إشتهيت عيشة الغبش
إشتهيت عيشة الغبش
أسماء الجنيد
[email protected]
إشتهيت طُقطُق مطيراتنا الدُغش
من غير سلام فوق البرش
والشوق يتاوق من بعيد
غالبو الصبر
كرْوَشْ ترابنا على الجروف
دربا حنين خاتي الخدش
اشتهيت ريحة الفريق
ملخوخة بي شيتا كُتر
دوكة وملاح
مع فكة الريق الصباح
قهوة وعرق
والقلوة بتناغم البكر
اشتهيت مرقة بهيماتنا الفجر
لاحقه المراح
ديك الصباح
كبر وصاح
خابر الذكر
اشتهيت لمة عيال
عند الكنار جنب الترع
زفة مطامير المطر
اشتهيت مرقة بناتنا على البحر
سايقات نسيمات العصر
لافحات طرح
طمح الصدر
اشتهيت لمة كبارنا بلا وعد
والشورة فال عند الخدر
اشتهيت يا يمة ريحة هدمك الملتوق
ودهنك المعتوق
كركارو حر
كورتك ممسحة بالودك
بتناغم الديس البجر
قرضك معتق زى بخور
فصين لبان تيمان ضكر
ريحة مسيرتك جرْتَقَة
معجونه بى طين الصبر
غُرة جبينك يمة باقيالي ضي
في غربة الخوف والكدر
اشتهيت عيشةَ الناس الغبش
شاي الدغش
لبن الزريبة بلا عرش
زادى الحنين الفي الحكر
اشتهيت طبْعاً عدم في كل بلود
عدمانه يالزايلة ام قدود
حارياها عند اهلي الغبش
خاتية البطر
……………………
اسماء الجنيد
رائعة.. عيوني رقرقو اتذكرت أيام جميلة.. ربنا يجمع الشتات ويرجع كل مغترب لي وطنو.
رائعة الشوية دى يا ابو حميد دى اكثر من رائعة!!!!!
البنيه دي اسم علي مسمي فعلا سكر الجنيد
الأستاذة أسماء كويس انك بعدتي من السياسة وأتحفتينا بي رائعة زي ده أتمنى انك تكرريها دائماً . السياسة خليها الكيزان ديل طايرين طايرين ..
رائعة الشوية دى يا ابو حميد دى اكثر من رائعة!!!!!
البنيه دي اسم علي مسمي فعلا سكر الجنيد
الأستاذة أسماء كويس انك بعدتي من السياسة وأتحفتينا بي رائعة زي ده أتمنى انك تكرريها دائماً . السياسة خليها الكيزان ديل طايرين طايرين ..