خط هيثرو بتاع الاماراتيه

بقلم: د. الرازي ابوقنايه- باحث وناقد ومضيف جوي سابق.

في كل الازمنه يتناول بعض الكتاب (مقوله) ويلوكونها يوميا دون كلل او ملل خصوصا اولئك عديمي الخيال. الكاتب المتفرد الطيب صالح عندما كتب (من اين اتي هؤلاء)ظل كل الذين يفتقدون الخيال الواسع والمرجعيات الي استعمال هذه الكلمات بمناسبه وبدون مناسبه حتي اوشكت ان تفقد معناها لولا تفرد قائلها. نحن الان بصدد مقوله اخري وهي كسرة (خط هيثرو الحصل فيو شنووووو) بتعديلاتها (العند النائب العام)

تذكرت هذه الكسره وانا جالس في قاعه المسافرين رقم 11 ج بمطار هيثرو بلندن مع قرابه ال500 راكب في انتظار النداء لرحله طيران الامارات رقم 008 بطائره الايربص 380 العملاقه المتجهه الي دبي. كنت ضمن المسافرين اتلفت حولي مبحلقا في حركه الموظفين في زيهم الرسمي البيج مع البني الانيق وحركه اغلاق وفتح البوابات وقد كنت اعرف كل ذالك معرفه تامه نسبه لان جل شبابي امضيته مضيفا جويا في عده شركات طيران في سبعينيات وثمانينيات القرن الماضي ابتداءا بسودانير.
لا ادري اذا كان صاحب الكسره المشهوره اعلاه يعرف معني (خط هيثرو ) ولا زول متلعبس ساي. دعوني اولا اشرح معني خط هيثرو واضرب امثله بتلاته انواع (خط هيثروس) السين الاخيره دي للجمع, ويعد داك نشوف صاحبنا دا ماسك ضنب الككو ولا فعلا بتكلم من مرجعيه معرفيه (جامده)زي مابقول المصريين.

اي شركه طيران في العالم عندها رحلات تبتدي من المنشأ الي اي مدينه اخري ثم تعود مره اخري الي المنشا. اذا كانت الشركه الاماراتيه فرحلاتها تبتدي من دبي. واذا كانت الرحله متجهه الي لندن فتسمي هذه الرحله خط لندن. لكن عشان مطار لندن اسمو هيثرو يبقي الخط بيسمي (خط هيثرو) وعشان الشركه هي الاماراتيه فالخط بنسميو (خط هيثرو بتاع الاماراتيه). بالنسبه لي صاحبنا الخط العامل ليو كسره هو خط هيثرو بتاع السودانيه. بس هو طبعا قاصد خط هيثرو بتاع السودانيه في الزمن الغابر دا والدليل علي انو غابر قام (اولاد الهرمه ديل) ياعوهو. بس سودانير كان عندها خط هيثرو بتاع زمان, بمعني اخر خط هيثرو تاني ما بتاع اولاد الهرمه ديل, بس كان في سبعينيات وثمانينيات القرن الماضي. يبقي كده بكون عندنا تلاته خطوط هيثروس (قلنا السين للجمع). واحد بتاع الكسره والتاني خط هيثرو بتاع سودانير الزمان والاخير خط هيثرو بتاع الاماراتيه.
هو خط هيثرو يعني شنو؟؟ اي قلنا هو الرحله من والي مدينه المنشأ لكن التفاصيل الفيو شنو؟ زمان سودانير كان عندها في لحظه من اللحظات 8 رحلات اسبوعيه الي لندن (هيثرو) يعني خط هيثرو كان 8 رحلات. كانت رحلات مميزه جدا من كل النواحي. اول شي كانت مربوطه بي رحله نيروبي عشان كميه الخواجات البتركب فيها من اتينا وروما وفرانكفورت والقاهره من والي لندن. كان الخط دسم. الاهتمام ببتدي بالرحله من الخرطوم. اكل مختلف..الموظفين البشتغلوها مختلفين والطياره ذاتا كان نضافتا بتختلف من نضافه الطيارات التانيه لانو حتي ناس النضافه كان ببذلو فيها مجهود جبار. اما ناس العفش فكانو بجيبو عفش الركاب في السير قبل ان يرتد اليك طرفك مش زي هسع لمن تكره نفسك. المهم خط هيثرو بتاع زمان كان خط بمعني الكلمه والحاله كمان لمن ربطوهو بي خط جوهانسبرج. الطياره كانت بتجي من لندن للخرطوم بتقيف ترانزيت وتواصل بعد ساعه لي جوهانسبرج وترجع طوالي مستفه لي اخرا بالركاب والطياره كانت ذات سعه عاليه. في خط هيثرو داك الاكل كان طعمو خاص. عصير الليمون والجبنه الهولنديه والكوراسا لي هسع طعمهم في خشمنا رغم مرور كل السنين دي. بالمناسبه كل التموين البيخص الخط وخطوط اخري كان بجي الخرطوم بواسطه الخط دا حتي التموين (التموين هو الاكل داخل الطائره) البخص الرحلات الرئاسيه الخاصه. يعني لمن ناس المراسم يتصلو بسودانير عشان يجهزو ليهم رحله رئاسيه طوالي كانو بتصلو بي لندن عشان يرسلو التموين في سفريه لندن (خط هيثرو). عشان كده خط هيثرو كان مهم حتي للقصر الجمهوري. رحله خط هيثرو كمان كانت مرتبطه بي رحلات شركات طيران اخري من امريكا وكتير من المبتعثين في الوكت داك كان بجو هيثرو ومن هناك بياخدو خط هيثرو بتاع سودانير للخرطوم وحتي لي بورتسودان او صنعاء لانو الخط كان مرتبط بيهم ايضا.

