عنترة ينتحر
ألفاتح جبرا
مشهد (1) :
في إحدي خيام (بني عبس) عنترة يرقد مسجياً على فراش من وبر الإبل مرتدياً حلة سوداء وحوله أخوه (شيبوب) وزوجته (عبلة) وعمه (مالك) وبعض الجيران ، عبلة متجهمة الوجد تمسك (بهبابة) تحركها يمنة ويسري أمام وجه (عنترة) مغمض العينين
شيبوب: منذ متى وهو على هذه الحال؟
عبلة: والله ليهو أسبوع بي جنس الحالة دي
مالك : وهال أخذتيه إلى دار (الشفاء)؟
عبلة: ما خلينا لينا حته ما وديناهو .. مشينا بيهو دار الشفاء ودار (الزيتون) وتستشفون وكووولهم يقولو ليك كان ما دفعتا أمنية كم مليون ما بندخلو !
شيبوب: ولماذا لم تأخذيه إلى دار الشفاء الحكومية !
عبلة : قالو أن (أسرتهم) مكعكعة ولا تحتمل وزن عنترة غير أن أحد الأطباء أرقده على الأرض وفحصه وقال أنه مصاب بصدمة عصبية شديدة !
مالك : مسكين عنترة فقد إنهارت أعصابه على الرغم من أنه كان يعلم نتيجة الإنتخابات سلفاً
شيبوب : أعصابو براهو ؟ بنو عبس كووولهم أعصابهم إنهارت
– (عنترة بين الحين والحين يفيق من غيبوبته ويرفع سبابته هامساً … تااااني خمسة سنين … تاني خمسة سنين)
مالك : والله يا شيبوب إنها كارثة لقد كنا ندخر (عنترة) لليوم الأسود !
شيبوب : لماذا لم تجرب معه (طب الأعشاب) عبس كووولها إتملت (عشابين)
عبلة: والله حاجه خليناها ليهو مافي .. للرقية الشرعية عملناها !
أحد الجيران : الله يقومك بالسلامة يا عنترة فأنت أمل بني عبس
مشهد (2) :
عبلة تدخل إلى خيمة ( عنترة ) صباحا وهي تحمل (كوب حليب) فتجد فراشه خاليا ، تنظر إلى موضع سيفه ورمحه وخوذته فلا تجدهم ، تخرج مهروله خارج الخيمة حيث مكان فرس عنترة (الأبجر) فلا تجده ، اخذت (عبلة) في الصراخ فتجمع الجيران :
جار (1) : عنترة ليس في إستطاعته الخروج وهو في هذه الحالة الصحية
جار (2) : أكيد ديل (الجماعة) جو ساقوهو !
جار (3) : لا أظن ذلك يا أخا العرب ففرسه غير موجود !
جار(1) : هل أبلغتي يا عبلة (السلطات) ؟
عبلة : أبلغهم كيف؟ الشبكة طاشة من الصباح
مشهد (3) :
بينما (العربات) تسير في (شارع المورده) سيرا حثيثاً تتجه نحو (كبري أم درمان) يفاجأ الجميع بفارس متقلدا سيفه يحمل رمحه بيمينه ويمسك بلجام فرسه الضخم بيسراه ويسير بين صفوف العربات المتراصة ، ألجمت الدهشة السائقين والراجلين ورجال المرور، أخذوا يتتبعونه بأعينهم حتى وصل غلى مدخل الكبري فترجل من راحلته وقام بربضها ثم أعتلى (رأس الكبري) في رشاقة ، لحظتها كانت الحركة قد توقفت تماما عند مدخل الكبري ، خرج الجميع من مركباتهم وهم ينظرون محدقين إلى ذلك الفارس فارع الطول ذو الوجه صارم القسمات المهيب ، أطبق الصمت على المكان ، ومن على قمة الكوبري أشار الفارس للجميع بالسكوت :
– أيها الشعب الفضل .. يا بني (عبس) … أنا عنترة .. أنا القائل :
لي سيف حـده يـزچي آلمنآيآ**ورمح صدره آلحتف آلمميت
خلقت من آلحديد أشد قلپ**و قـد پـلـي آلحــــــــديد ومآپليت
وإني قد شرپت دم آلأعآدي**پأقـحـآف آلـر وؤ س ومآرويت
وفي آلحرپ آلعوآن ولدت طفلآ**و من لپن آلمعآمع قـدسقيت
فمآ للرمح في چسمي نصيپ**ولآ للسيف في أعضآي قــوت
ولـي پـيـت علآ فلگ آلـثـريآ**تـخـر لـــــعظـم هـيپته آلپيوت
ياااا بني عبس .. إنها والله الفجيعة … إنها والله الكارثة أن نعيش في ظل هذا الهوان خمس سنوات أخرى !
