أها حتعملوا شنو؟

أها حتعملوا شنو؟
عمر الفاروق عبد الله
[email protected]

بعد يوم 9 يوليو وبعد ما دخل البترول يخرج من حسابات الحكومة في الشمال .. ياتري ما هو الحل في تغطية هذا الفاقد من الثروة بعد انفصال الجنوب؟ أها يا ناس الإنقاذ حتعملوا شنو؟ رئيس الجمهورية قال في حزمة من الإجراءات ستعلن لتعويض جزء من دخل النفط المفقود!! وقال بعظمة لسانه ما حتكون في ضرائب جديدة يعني أنتو حواة! يعني ما حتزيدوا أسعار المحروقات ولا حترفعوا الدعم من السكر وغيره من السلع التي يحتاجها إنسان السودان ولا حتزيدوا الجمارك علي ما تسمونه بالسلع غير الضرورية وحتي الضرورية ألن يصيبها فيضان الأسعار القادم؟ يعني ما حتزيدوا الضرائب علي فئات معينة وتدخلوا فئات جديدة لمظلتها؟ وللمغتربين المساكين مش ممكن نزيدوا حجم الأتاوات من ضرائب وخدمات وغيرها .. كده بالعربي الفصيح والدارجي البنعرفه ورونا حتعملوا شنو ولا ننتظر الي مابعد التاسع من يوليو حكومة ستة سنين ومعتمدة علي دخل النفط لرفع سقف ميزان مدخولاتها أين ذهبت هذه المليارات ولماذا لم توظف في مشاريع إستباقية لما بعد يوليو ولماذا لم يعاد تأهيل المشاريع الزراعية والسكك الحديدية ولماذا لم يملك الشباب الآلاف من الأفدنة ناهيك عن الملايين التي قد تذهب لجنسيات أخري!! الكلام ده بس للستة سنين من 2005 وما سألناكم عن الشي الحصل من 30/6/1989 وده موضوع يطول شرحه وتفسيره وتبيانه وتوضيحه!!! والله الراجيكم من جنس ده حار وده ما بنكوي بي نار. وبعد ما ضيعتوا الجنوب ولعتوها في ج كردفان وأبيي ومزيداً من النيران هنا وهناك علها تخفي ما تحت وميضها بس نيران الشعب السوداني حتمشوا منها وين لو ولعت الشرارة!!