الداير يموت .. يقول آمين..!
****
محمد عبد الله برقاوي ..
****
الموج الهادر..في النيل الغادر..
ومدو ..شمالي ..وماش طوالي..
علي السدالعالي..سنين وليالي..
شال الغالية…. وبلع الغالي ..
وما معروف… مين التالي..
الخبر إنداح ..إتعدى حدود..
إعلامنا الخايف وقدامو..سدود..
والبرقيات جات تنعى الحال ..
من الأغراب ..يمين وشمال..
وحاجب الدهشة ..لواهو ..سؤال..
وين أهل الوجعة ..تقول نايمين ..
فوق الإضنين.. وماسامعين ..
وجاتنا الفزعة بعد يومين..
طلانا الوالي .. ووفد الريس..
أصلو …نظامنا رقيق وكويس..
وقبال الجية ..أدونا إشارة ..
نقش ونرش ممشى الطيارة..
وصلو .. الحراس سابقين الزفة ..
ونحن هناك حارسين الضفة..
وكأنو الحاصل ماهو مآسي..
وعزانا اتحول ..شكلو سياسي ..
والصيوان إترصا..كراسي ..
وهاك يا ردحي معاهو ..وعود..
بكرة الكبري … يكون ممدود ..
ويبنوا المدرسة عود فوق عود..
المحزونة تروح و تأدي العمرة..
والمجروح بالحج.. يتعافى ويبرا..
يجوكم أطباء و أهل الخبرة..
بي مصل العقرب … والإبرة..
أنسو الحاصل وأهتفو .. يلا..
دا ..الغرفان راح في حق الله ..
وبكرة العمدة بعد يترشح ..
كل الهم الحاصل يكسح ..
واي حسود موتور يتشرشح ..
ويدوم العز ..للكوز في بلادي ..
ماالناس بتموت ودا بحصل عادي..
كان بالجوع ..و في جوف الوادي..
وكوارث الدنيا في أي مكان..
زي التوسنامي وغضب البركان..
والإبتلاءات في اي زمان..
وتبقى الأحزان هي الأحزان ..
قدر مكتوب بي قلم الرحمن ..
والموت هو الموت ..سمة الإنسان..
كان في كابول أو في اليونان..
بس كونه..تموت هنا في السودان..
شهيد في شريعة حكم الإخوان ..
حسناتك ..تفرق في الميزان ..
وموتك عيدين …مع الواقفين ..
قدام البنك .. ومحتضرين ..
في صف العيش واللا..البنزين ..
ابشر بالخير والحور العين ..
يا الإنت كتابك شايلو ..يمين .
مازي الكفرة المعترضين ..
علي نهج البررة البدريين..
فيا أهل بلادنا ..المحتسبين..
الداير يموت ..يقول آمين ..
حايفوز بالجنة..وتنظيمنا ضمين ..
والما ..مصدق..حاقد ولعين ..
***
20/8/2018
اللهم تقبلهم شهداء والهم والديهم الصبر علي الفاجعة.
لكن متي يكون لهذه البلد قانون ونظام، اولا المركب بدائي لا يصلح للتنقل البشري لخطورته.
ثانيا من اليوم فصاعدا يلزم كل وسائل النقل النهري مراكب بانطونات واي نوع اخر بان لا يصعد علي ظهرة راكب لا يرتدي سترة نجاة كبيرا كان ام صغير. يعرف السباحة ام لايعرف. يلزم الجميع بارتدائها علي اقل تقدير تسمح بطفو الشخص لفترة تمكن من انقاذه. كل المسئولين الله بسألكم عن ارواح الناس فاجعلوا هذا قانون نافذ، لابد من سترة نجاة لكل راكب هي غير
مكلفة اقتصاديا ويمكن تغطية كلفتها باضافة جنية علي سعر التزكرة.
اللهم تقبلهم شهداء والهم والديهم الصبر علي الفاجعة.
لكن متي يكون لهذه البلد قانون ونظام، اولا المركب بدائي لا يصلح للتنقل البشري لخطورته.
ثانيا من اليوم فصاعدا يلزم كل وسائل النقل النهري مراكب بانطونات واي نوع اخر بان لا يصعد علي ظهرة راكب لا يرتدي سترة نجاة كبيرا كان ام صغير. يعرف السباحة ام لايعرف. يلزم الجميع بارتدائها علي اقل تقدير تسمح بطفو الشخص لفترة تمكن من انقاذه. كل المسئولين الله بسألكم عن ارواح الناس فاجعلوا هذا قانون نافذ، لابد من سترة نجاة لكل راكب هي غير
مكلفة اقتصاديا ويمكن تغطية كلفتها باضافة جنية علي سعر التزكرة.