محجوب شريف : قصيدة لسعاد ابراهيم احمد
أختي سعاد ? سعاد
قلبي أبا القعاد
قال لازم يشوفك
بس فات المِعاد
ما أقسي الليالي
ياهذا البعاد
سودانية حقاً
وبت نوبية قالت
هندسة الوراثة
مكتب ولا منزل
أم حجرة دراسة
أحن من المحنة
أشد صرامة يمكن
أقرب للشراسة
لمن تبقي جد جد
ساسا يسوس ساسا
دكتاتور وفاسد
تب ما ببقوا ناسا
نيل في حد ذاتا
الحزب الشيوعي
راياتو وثباتا
ماكانت بتاتاً
يوماً بت سباتة
أوضح حاجة فيها
ما باعت سكاتا
شفت الحق مكندك
في موكب وداعا
اتعلم ? تكلم
بين ايديها تاتا
لطف الابتسامة
وحنية حمامة
مهما تلاوي لاوي
ما بتكسر جناحا
تشرب شاي معاها
نكهتو في الصراحة
تتونس تونس
وماهين كذلك
وكت الجد مزاحا
صنديدة معارك
دارك ضل مدارك
لمن أقوم أزورك
أنا قاصد جذورك
آكل من ثمارك
وآخد من بذورك
ألقي الظلمة فاتت
ألقي الفجر زارك
سيدة المنابع
صينية طعاما
بس طرف الأصابع
حتة سندوتش
ثم إذن تتابع
ماهماها طابق
خامس ولا سابع
وبهرجة الليالي
ليست إهتماما
أسطر كالجداول
عشباً في المطابع
من شدة وضوحا
تنفض الزوابع
* تحتفي بالبراءة
وتكتشف السذاجة
والدرب المحنط
في عمق الزجاجة
وما بعكر مزاجا
الا كبير صغير
سلوكو الناس تلوكو
العايزا بتقولا
وما هماها حاجة
سنت صوتا سن
في نار احتجاجا
شاشة كمبيوتر
الضحي في الاماسي
منهكة الأصابع
مهما كان تقاسي
الناقص تتمو
والزايد تواسي
تطلع من كتابا
لي سلم خماسي
العالم فسيحاً
في أضيق مساحة
قداما المداين
والسفن الرواسي
* الوعي المبكر
قدام الخرافة
اقرب من قريبة
في ابعد مسافة
دندنة الاغاني
وبستنة المعاني
في حقل الثقافة
دي الام الحديقة
والاخت الصديقة
ابسط من بسيطة
في البيت القيافة
إمرأة من نسيجاً
فصلنا ولبسنا
نساء ورجال تعدد
اتشهلنا قسنا
نفرح يوم نجيها
كلنا ما يئسنا
في السكة الطويلة
تلكز لو نعسنا
اتمنينا كانت
تحضر يوم عرسنا
متعك الله استاذنا محجوب شريف بالصحه و العافيه و الرحمه للمناضله سعاد
اشهد ان الدموع تحجرت في عيوني مند سمعت الخبر الفاجعة ودواخلي محتقنة بالالم ولم اتمكن من البكاء الا بعد قراءة قصيدة شاعر الشعب شكرا لك ياضمير هدا الشعب يادوب خليت الدموع يرتاحو مني وينزلو ومتعك الله بالصحة والعافية
محجوب شريف اشعر شعراء السودان قديما وحديثا
بس لو خلي الانتماء الضيق المنبوذ من اغلب الجماهير(الشيوعية) كان بقي حاجة تاني
ياالله يا سعاد يا زميلة
نيل في حد ذاتا
الحزب الشيوعي
راياتو وثباتا
ماكانت بتاتاً
يوماً بت سباتة
أوضح حاجة فيها
ما باعت سكاتا
غايتو …. شكرا ابوي محجوب
روعة الرثاء عند محجوب شريف تشهي في الموت.. اوهكذا يعرف العزاء
الله يديك العافية يامحجوب واتمنينا كانت تحضر يوم عرسنا ستبقى دايما حاضرة ولن تغيب عن الخاطر ويوم العرس داك كل الحضور سيقف اجلالا واحتراما وتقديراوعرفانا لواحدة سودانية اسمها سعاد ابراهيم احمد
التحية للاستاذ محجوب الانسان
لماذا لم يكرم البشير شاعري الشعب محجوب شريف ومحمد الحسن سالم حميد؟؟؟؟
والله لست شيوعيا لكن محجوب وحميد اسمين اكبر من كل لافتتات السياسة ومن كل الايديولوجيات
الرحمة لحميد وطولة العمر للمحجوب
تحية
تظل سيرة سعاد خالدة خلود الجبار الراسيات وشمعة لا تنطفء بمرور الاعاصير والرياح والزوابع لانها سيرة الانسان حين يصنع التاريخ وحين يصنع المجد وحين يسمو الي الشموس الجديدة..
محجوب من غيرك يدوذن حروف المبادء والفعل الانساني الممتلئ بالوطنية في سعيها ان يكون قدر الانسان هو قربه من الانسان حظا ومصيرا ..
جادك الغيث ايها الاصيل النبيل
اتمنى من الاستاذ محجوب شريف ان يكتب قصيدة في رثاء نفسه ان شاء الله بعد عمر طويل لانه حينها لن يوجد من يستطيع هذا
الله يديك العافيه ابو مريم وصح لسانك رد علي الحقيقه اوﻻ.استاذ محجوب الان وفي كل زمان حاجه اولي وحاجه تانيه وزيو مافي.