من الحاجات العالقه بالذاكره الطيارات ذاتا لمن تصل لندن كان بنضفوها نضافه خاصه عشان نضافه ناس الخرطوم ماكانت كافيه. بالنسبه للركاب, ناس التسويق عملو في الخط شغل رهيب لانهم ربطوهو بي القاهره واتينا وروما وفرانكفورت عشان كده الطيارات كانت مليانه لمن مدفقه. في مره الطياره جات فرانكفورت من لندن في طريقها للخرطوم ونيروبي ونسبه لعدم وجود مقاعد, نزلو احد المضيفين عشان يستفيدو من كرسيو لي واحد من الركاب. اخيرا الاسبيرات للطيارات الخسرانه في الخرطوم كانو برسلوها في خط هيثرو..عشان كدا لمن الطياره الجايه من هيثرو تصل الخرطوم بكون كل الناس مستننها. اذكر صديقي مهدي مصطفي الهادي وقد كان مديرا لقسم الامن بسودانير في بدايه الثمانينيات وقد حضرت الي المطار لوداع احد الاصدقاء حوالي الخامسه صباحا وقد كان ذالك وقت هبوط طائره لندن. كان يجلس علي كرس امام مكان وقوف الطائرات وقال لي ساخرا (لقد كان رجلا ساخرا) شوف المطار دا هادئ كيف. بس اقيف شوف لمن طياره لندن تنزل البحصل شنو. ياخ الطياره دي لمن نزلت فجاه كده الناس دي جات من وين ماتعرف. قال لي تعرف بدون طياره لندن دي (قاصد خط هيثرو) المطار دا مابسوي شئ. مواعيد نزول رحلات لندن كان بين الرابعه والسادسه صباحا مافيو تاخير اطلاقا. كنا نجي المطار وندخل مهبط الطائرات نشوق طياره لندن واقفه وحولها الناس كلهم زي العروس في ليله زفافها ويتكرر المشهد يوميا بلا كلل او ملل. تعرفو في كل الرحلات كان الزي قميص ابيض نص كم لكن في خط هيثرو كنا بنلبس قميص كم طويل مع كرافته وبدله سوداء تسر الناظرين.

