حرامي الطماطم
نار هادئة
حرامي الطماطم
احمد مامون
[email][email protected][/email]
ارتفاع مخيف في اسعار الطماطم يكاد يفوق ارتفاع نسبة مياه النيل في الخريف ..
سعر الكيلو يتراوح ما بين 25 جنيه 30 جنيه (وطبعا دي بدون ضريبة)
اسعار الطماطم بقت تجيب (طمام)..
نحنا مفروض نكون سلة غذاء العالم صرنا نشتهي الغذاء رخيا…
الطماطم اختفت من المايدة والواحد لو شافها في السوق ساي (يغمي عليهو)..
العزمك في بيتو وجاب ليك في الصينية (سلطة طماطم) اعرف انو بعزك جد جد..
كانت حل (للفلسة) لما ترجع من الشغل تغشي (الخرضجي) تشيل سلطة طماطم بتقضي يومك…
هسي البندورة حترجعنا للعصر الحجري ونظام الشراء والبيع (بالمقايضة)..
لو فلسته تبدل موبايلك بي (كيلو طماطم)..
الطالب لو اكل (طماطماية ) تاني يوم بصبح بروفيسر ..من الفرحة طبعا..
والواحد لو جاب ليهو بت يسميها (بندورة) ولما يجي يناديها ..يدلعها يقول ليها : تعالي يا غالية..
وربة المنزل لو اتحصلت ع ربع كيلو طماطم (ممكن تتجدع) بدل ما تعمل سليقة ..تعمل (شية طماطم)..
دلالة علي الترطيبة تعلق حبة (البندورة ) في باب البيت زي (رأس الخروف)..
او تكون في مقدمة العربية محل (العطر)..
ظاهرة (حرامي الطماطم ) حتتفشي من مبدأ سرقة ما خف وزنه وزاد سعره …ولو (حرامي القلوب تلب ) اتاكد انو لو لقي التلاجة فاتحة ولم الطماطم بنسي قلبك وبظفر (بالغنيمة)
شرااااااااااااااارة..
مافي حل غير(المقاطعة)
كيلو الطماطم في دول الخليخ ارخص من السودان وللعلم دول الخليخ تستورد الطماطم من الخارخ ومتوفرة طول العام . لكن الشئ المخجل لا يمكن بلد كالسودان ان يستورد الطماطم . لماذا لا نزرع الطماطم نحن بالبيوت المحمية والله ما بنحتاج لبيتو محمية حديثة بالرواكيب ممكن نزرعها وتحت الشجر الظليل مثل اشجار المانجو والنيم ودي متوفرة في مزارعنا . اسئل اخوتي الزراعين اهل الاختصاص هل يمكن زراعتها تحت الاشجار الظليلة افتوني افادكم الله .