلة يوم الإلفة راحت
والدروب ما فيها لمة
كلبشوا الكان جنجويدي
ويد بتضرب بي سلاحم
شتموه وقالوا ناكر
والجميل نكرانه سبة
كيف يجازي رئيس أواه؟
ومن سجين لابسلو وزنه
لمَّعه وبقى ليه شنه؟
( 2 )
ونحن نسأل
كيف سجين لابسلو وزنة ؟
في المناصب يلقى قسمة ؟
يوم مساعد للرئيس..
ويوم وزير بي هيلمانه
الفضائيات تكوسه..
وبي سلاح الدوله يقدل..
وبيه للظالم يسنْده
يحامي للريس بجنده ؟
ويوم يخالف ..يبقى رمه!!؟
ما بهمنا ما علينا ..
الفخار يكسر في بعضه
ربى يا سيد المصاير..
النظام بالبِكْسرنّه
كل مال اكلوه سحتاً..
بالبلاوي البمرقنّه
وكل دم سفكوه ظلماً
بالعدالة تعوضنّه
( 3 )
ياما بي اسم الوطن..
ضاع الوطن
على صوتك يا دمانا
يا جروحنا ويا عيانا
يا عطش شقق حلوقنا
يا بطون خاوية وجعانة
ويا زمن سجَل أسانا
يا سنين شالت أذانا
ويا قلوب مفطورة دايماً ..
من نزيف ما كان هوانا
علي صوتك يا مدنا ويا قرانا
نادي فرقانا ..وبلوداتنا وحواكيرنا..
وحلاَّلنا وزراعتنا وحلالنا
قولوا لا لا والف لا لا..
لي سلاح يكتل جنانا
قولوا لا لا وألف لا لا
لي مصير مظلم قصادنا
هبه واحدة..وتاني نديهم قفانا
هبه واحدة وتاني نديهم قفانا

29 /نوفمبر 2017
[email][email protected][/email]