وانا جالس في صاله المغادره 11 ج في مطار هيثرو في انتظار النداء لرحله الامارات 008 المتجهه الي دبي ودا طبعا خط هيثرو بتاع الاماراتيه وفيو نفس ملامح (خط هيثروالزمان) بتاع السودانيه والكان ماثل امامي في تلك اللحظات.. حركه الموظفين نفس الحركه. شكل الطياره واقفه في البوابه وناس طالعين وناس نازلين ومهندسين تحت المكنات وناس الوقود في عريبتهم تحت الجناح. ياخ لي درجه انا صنفتهم في راسي. داك مهندس ودا بتاع العمليات والمن هناك داك بتاع الحركه. الباب القدام فيو عربيه التموين. وعربات العفش ياهم ديلك علي اليسار تحت الطياره. امتع حاجه لمن دخل الطاقم وجلسو جنبنا في الصاله وبدو في مناقشه التعليمات (Briefing) قبل الرحله . رخيت اضاني وسمعته نفس الكلام الكنا بنقولو في رحلات خط هيثرو بتاع سودانير الزمان واتذكرته كابتن باسكال وماريو روفاييل وكابتن محمود ومس مرسون وريتا وزهير محمد الزبير.. واحسست بدمعه تنزل علي خدي. عند النداء الاخير ودخولنا الي الطائره اتذكرت شاديه ربيع وعفاف حسين وكابتن جزولي وتوالت الدمعات علي خدي بلا توقف.

خط هيثرو بتاع صاحبنا بتاع الكسره دا موضوع تاني. لا طعم له ولا رائحه..اذكر في عام 2006 وخط هيثرو بتاع الكسره مباشر بين لندن و الخرطوم وكنا ركاب علي احدي الرحلات. لمن دخلنا الطياره وجلسنا في مؤخره الطائره شمينا ريحه جاز رهيبه. ماحبيبت انادي المضيف واساله لكن الراجل القاعد جنبي كان مصر يسال. دقه الجرس زي 20 مره ومافي زول عبرو (زمان الماكان برد علي جرس الراكب بيحرم من رحلات لندن) وانا اتامل في الموقف بحسره. فجاه ظهر مضيف علي الممر قام الركاب قبضوهو لان شكلو كان عابر فقط وقالو ليو شنو موضوع الجاز دا. صاحبنا وبدون تركيز وبي سرحان قال ليهم (دا موضوع عادي ياجماعه ماتشيلو هم). مانشيل هم؟؟ بس اتخيلو الرحله للخرطوم 7 ساعات مانشيل هم كيف؟ لو طرشقت في السما؟..تمتمت في داخلي بصوت غير مسموع وقلته: ياحليل خط هيثرو الكان بشن وبرن وياحليل كابتن شيخ الدين (ووعثاء السفر حقتو).

السؤال الاخير. الزول بتاع الكسره اياها داير بي خط هيثرو المنيل دا شنو؟ هسع لو ادوهو ليو حايعمل بيو شنو؟ ياها الرحلات ام جاز دي؟ ياخ في حاجات محتاجه لي (شننننوووووو ) حقتك دي اكتر من خط هيثرو. سودانير انتهت ومابترجع وقروشا (بمافيهم قروش الخط) اتعملت عمارات في الخرطوم وشقق في دبي وبيوت في لندن وكمان شركات طيران لو ماعجبك. انته عارف في اكتر من مدير او نائب مدير لسودانير عندو شركه طيران الان؟ عشان كده (شنووووو) حقتك دي حقو توجهها لي حتات تانيه. رايك شنو في موضوع محيرني تبتدي بيو ومافيو خواجات (وكده) علي قولك. عندنا في كوبر القريبه دي شارع قبل كم سنه بدو يركبو فيو اعمده نور. عملو كم عامود ولمن وصلو نصف الشارع قامو وقفو. بقي نص الشارع فيو اعمده وباقي الشارع مافيو. بلاي مادام انته اصلا نفسك طويل كده وكسراتك زي (كلب توتي) شوف لينا باقي الاعمده الحصل فيها (شنننننوووووو) علي الاقل لو قدرته تجيب نتيجه بكون عندنا اعمده في باقي الشارع. خط هيثرو يطير علي قول الحاجه الله يرحما.
قالو في واحد مسطول مشي توتي المشهوره بي زقاقاتا الضيقه والطويله. دخل زقاق من ديل قام سكاهو كلب. هو جاري والكلب وراهو والزقاق طويل. المهم لمن طلع من الجانب التاني من الزقاق ونفسو اتقطع, الكلب وقف وقام هو وقف. اتلفت للكلب وقال (والله الكلب دا طويل طول). أششي (شنووووووو)

تعليق واحد

  1. و دى تجى يا دكتور ؟؟ ننسي سودانير و خط هيثرو !! و نروح نعمل اعمدة كهرباء بكافورى ؟؟؟

    ما كفاية عليكم اضاءة فلل حوش بانقا للصباح ..

