….. *مأساة وطن* ….

القصة ما قصة نفير ..

القصة فى زمن المهازل
و قصة الغنى و الفقير
القصة قصة نخبة حاكمه
سارحه فى الاحلام تطير
فرهدت بى دم الغلابه
لا سائله فى جنَا لا صغير
….* * * * * * * * * * ..
القصة قصة طفل رائع
سرقو من قلبو الضمير
عمرو ما ضاق لبن المَزَارع
ساقينٌو من موية الحفير
…* * * * * * * * * * …
القصة قصة ام حنينه
مكلومه فى فاطنه و فى سمير
ام بتبلع فى انينا
و ترسم البسمات حرير
حاشاها لو تكسر بخاطر
حاشاها لو يوم تستجير
…* * * * * * * * * * …
القصة قصة اب مناضل
ياما حار بيه الدليل
شب فى الدنيا بضراعو
و رِضعُو من عرقو النبيل
ادى للايام شبابو
ما همٌاهو فى البِجِى و البديل
دشدشو بالهم ده راسو
و شربو من دمٌو البسيل
و رموهو لى لمة ضباع
.. جثة هامدة ..
و جاهزه للتشريح عديل
…* * * * * * * * * * ..
و الكِلاب الحايمه .. تنبح !
فى مشرٌد و فى ذليل
تحمى فى الغول البيقدِل 
فى الغلابه و فى كل جيل
الغُرٌة تلمع فى جبينو
و فى لعابو المال يسيل
مُتعَتو الدنيا و نعيما
و عندو فى القرآن دليل
قسٌم الكيمان لى عصابتو
و هلٌلو فى يوم الرحيل
…* * * * * * * * * * ..
القصة قصة شعب تايه
قادوهو لى بئس المصير
شعب نفرة و شعب دفرة
و شعب بين حيطانو بير
كسٌر مقاديفو الزمن
إشكى من حظو العسير
شلٌع طواحينو المُرابى
خلوهو للحيران أسير
و الحقول الخضرة ديكى ! 
حرقوها فى عز الهجير
مصٌو من تحتو التراب
عصروهو طوبة طوبة
صرحِ شامخ و صرحِ عامر
و صرحِ للعمدة و للوزير
عاشو فى الوديان دبايب
ما خلٌولُو شاتاً فى غدير
…* * * * * * * * * * …
إتباهو بى حب الوطن
و برعو فى ادب المديح
زادوهو فى النيران حطب
و اتوضو بى عرقو البسيح
باعوهو بى ابخس تمن
سابوهو إنزف زى ذبيح
غدروهو فى غفلة زمن
ساقوهو لى اقرب ضريح
و سقوهو المر جرادل
و خلوهو زى أعمى و كسيح
حرموهو من لحظه فرح
دفنوهو بى قلبو الجريح
…* * * * * * * * * * …

[email][email protected][/email]