– (صوت 1) : لقد هرمنا يا عنترة … لقد هرمنا
– (صوت 2) : يا عنترة ياخ أنزل نحنا محتاجين ليك !
– (صوت 3) : يا عنترة ياااخ خليك عاقل ما كلنا عين أبو أهلنا طلعت
– (مسؤول) : ياخ أنزل بنديك بيت في الإسكان الشعبي !
– (عنترة) : الكلام ده قولو لي زول تاني .. عنترة يرفض التسويات ..
– (صوت 4) : أنزل يا عنترة دوام الحال من المحال وكل أول يهو آخر
– (عنترة) : أسالو عني جميع القبائل والشعوب إن كنت أرضى الذل والهوان .. والله إن باطن الأرض خير لي من ظهرها !
– ( وهو يلقي بجسده الضخم في النهر صائحاً) : تحيا عبس … تحيا عبس
من وسط الجموع المندهشة ينسل (شيبوب) متجها نحو فرس عنترة (الأبجر) يمتطيه متجها عكس أتجاه الجموع التي إتجهت صوب شاطئ النهر (أكيد بيكون متابعو بوكسي) !
مشهد (4) :
الجموع تجلس على حافة النهر .. بينما (لنشات) الإنقاذ النهري تجوب النهر عرضاً وطولاً بحثاً عن جثة (عنترة) الذي لم يظهر له أثر ، مواطن يهمس في اذن آخر :
– الزول الزي عنترة ده ما بموت منتحر … يكون عاملا (تمثيلية) عشان يقلع ليهم بعد شهر شهرين يجيب أجلهم !!
كسرة :
سيداتي سادتي .. يرى المسؤولون أن عنترة قد إنتحر يأساً بينما يرى المواطنون أنه عائد بلا أدني شك لتغيير واقعهم المرير … الفاتح جبرا .. صحيفة التيار .. من أمام كوبري التيل الأبيض بأمدرمان ..!!
– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و
[email][email protected][/email]
حلوة ياأستاذ جبرة ههههههههه دمت محترماوستكون في الدواخل نبضاوفي الظلام نورا
و عند مفترق الطريق المؤدي الى الكبري حيث توقفت العربات .. جاء عسس المرور الى عنترة و طالبوه ان ” يركن” حصانه على جنب … ركن عنترة الحصان فجاءه احد العسس و قال له وين الرخسة … رخصة شنو يا زول؟ اجاب عنترة .. رخسة السواقة و الحصان …تلفت الشرطي و قال: و ما رابط الحزام؟ و كمان النمر مافي؟ اندهش عنترة و لم يجب .. و الله عال … لا انوار لا خطرات و لا فرامل … عندك مخالفات بي تلاته مليون .. امشي لي جنابو الفي العربية داك.
والله يا جبرا بااااااالغتا بولاغ ما عادي .. أينتحر عنترة؟؟؟ كان يعمل حاجة إيجابية مثلا يطلع مظاهرات ليلية متفرقة في أنحاء العاصمة الهلامية وأطرافها والنشوف الحيكومة بتتصرف كيف
اوع تقوم تنتحر انت كمان
خخخخخخخخ….قويه
يعني الفلم انتهى على كده ياجبرة والبطل انتحر ورئيس الخيانة قاااعد ماجاتو الحبة ؟؟!!,,, لاماممكن
يا خي طلعوا لينا يعدي البحر ويطلع بالضفة التانية بي توتي ولا اي حاجة ياخي نحن اندمجنا في المسلسل داياخي ,,, منتظرين الحلقة الرابعة
هههههه مبدع ياجبرة!