  2. بصراحة وفى احيان كثيره اجد كثيرين من معلقى الراكوبة يشدوك لكتاباتهم و تعليقاتهم اكتر من صاحب المقال نفسة الى الامام… وربنا يديك العافية الاستاذ الفاتح جبرا ..كسرة يا ريت لو كان فى ادوية للشتارة لكن كفيتو وفيتو .

  3. عليك الله يا ولد الشيخ الطيب ابوقناية عاوزك تكون شجاع وتسأل ود
    اخوك عن الناس الباعوا خط هيثرو وتجى تكلمنا. رشحت اخبار بانهم
    ٤ اشخاص وكبيرهم عنده علاقة عائلية مع عمر بشير.
    اذا الكلام دا ما صحيح قول لي وحأصدقك واعتذر.

  4. لو الناس شنت حمله عشان الفقره الاولي فالمقصود باللواكه هم الكتاب البستعملو بكثره المقولات المشهوره كمرجعيه لهم وليس المقصود الكتاب العظام انفسهم (الطيب صالح ود الفاتح جبرا). ومقوله الطيب صالح كانت من اين اتي هؤلاء بينما مقوله د الفاتح كانت خط هيثرو. معقول المتداخلين الغاضبين بلا سبب افتكرو المقصود باللواكه هو د جبرا؟؟؟ ثانيا ورغم انني نلت شهاداتي من اعظم الجامعات الامريكيه والبريطانيه وان تخصصي مصنف عالميا الا ان عملي كجرسون هو مافتخر به. ولولا ان مقص الرقيب قام بقص اسمي من تلك الوظيفه في العام 1998 رغم حبي لها لاصبحت الان من اعظم الجرسونات في العالم وليس ناقدا او باحثا في احدي الجامعات البريطانيه. اشهد هنا انني ومنذ ان تركت العمل في سودانير لم تطا قدماي اراضيها الا مره واحده في زياره الي زميل عزيز كان يود ان يراني وامتدت تلك الزياره لدقايق معدوده. انا افتخر كثيرا بان يكون د الطيب ابوقنايه ابن اخي. فانا لا اري ارق منه قلبا ولا اطيب منه حديثا كما انني ومنذ ان كنا زملاء في نفس الفصل الدراسي لمده 5 سنوات لم اسمع منه مااغضبني وقد كان ولازال عزيزا علي رغم اننا لانلتقي اطلاقا لاختلاف طرق كسب العيش.اشكر كل الذين تفاعلو مع انطباعاتي وتفهمو حالتي النفسيه التي كنته اعيشها.فتلك الانطباعات لم تكون غير حاله نفسيه تذكرت فيها احباب عزاز علي عشنا سويا اجمل لحظات حياتنا. واكرر هنا بان مقوله (د الفاتح جبره ) لم تكن سوي مدخل لعالم اشتقت اليه في هذا الزمن المهترئ. زهير محمد الزبير والذي زكرته عرضا هو من اتاني في مطار هيثرو وبكي والدتي في وفاتها لانني بكيت والدته التي سبقتها بزمن بعيد ثم وضع في جيبي مبلغ من المال كنت قد نسيت اننا في السودان نعطيه في هذه الحالات. فعلاقتنا لم تكن سوي انني كنت جرسونا في احد مطابخ الطائره بينما كان هو جرسون في المطبخ الاخر.

  5. كعادة السودانين الواحد يحب يتجدع لمن يكون سافر ليهو كم سفرة برة .حسي مقالك كده داير توصل بيهو ياااتو معلومة? انا متاكد داير توري الناس انك كنت شغال وزمان البلد سمحة وانك منقطا وانك عارف كم معلومة حسي لو قلبنا تعيينك نلقاك اتعينت بي واسطة ماضيعنا في السودان الا الفشخرة حتي لو كان الواحد ماخد اعلي الشهادات يتفشخر . عندما كنا طلبة في الجامعة الدكاترة برضو يتفشخرو لينا بي سفرياتهم ووهماتهم وفي النهاية ماكان منهم اي نفعه ياطلعوا حزب اللمة الوهم ياناس مولانا الكرور يا كيزان عفن .هووووي يا سودانين خلو الانا واقعدو في الواطة واشتغلو اشان تبقوا زي العالم البره لانو فااتونا بي ملايين السنين .

