عزيزي المواطن ، عزيزتي المُواطِنة : هل أتاكَ حديثُ الشِرْذِمة القلائل ،خنافسِ المزابل .. الثلاثةِ المفاصيل .?. يبقى إِذَنْ ,,
خَلِّي بالَك ، وضِفْ لمعلوماتك ..
إنو هناك حزب اسمو ,, الحزب الناصري العربي الوحدوي الديمقراطي الاشتراكي السوداني .. الحزب ده عضويته من شخصين اتنين وثالثُهُم جمال الكنين .
جمال الكنين ده، مافي زول عارف بالضبط أيَّ خَلْقِ اللهِ هُوَ . لكن يبدو إنو هو الزعيم رقم صفر .لأنو هُوَ بالصفة دي أصدر قرار بفصل ساطع الحاج .. على بَيِّنة من انتهازيته المقيتة ، وعدم مبدئيته ومخالفته لدستور ولوائح الحزب.ساطع كان بيهتف في مؤتمرات الكيزان، ولقاءات البشير الجماهيرية أن; لا لدنيا قد عملنا نَحْنُ للدينِ فداء .. فليعد للدين مجدُه أو تُرَق كُلُّ الدماء .وعندما انقلبت لجنة البشير الأمنية على البشير ، قام ساطع طوالي جدع سيِّده البشير في أقرب مزبلة ، وانخرط مع اللجنة الأمنية .فاستفادوا منو في تزوير الوثيقة الدستورية .وبعدين فيما بعد، جو ناس الحركات المسلحة وعملوا حاجة كده سموها اتفاق السلام . ف طوالي قام ساطع زَوَّر ليهم الوثيقة الدستورية المزوَّرة .وهكذا ، وعلى العموم , هو مبذول ومتاح لكل من أرادَ به خيراً أو تربَّص به شَرَّاً ، ولا يتورَّع أبداً ، ولا يَرُد يدَ لامس.
قام فيصل محمد صالح الوزير فصل جمال الكنين.! .قام ساطع الحاج وصف الكنين بإنو رئيس صُوَري ،وكيسو فاضي ساكت ، وزعيم عصابة ساكت ، وإنو قراره بفصله لا يسوى الحبر الذي كُتِبَ به. وتأسيساً وبناءً على ذلك، قام ساطع فصل فيصل .! .
طيب الوزير الورل دا طالما هو مفصول من الحزب بواسة شاطح قاعد وزير على أي أساس؟ بمثل ياتو حزب؟ ولا بمثل نفسه كتكنوقرات؟ ههه