كسرة
القال بديهو بيت في الاسكان الشعبي دا من قبيلة بني كوززز ولا شنووووو ياجبرة؟
أستاذ عنترة نشفق عليك من السجن والسجان والله انت زول مرض وما تستطيع على البهدلة ورمى شارع الستين😝
ياود جبرة ياخى البطل مابموت وإذا كان فى قامة عنتره يكون بسبعة أرواح،،،،ياخى متعنا بعنتره دا شويه،،،،لسه منتظرين حلقات قادمات عن ود خالتنا دا،،
ياجبره كدى خلينا من جبره امس فى قناة النيل الازرق الطاهر التوم ومعاه ود لطيف والنور وواحد ثالث فى حتى تكتمل الصوره والبرنامج مسخن عن شراء المؤتمر الوطنى للاحزاب والحركات المسلحه وتقسيمها فجاة البرنامج قطع وقلنا يمكن فاصل ونواصل ولمن الطاهر التوم رجع تانى رجع بى ناس تانى وموضوع غير الاول ياربى يكون الحصل شنو عليك الله تسال لينا اخوانا ناس النيل الازرق
شكرا يا جبرا…
أنا غايتو
منتظر الجزء الثاني…
وحاجز لوج…
خسارة الانتحار سوف يحرمنا من عنترياتك المضحكة يا مبدع!
والله فعلا شر البلية ما يضحك، صار الشعب السوداني يضحك من شدة القهر الذي وقع عليه من قبل عصابة الجبهة الاجرامية ولصوص المؤتمر البطني.
لله درك يا أستاذ/ جبرة.
حرام عليك يا استاذ .. فأمثال عنترة الشجعان الذين يرفضون الذل و الهوان و يفضلون باطن الأرض علي ظاهرها لا ينتحرون ( بالموية الباردة ) .. و انما يموتون في ساحات الوقي ( واقفين )
ههههههههههههههههههه الله يجازي محنك . يادوب فهمت انو عنترة مقصود بيهو الشعب فعلا الشعب السوداني عنترة
ديل مش عنتره ديل دايرين عيسي زاتو عشان يقلعهم من جزورهم
يا ريت ان يفكر البشير وجادا في تقليد عنتره او يحاكي عنتره
هههههههههههه احبك يااااااااااخ.
(عنترة بين الحين والحين يفيق من غيبوبته ويرفع سبابته هامساً … تااااني خمسة سنين … تاني خمسة سنين)
شكرا لعنتره الكبير الذي اوصلنا لهذه الحالة المزرية المقرفة كلنا ( عنتره )
عبلة تناديني والأمواج تقاويني
هذه حيلة أجس بها نبض الشواطين
كيف أنتحر وديار عبس والشعب راجيني
وحب عبلة في دمي يسري سريان هذا النيل
أنا حي ولي عزم وقوة ولا أعرف الضعف واللين
هيا معي سويا الى دار كافوري والقصر الصيني
وسوف لا تجدون بعد هذا اليوم معقل انقاذي أو تمكيني
الفلم ده انا شفتو في 56 و64 و85 البطل ما بيموت والمتاريس جاهزة وعنده طلعات في ابريل وفي اكتوبر وبعد المناظر والدعايات يواصل عنترة السوداني رص الصفوف وجلب الخيل وجمع القبائل من دارفور يتقدمهم هلال وحميدتي ومن كردفان يتقدمهم الحلو ومن النيل الازرق يتقدمهم عقار ومن الشرق اوهاج ومن النهود الشيخ الجليل ومن دنقلا احفاد بعانخي وتتجمع كل القبائل في قري وتنطلق الي الخرطوم لتلتقي بالضباط الاحرار ( النسخة الاصلية) ومن كبري القوات المسلحة يتقدم عنترة في وسط الفيالق وحوله زعماء القبائل براياتهم بعدد اقاليم السودان فقد توحدت القبائل في اقاليم وتعاهدت علي اصلاح الحال المائل في السودان وكنس تجار الدين اعداء الشعوب الاخري الذين قسموا الدار بدعوي ادخال الاسلام وعادوا امريكا واوربا بدعوي ( الرجولة) واستقلال القرار وجعلوا من اذكي الشعوب اضحوكة وعزلوه عن مؤتمرات دول عدم الانحياز وهو ذات الشعب البطل الذي كان من مؤسسي مؤتمر دول عدم الانحياز في باندونج فاذا به الان يقصي رئيسه عن حضور المؤتمر في اندونيسيا — جزاك الله خيرا استاذنا جبرة فانت تحرض الفتية علي الابداع في التعليقات ولهم ايضا الشكر فقد امتعتمونا جميعكم و خففتم عنا هذا الضيم والقهر.
