توطين المحن! قصيدة في تخليد ذكرى شاعر الوطن ( حميد )

توطين المحن!

شعر: الوسيلة حسن مصطفى
[email][email protected][/email]

أمانة يا زمن ….. كفاية

كفاية علينا هّم كل يوم

هّم العيشة – هّم الغربة حتى – ونحنا بين نيلين

وألم مدفون ( بقالو ) سنين

يبتق لي شقاوة الحال

زراعة المحن توطين!

شهر شهرين يموت فارسين

أصحاب كلمة دغرية..

نُضاف وعُفاف..

جباه بالعزة مروية

كانوا لطاف … كانوا خفاف

وجد سمحين.

سماحة وطن

بي فد شختة..

صار نُصين!
…

بحر.

( حميد )

من اللحن البيحكي ألمنا .. وحمم ناساً كرام طيبين

يحس إحساسنا يبكي أحوالنا .. يبكي عمرنا

وفي شعره

بنتلذذ معاناتنا ونتناسا العذاب والويل

لاهو شيوعي لا شعبي

ولا بعثي لا أنصاري لا ختمي ولا حالتين!

كل الوطن حميد يا هو هو السودان

كل القيم حميد يا هو هو الانسان

شال الأمانة بدلنا وقال التنوع خير

قال السلام إسلام! … قال العدل إسلام! … قال الأمانة إسلام!

وكل التعايش زين!… لا للمحبة بديل

جانا الخبر يوم داك

زاد المرارة أضعاف

عكر مزاج النيل

قامت قيامة الناس

إشهدو وقالوا البلاك سودا

قالوا السكك خطرة كل السكك خطرة

نمشي الطريق من وين

منو البلاك دليل

وداليا ..

في فضاء أم در .. تعِدّ في مآثره أكان تِنعد

.. تعزينا

دموعا تصب ..

.. تواسينا

تبكي على بلد

صبح ( سُلفة! )

تجرِسنا .. وتبكينا

بلد منكوب ..

تزيد آهاته كل يوم..

صُبح وغُروب

وناس أخوان .. عشان تفهم … تهِـد الحيل

.. تعذبنا

……

فقدنا الحكمة في الكلمة!

مسكنا السونكي والبارود

طريقنا أشتر و ماهو عديل

نحاحي نخاف من الخازوق!

حليل جلسات صفاء النية

راح طعم الحلال لي وين

طال المُسخ حتى الحان غناوي النيل

طال المَسخ حتى صورة بنات النيل

طال المُسخ حتى مكارم السالفين

طال المَسخ حتى وحدة قبائل النيل

حليلو الكان نعدو نحسبو مليون ميل

فقدنا إحساسنا بي وطن

صبح في غفلة مجرى

.. وسيل! ..

……….

ألف حكاية

أمانة كفاية…

ألف حكاية..

حكايات شعب كلو أغراب

يصدِق وعد كل كذاب

يداوي أمراضه .. كل آلامه

بالأعشاب!

نسألك إنت بالمحجوب

ألطف بينا صبرنا داب

سلاح مرفوع

كفانا خراب

وجع مصنوع

وجع تلقاه في كل

باب

وطن..

في كل ( لفة !)

تحلف..

تقول محروم..

من الإنجاب!.

……….

وطن مكلوم .. وطن مذبوح .. وطن ممكون بي جنس تمكين!

نعيشا حلم ..

يعبوا زفير!

نسوي عمل..

يشخروا شخير!

وياكلوا الزين يعيشوا الحين زي ما يبين!

ونتوسد دفاتر الهم

ونتكاشش ونتدافر

وتتوه آمالنا

في طلت

( قمر تسعة وعشرين!)

كتر الكلام يا ناس

طول اللسان مترين

ايه لازم العمل مادام

الكلمة بي قرشين

يبست عروق عزة من شفط العدار والويل

…………

وبابك.. يـــااااا كريم

.. مفتوح

تبدل همنا..

المفضوح

ويتحقق أمل حميد

تشرق شمسك..

الحرة

وتنقذنا.. من المُقبِل

وفي المُقبِل..

بنحلم بي سفينة نوح

وتحفظ ( نورا ) بي قدرك

ونتعشم.

تلم من تاني كل السوح

وتتلون وجوه دنيانا

خدار .. أخضر شمع وقموح

أريتك .. أريتك

أريتك تجبر الخاطر

وتختم لينا ساعة خير

تصالحنا..

وتلملمنا

يغور في سمانا..

.. كل ممحوق

وكل كذاب ..

وكل مسنوح

ونكتبك يا وطن آية..

…….

أمانة .. كفاية

أمانة عليك.. يا زمن.

كفاية

دا البلد أصبح..

حكاية

تحرت في البلاء وتنكت..

حواديتاً تحرق قلب العدو الما بلين

يقولولك:

أسكت عيب!.. إستغفر

دا حكم الله .. وحكم المولي ألف حباب

وقدر الله أصلوا كتاب.

وكت ما يحين.