  6. عندما يشير الكاتب في المقال – خط هيثرو الحاصل فيهو (شنووو) اعتقد يشير الي الفساد والمفسدين في كثير من قضايا السلب والنهب الحاصل في البلد ,وعندما تم فتح التحقيق في بيع خط هيثرو ليهو الان اكثر من سنة وما معروف الحاصل (شنوووو)

  7. الفكرة يا د/الرازي مش في خط(هيثرو) ولا خط(الصعيد) .. الفكرة في إنو في ملكية (property) للشعب السوداني إتباعت لي حهة تانية وقروشها (إتلبعت) .. نحن عايزين نعرف الجهة الباعت الملكية دي مين؟ والقروش وين؟ وقروشنا ترجع والحرامي يتسجن .. فيا عزيزي أولا أفهم الكلام دا وأعرف إنو نحن بنسأل من قروش الخط مش الخط نفسو و(البروف) ربنا يديهو العافية كسراتو و(واواتو) دي كلها بتدور في فكرة الفساد نفسها مش في الحاجة المسروقة هي شنو!!

  8. خط هثرو بتاع صاحبنا بتاع الكسرة ..
    الزول بتاع الكسرة اياها ..

    لا تبخسوا الناس اشياءهم يا دكتور رازى ..
    صدقنى لو المعلم جبرا ختاك فى دماغو الا تسيب لندن وتلف صينية فى اعمدة كوبر . بس هو اكبر من كده
    و البركة فى حيرانو ما قصروا .

  9. *… والله…و بالله…..و تالله ماعرفناك ي “دك” شايت وين ؟

    دعك من رأيى !!!!,,,,أدناه 10 جمل مفيده (منقوله حرفيا من مقالك)…إقرأها بتمعن و ورينا
    رأيك شنووووووووووووو؟؟؟
    ______________________________________________

    1- “في كل الازمنه يتناول بعض الكتاب (مقوله) ويلوكونها يوميا دون كلل او ملل خصوصا اولئك عديمي الخيال.”

    2- “نحن الان بصدد مقوله اخري وهي كسرة (خط هيثرو الحصل فيو شنووووو) بتعديلاتها (العند النائب العام)”

    3- “لا ادري اذا كان صاحب الكسره المشهوره اعلاه يعرف معني (خط هيثرو ) ولا زول متلعبس ساي. دعوني اولا اشرح معني خط هيثرو واضرب امثله بتلاته انواع (خط هيثروس) السين الاخيره دي للجمع, ويعد داك نشوف صاحبنا دا ماسك ضنب الككو ولا فعلا بتكلم من مرجعيه معرفيه (جامده)زي مابقول المصريين.”

    4- “هو خط هيثرو يعني شنو؟؟

    5- “قال لي تعرف بدون طياره لندن دي (قاصد خط هيثرو) المطار دا مابسوي شئ.”

    6- “خط هيثرو بتاع صاحبنا بتاع الكسره دا موضوع تاني. لا طعم له ولا رائحه…”

    7-“السؤال الاخير. الزول بتاع الكسره اياها داير بي خط هيثرو المنيل دا شنو؟؟؟
    هسع لو ادوهو ليو حايعمل بيو شنو؟؟؟؟…سودانير انتهت ومابترجع وقروشا!!!!

    8- “عشان كده (شنووووو) حقتك دي حقو توجهها لي حتات تانيه. رايك شنو في موضوع محيرني تبتدي بيو ومافيو خواجات (وكده) علي قولك.”

    9- “خط هيثرو يطير”.

    10- “بلاي مادام انته اصلا نفسك طويل كده وكسراتك زي (كلب توتي)”.