لا لا لا يا ابن جبرا
انت مخطى فيما ذهبت ، والانتحار ليس شيمة الرجال من شاكلة عنتر فارس بن عبس …شهم جلد لا يهاب الأعداء … وقد سبق ان اتهموه في زمن الشريعة والدغمسة بممارسة الحب والغزل لأبنة عم مالك وضايقوه وحالوا جلده أربعين جلدة الا انه فلت منهم بعد ان صرع منهم أربعين رجل
ولا اظن يا ابن جبرا ان اعصابه منهارة ولا اظنه قد انتحر …. ولكنني أخاف عليه من شيء واحد ان يكون وجد مخازن الحشيش والهلوسة التي دخلت الخرطوم عبر تغر البلاد ورتع فيها والمسطول ممكن أي سيء…
ضليت الطريق يا فاتح جبرا ..
ضليت الطريق يا فاتح جبر ..
الرجل السوداني لن ينتحر لانه البشير جدد لنفسه خمس سنوات …. والثوره قادمه قادمه….. وسترى عنتر السوداني يقود الجماهير الهادره والزاحفه على القصرين وإزالة النظام ورميه في مزبلة التاريخ..
يا جماعة عنتر مات وشبع موت والزمن دا زمن شيبوب (لو فيهو خير) انتو ما شايفنو ركب فرس عنتر وماشي عكس الناس والبوكسي متابعوا ( يا هو يا هم)… اركز يا شيبوب ما فضلت إلا انت ……..
خربشات خريج الصف الرابع ابتدائي….. نصيحة غالية لوجه الله
…………………………………………
…………………………………………
نصيحة غالية لوجه الله
أسمعها مني يا مشير
نصيحة خالصة لوجه الله
اسمعها مني يا زعيم نصيحة مخلصة
لوجه الله ورسوله الكريم
اسمعها مني يا ملك من اجل (أمنا)
السودان العظيم
اسمعها مني ومن صياح الشعب يوم اذا صرخ
وقال لك ارحل … فارحل، وآثر السلامة يا زعيم
ارحل من اجل حفظ وحدة السودان من الشتات والضياع ومن الحروب
يا مشير و يا ملك و يا زعيم
يمكنك ان تمطي حصانك أينما تشاء
يمكنك ان تقوده الي البحر
لكنك لا تستطيع اجباره
علي تناول شرب جرعة من ماء
ان حاولت اجباره فانه يرفضها بكل كبرياء
هذا هو الحيوان
فما بالك بشعبنا العظيم البطل
لا تنخدع سيدي المشير
وتظن انك ركبت ظهورنا دراجة
لتقودها كما تشتهي يمنة او يسار
مرة تركبها باسم الله
وتارة تربطها كما الحمار
ولا تظن انك كتمت انفاسنا
علي مدي ست وعشرون عام
ولا تغرنك طبخة انطباخات الانتخابات
ولا يخدعنك مليء صناديق الاقتراعات
الصناديق يمكن استثمارها تجارة
بملئها بصل
او بحب البطيخ والتسالي
وتصديرها الي كل الدول
وعائدها المجزي بالدولار والريال
ابني به الانفاق تحت الأرض
من القصر الي البحر
لتعبد طريق الهروب
ليكون طوق نجاتك اذا ما شعبنا الكريم
الابي زمجر وثار
وضرب الحصار حول القصر
فشعبنا جابر
وشعبنا بطل
ان ثار
يثور كالبركان
كالزلزال
كعواصف الرياح
والمطر يصحبه البروق والرعود
شعبنا عند الغضب كسيول سيل منهمر
يطهر الارض ويجرف كل المصائب والعفن
وشعبنا قد قالها عند صندوق الاقتراع
وقالها بالعربي الفصيح وبالشفاه وبالكتابة
ارحل ،ارحل…فارحل واثر السلامة
