الخصل وكتين يتمردن

الخصل وكتين يتمردن

صالح الشفيع النيل
[email protected]

الخصل وكتين يتمردن
قفزنا فوق آهات الشوق والضنى
وانعدام الوزن.
وتابعنا البحر العتيق الأصلو ما يوماً حرن
ودخلنا جامعة جنة عدن
نحن قايلنها كلها كتب فى كتب وشيخ عبدالله يعرض وكمان الخواجة بن
لكن القصة ما كده…والله القصة ما كده وقت الليل يجن
الزول الشفتو ما بشبه الناس ولا الريل ولاالجدن.
عرفتوا هفهفة النسمة الباردة في ليلة صيف سخن ؟
ولاّ دندنة أم حنينة تناجى لوليدها الوسن؟
طيب لمن الزول يقع من طولو ويصيبو الوهن ..
وتجيهو رجفة ممزوجة بوجع البطن
دا إسمو شنو في علم البدن .
زولى طيب ومسالم وماعندو تارات مع الزمن….
هو أصلاً تعبان من …الخصل وكتين يتمردن
لاكنو ما فاهم بعد نصف قرن ليش انقسم الوطن
تسألونى… برضو…ما ديل خبراء الفتن؟ رعاء الشاء المتطاولون تمكناَ
نيف وعشرين عاماً فى اللت والعجن.
في الجهوية والقبلية واحتكار الفكر والفن
ما خلاص الكنكشة في شنو تانى…ماالوطن وانهزم والبترول واندفن.
والزراعة البيهاتوا بيها ماماتت من زمان و منتظرة الكفن
حكومه موسعة ، حكومه عريضة ، حكومه مش عارف إيه ، حكومه جن.
حكومة زى غيرها ، لزرع الواسطة البغيضة والإحن…
عشان الأدبى يشتغل طبيب ، والطبيب يشوف ليهو فن
والمهندس يشتغل سواق ركشة والدبلوماسى بلا سلاح يتفرج على الدنيا أم محن
والباقيين يشوفوا ليهم أى شغلانة فالمصلحة فوق الوطن
ما دام ظلم الكريم أصبح حلال واستبيحت ستات الحسن.
يازولى القبيل رميتنا بسهام الوجد والسنن.
خليك في حالك….. مانحن بقيتا أيتام فى مائدة لئام القرن
نحن عايزين حاجات إنت ما بتعرفها يا زولاً تربى في العجن
نحن العايزنو ترعرع وعشعش في وجدان الفؤاد واتخذ السكن
ماأظن فى سودانى أصيل برضى تكرار السجن
وصبراَ فالأيام سيحين تداولها فى هذا الركن….ولله في خلقه شؤون وشأن