    ررركـكـكـززز معاى…..””” وكسراتك زي كلب توتي “””

    _______________________________ ا نــتــهـــى _________________________________________________

    كسره أخلاقيه…على قول مجوك ” دِى ألـفـاظ ده”

    “وكلنا فى جبره شرق ”

    ” أســــــتـــاذذذذذذذ”

    ولك منى كل الودددددددد…

  10. هو الرازي دا ذاتو يطلع منو اول مرة اسمع بيو وشايف نفسو شنو قدام الفاتح جبرا وفرحان كدا مالو وبعدين مقالك مع انو طويل بس مافيو شي مفيد غير انو زول حاقد وداير يشتهر على حساب الفاتح جبرا لانو مافي زول سمع بيو و بكتابتو دي ذاتو ما بستاهل زول يسمع بيو ومدام انت موضوع الانارة دا مأزمك ما كان تكتب فيو ما كان تكتب في ناس مصلحة الوطن بتهمهم اكتر منك و مثلك في كلب توتي دا بايخ جدا و شايفك كاتب (توتي المشهوره بي زقاقاتا الضيقه والطويله)داير بيها شنو كان زقاقاتا طويلة ولا ضيقة خليك في حالك احسن و اضرب امثالك في حلتكم اذا كان عندكم حلة اساسا وان شاء الله تمر بيو انت كلب توتي دا و يعضيك عشان ما تجيب سيرة توتي بلسانك دا .

  11. أستغفر الله العظيم
    عليك الله ما تحترم باقي عمرك ده وتسكت
    هو إنت منو ذاتك
    لكن الغلطة ما غلطتك غلطة ناس الراكوبة البجيبو ليهم مقال زي ده وغلطتنا نحن عشان كنا قايلنك شايت معانا ومع الأستاذ الغالي جبر

  12. قال (م. ج . د) (مضيف جوي دكتور)/ أبوقناية

    لا ادري اذا كان صاحب الكسره المشهوره اعلاه يعرف معني (خط هيثرو ) ولا زول متلعبس ساي. دعوني اولا اشرح معني خط هيثرو واضرب امثله بتلاته انواع (خط هيثروس) السين الاخيره دي للجمع, ويعد داك نشوف صاحبنا دا ماسك ضنب الككو ولا فعلا بتكلم من مرجعيه معرفيه (جامده)زي مابقول المصريين.

    ـــــــــــــ

    ويؤكد انه لم يقصد إزدراء الاستاذ جبرا أو الإساءة له …. والله جرسون !!

  13. 1- لا ادري اذا كان صاحب الكسره المشهوره اعلاه يعرف معني (خط هيثرو ) ولا زول متلعبس ساي.
    2- بالنسبه لي صاحبنا الخط العامل ليو كسره هو خط هيثرو بتاع السودانيه.
    3- خط هيثرو بتاع صاحبنا بتاع الكسره دا موضوع تاني. لا طعم له ولا رائحه..
    4- السؤال الاخير. الزول بتاع الكسره اياها داير بي خط هيثرو المنيل دا شنو؟
    5- عشان كده (شنووووو) حقتك دي حقو توجهها لي حتات تانيه.
    6- وكسراتك زي (كلب توتي)

    . يعني هسه الفاتح جبرا ده ما سمعتا بيهو كلو كلو وللا الفهم شنوووووووووووو ما عاوز تجيب إسمو مالك؟ ي

  14. طالما أن السيد الدكتور صاحب المقال موجود وحاضر بيننا ويرد على التعليقات فأرجو منه أن يجيب على أسئلتي المتواضعة هذه :
    1- ما هو الدافع والهدف من كتابة المقال؟
    2- لماذا لم يذكر إسم الاستاذ جبرا في مقاله على الرغم من أن الراعي في الخلا يعرف كسرته التي عمت الآفاق هذا إن لم يقرأ له؟ أهو نوع من الإستخفاف؟ ولماذا؟
    3- ما هو موقف الدكتور من سرقة وبيع خط هيثرو؟ وهل يستهجن كسرة الأستاذ التذكيرية؟
    4- ما هو إحساس وشعور الدكتور وكل التعليقات تصب في إستهجان مقاله؟

