يا جيشنا يا مقدام مع شعبك انت تعال
معز عمر بخيت
شعب النضال الطال
يا أعتى من أقوال
حان الزمن قرّب
لي ثورة الأفعال
يا جيشنا يا مقدام
راجين تجيب الفال
تمسك شعار الحق
مع شعبك انت تعال
نهزم دقون الزيف
والحاكم الدجال
ونقيم بلاد العدل
بي دين سمح وخصال
ما بي بطانة السوء
والسرقة والإذلال
ما بي الفساد والجور
ما بي كذب وضلال
لوطنا نحن نثور
زاحفين وراك رجال
أفواج من الطلاب
ونساء وشيب واطفال
زي الشمس في الليل
يتحدوا لهب الويل
ويحطوا التمثال
ويدكوا قصر الشر
إقدام رهيب زلزال
ما القصر ساسو عجين
وطوابقو من صلصال
نفداك يا سودان
في كل ساح ومجال
ليك نتّحِد أقوام
ناساً كتار وقلال
لا بينا غيرك وعد
شايلنو فوق إجلال
لا خوف ضرير مهزوم
لا موية في غربال
لمتين نعيش أغراب
ونسيب وطنا منال
لي ناس عديمة الحس
ابليس عليهم قال
ديل في الغواية فنون
عبدوا البنون والمال
ديل حيروا الشيطان
والتوبة تاني محال.
____________________
معز عمر بخيت
[email][email protected][/email]
ابشر بالخير يادكتور…تسلم ويسلم يراعك..
نفداك يا سـودان***** في كل ساح ومجـال
لمتين نعيش أغراب***** ونسيب وطنا منال
لي ناس عديمةالحس *****ابليس عليهم قال
ديل في الغواية فنون عبدواالبنون والمال
ديل حيروا الشيطان****والتوبة تاني محال
**لي ناس عديمة الحس ابليس عليهم “بال”
ألتحية لك , يامعز , وبخيت , وبرى, ألى ألامام !
ما اروعه من نشيد يصلح ليوم الثورة ضد الكيزان . يا ليت الأستاذ / محمد الأمين يقوم بتلحين هذا النشيد ليكون جاهزا ليوم الثورة على الكيزان . والطلب موجه لكل المبدعين من الفنانين . وشكرا يا دكتور .
الثورة
ثورة شعب
الجيش صبح
طبال
يا حليل
زمان الجيش
الكان قوامه
رجال
ناس
عبد الفضيل الماظ
ونخبة من
أبطال
علموا
التاريخ وكتبوا
فوق سطور الرجالة
مقال
أؤمن
بالشعب الأبي
معلم الأجيال
ما
بنقطع عشمنا
في أولاد عازة
ما في
محال !!
حياك الله بروف معز هاهى انشودة الثورة وكم هى من رائعة واول الغيث قطرة
التحية لك دكتور معز ايها الرائع ,,,كلماتك نصا ومعنى تنطبق على هؤلاء الانجاس
يا سلام عليك يا دكتور معز يا امدرمانى يا نبيل ويا سودانى يا اصيل وقريبا ستشرق شمس الحق ونلتقى فى ربوع امدر يا زول ياسمح وليحفظ الله السودان واهله من كيد وخبث عصابة الرقاص .
لك التحية يا دكتور المعز. لقد صدقت في كل ما ورد في قصيدتك العصماء هذه، وخاصة وصفك لهذه العصابة بحبها للبنون والمال وأنها حيرت الشيطان!
دائماً مبدع يا دكتور يا غيور على بلدك وانشاءالله بعد بشة تجي السودان وتقعد في السودان وتكون وزير الصحة بدل ناس حاموضة
حتى انت يادكتور معز ؟؟؟؟؟؟ حسبتك رشيدا وها انت تراهن على الفرس الخاسر ونقولها لك ولغيرك يادكتور
نحن فيها والعاوزها يجى ياخذها