يا جماهير الراكوبه وحدوا صفوفهم لقلع الحرامى و مصاص الدماء البشير , يجب طرد على بابا و الاربعين حرامى , المجتمع الدولى قال كلمته هذا الهمبول الى مزبلة التاريخ و يجب ان يحاكم فى السودان , محكمة لاهاى خمسه نجوم , يرجع لينا الاموال التى نهبها مع مجموعته من اخوانه و الكيزان ٠البلد خاويه على عروشها لا جيش لا شرطه , و بكرة لما تدور كلهم بيدخلوا جحورهم و لا حمدتى لا عبدالزمبارو ما يخيفكم الاعلام الحكومى , حقيقتهم ظهرت من الانتخابات لا عشرة مليون و لا ملىون حتى . اولا هدم اوكار الشر من مراكز الامن فى كل مدينه و دور المؤتمر الوطنى , نحن شعب متماسك لا تخفينا عبارات الصومله و اطلقوها ليرهبونا و الشعب السودانى فرز عيشتو و اكد انه شعب موحد٠
يا جبره لو كتبت انا الكلام دى فى الصحف بكره ح القى نفسى وين ورينا حقيقتك والحصانه المعك ولا انت عنتر ونجن ما عارفين ما تورطنا مع الجماعه ديل او ورينا بتعملها كيف
عنترة مات منذ ان ماتت الأحزاب عنترة اصبح لايفرز بين الصادق والكضاب لذلك بدلاً من وخوفاً من يدخل المعركة وينتصر ولكن من غير أن يحكم القبيلة فالإنتحار هو اسلم وسيلة
ولكن تناسا عنتر ان يسعين بزعماء بني دنقل وفور وبني عامر وبني نوباتية وبني مسيرية وبني عرب من اجل توسعة القبيلة
… أخبار ملف الانتخابات شــنو …
يا جماعة الخير ,جبرة لم يقل عنترة انتحر ولا مات , بس قال وقع البحر , و تأكدا لكلامى هذا, لينشات الجماعة الما لقوه, وسؤالهم عن انتحاره يئسا وامل المواطنين بعودته, وانا خبرتى بعنترة الذى اعرفة لم يمت, بل هو فى هجرة اختار له النيل ريثما ويرتب صفوفه , وحتما سيعود , وسوف يخبر كل من شهد الوقيعة انه لا يخشى الوغى ويعف عند المغنم. صصبرا ال ياسر ان موعدكم الجنة
يا أخوانا الزول الإسمو عنتر دا .. دفع رسوم وضرائب الإنتحار حقو دا ولا خمانا ساكت
يا الفاتح اخوى الله يصبرك و يصبر بنى عبس
ورينا فارشين وين
و كان ما وصلناكم كشفنا ما بتاخر عنكم……….
يا جماعة اللعبة اكبر من كدا البلد مباع والاحزاب مباعة والحركات المسلحة قابضة الثمن وكبار شيوخ الاحزاب قابضين الثمن ونحن الحمد لله واهلنا قابضين الجمر . فما الحل ؟
المعارضين في نعيم والحزبيين جميعا والمستقلين وايضا الموالين وحدث ولا حرج الوزراء والمدراء العسكريين فالجميع قابض الثمن دولار او جنيه بالمليارات ولكن اهلنا والعاملين والمزراعين قابضين الجمر حي فهل من مخرج يا جبر. ويا شعبي الفضل لينا الله وعيشة السوق .
وبعد اسبوع من انتحاره والذى قيل انه تم بعد ان ُعمل غسيل مخ لعنتره .. تم عقد قران عبله على كبير
قبيلة بنى كوز.. مازوجة شهيد وكده .. عبله أ صبحت السيده الاولى فى القبلتين بنى عبس وبنى كوز .. وهاك يانغنغه ..جمعيات خيريه والذى منو..