    وشكـــــــــــــــــــــــراً

  15. باين عليك راجل كبير فحقو تحترم شيبك .. مقالك ده مقال مخستك وما عرفناك قاصد بيهو شنو لأنو كتابتك ركيكة وبتاعت جرسونات .. وإغفالك لذكر إسم الاستاذ وهو علم على رأسه نار دليل على أن المقال لم يكتب بحسن نية وليس هدفه المصلحة العامةعموما إن كنت ممت يصيبهم الضرر من كسرة الاستاذ جبرا فأبشرك بإننا كلنا مع الأستاذ حتي يتم تقديم اللصوص إلى محاكمة علنية فقروش بيع الخط أولى بها مواطني هذا الشعب العظيم الذين تركتموهم كالأيتام على موائد اللئام فاقدين لأبسط مقومات الحياة … قوم لف .. قال أيه باحث وناقد ومضيف جوي طيب ما تصلح ساعات

  16. والله يادكتور ابوقناية مقالك ده كان حيمشي كويس جدا وكنا حنستفيد منو شديد او الحقيقة استفدنا منو بس تخريماتك الخرمتها والاسلوب الاستعلائي الكتبت بيهو المقال خلانا ننسى كل حاجة مفيدة فى المقال .

  17. د.ابوقنايه لك التحيه والتقدير
    ذكرتنا ايام الزمن الجميل وفعلا كانت طائرة لندن هى روح ودنمو سودانير وارجو ان تعزر الاخوه الكرام لانهم لم يدركوا المغزى من مقالك فهيثرو الزمن الجميل ليس هيثرو سودانير عارف لكن هم على حق فى تمسكهم بامل من جراء مقالات وكسرات الكاتب المحبوب الاستاذ جبرا امل فى ان نستعيد هذا الخط والذى كما تعلم كانت تحط فيه سودانير فى ترمنال تو والذى كان بعيد المنال لغيرها.
    ماذلت اذكركم جميعا انت والاخ زهير وريتا ومساعد وفوزيه ومريم ووابوشريعه وعبدالله محمد زين وعواض والسرعندما كنتم تأتون الى محطة انجمينا sd420ايام الزمن الجميل
    مقالك اعادنا لزمن الرياده . لك ولكل الزملاء الاحياء التحيه والرحمه والمغفره لمن رحلوا
    اخوك فاضل محطة انجمينا تشاد

  18. يا جماعة ألحقوني مرارتي إنفقعت ده دكتور شنو؟ والله قدر ما قريت مقالو ده ما طلعتا بى نتيجة .. هو مع جبرا هو ضد جبرا مع بيع الخط ضد بيع الخط حد يفهمنا يا ناااااس

  19. ما كان في داعي لتبريراتك السمجه دي إنتا وكت ما قدر الحاجة الشوبار ليك شنو يا أبو عصاية؟

  20. يا ( ديك )( ثور ) الرازي فقعت مرارتنا بمقالك الممعن في الركاكة والخالي من اي مضمون ولغتك العربية الضحلة والحسنه الوحيدة اني بعد ان طالعت ما اسميه مجازا بمقالك هو اني تذكرت استاذنا و استاذ الاجيال معلم اللغة العربيه الفذ مالك ابوقناية الذي تعلمنا علي يديه في المرحلة الثانوية وحقو ترجع ليهو ( اتمني ان يكون علي قيد الحياة )وتتعلم منه اصول كتابة المقال و صياغة الجمل العربية وغيرها ويبدو ان صلة القرابة بينكما لاتتعدي الاسم و الاهم من كل هذا حاول الا تقترب من الراكوبة مجددا لان شانها ارفع من يكتب فيها امثالك وان عدتم عدنا

  21. دكتور علامه تمرجي والا حتي عالم ذره اسمح لي اقول ليك اسلوبك استعلائي وشكلك اخدت شهاده ناقد دي جديد وقلت تشوف ليك اي كويتب وتنتقده بس يا شاطر وقعت مع جبرا اللي عنده معجبين بالكوم والله انا زعلانه شديد لانو اي زول تملك جهاز اصبح صحفي أو ناقد واحد يتعالي في خطابه وواحد يستخدم الفاظ سوقيه ويسمي نفسه ناقد فني يا عالم افهموا الكتابه فن وذوق وادب زي السواقه اللي الشعب السوداني ليوم الليله ما عارف يحترم قواعدها

  22. * القضيه يا “دك” ماغى نقدك لصاحب الكسره….
    القضيه فى جوهر موضوع الكسره “الجمره” ذاتوووو…

    **أوافقك الرأى فى “8- الحياه لا تقف في محطه واحده والمثل الانجليزي يقول
    (Nothing absolute )”……………..ولـــكــــن …لدى سؤال !
    – إذا كانت لديك المقدره على استيعاب المدلولات الفلسفيه
    للمثل ( Nothing is absolute )”هكذا يكتب”…. فلماذا
    تجبر الغير على الوقوف فى محطتك ؟…و ماذا يجبرك على الوقوف فى محطة جبره؟

    -وبعدين يا “دك” إنت ما سمعت بالمثل الإنجليزى “live and let live ” ,
    ولا ده ما أدوكم لـيهـوووووووووو …..؟

    – تعرف…….. ممكن تكون كايس الشهره
    قلت النهاجم صاحب الكسره
    و ممكن تكون من بنى هثره ….(بنى هثره :أغنياء خط هيثرو الجدد)
    خايف من انكشاف الهبره

    ***أنصحك تكتب كسراتك البتهمك براك
    و تخلى لينا د الفاتح فى كسرتوووووو ؟

    نقاط خارج النص -( لو ممكن أقترح اسم لكسرتك …ممكن تسميها ” كـسـرة الـكـسـره )-

    – بعدين تقول لى من الاسر الفقيره؟ وبيتكم طوب أحمر
    يا بتاع لندن-دبى وبالإمارتيه كمان..!!!..مششششش فلاى دبى…!!!

    -إنت زول بتاع مشاكل ساكت يعنى واحد ساكن كوبر
    وطاير بين لندن-دبى البوديهو محطة جبره شنوووووووو….؟؟؟؟؟؟

    والله وبالله وتالله أكان قامت عليك “محطة جبره” …….ما يفرزوك إلا بالطقم..!!!!!!
    ……………….SEEN ؟

  23. قال المضيف جوي دكتور الرازي أبا قناية (ويعد داك نشوف صاحبنا دا ماسك ضنب الككو ولا فعلا بتكلم من مرجعيه معرفيه) .. ونحن نقول له (ياخي رفعتا الكلفة شديد.. صاحبك ده منو؟ أوعا يكون الأستاذ جبرا) .. ياخ إنتا مقرف شديد وكمان لمن إتزنقتا قعدتا تتملص هسه… صاحبنا دي شنو يا سفرجي؟ ما عارف إسمو مثلاً؟ زي ما قالت ليك واحدة من المعلقات إنتا وكت ما قدر الحاجة دي مااااااااااااااالك؟؟؟

  24. يا الرازي الغريبة رغم صلة القرابه التي تجمعنا لم اسمع بان لك دكتوراه في اي تخصص سوي الان وانا ادري تماما انك بعد سودانير اتجهت للعمل الحر ولكن اعتقد انك بالغت شويه في مسالة الدكتوراه التي ذكرتها وكفاك كذبا وهذه صفة معروفه عنك ثم حاول الا تبني مجدا علي حساب شخص اخر والاستاذ جبرا يساوي في علكه اشخاص عديدون من شاكلتك واكثر ما استغربت له هو انك ذكرت منطقة كوبر ولم تذكر حي العشير الذي ولدت فيه ورحم الله ابونا الشيخ الطيب ابوقنايه وللاسف صدق المثل الذي يقول النار—الرماد وهذا هو الفرق بين الامير و الرازي

  25. يا الرازي الغريبة رغم صلة القرابه التي تجمعنا لم اسمع بان لك دكتوراه في اي تخصص سوي الان وانا ادري تماما انك بعد سودانير اتجهت للعمل الحر ولكن اعتقد انك بالغت شويه في مسالة الدكتوراه التي ذكرتها وكفاك كذبا وهذه صفة معروفه عنك ثم حاول الا تبني مجدا علي حساب شخص اخر والاستاذ جبرا يساوي في علكه اشخاص عديدون من شاكلتك واكثر ما استغربت له هو انك ذكرت منطقة كوبر ولم تذكر حي العشير الذي ولدت فيه ورحم الله ابونا الشيخ الطيب ابوقنايه وللاسف صدق المثل الذي يقول النار—الرماد وهذا هو الفرق بين الامير و الرازي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى