كثيراً ما كتبتُ هنا عن سذاجة بعض ساستنا وابتذال شماعات لفشلهم، غبيَّة، باهتة وخالية من أدنى معايير المنطق والعقلانية..
من تاريخنا القريب جداً… عندما تضاءلت كميات السكر بالأسواق في زمن حكومة البشير.. إنبَرى أحد جهابذة التخطيط الإستراتيجي (سجم أُم التخطيط).. وصرَّح بالخط العريض بإحدى الصُحُف السيارة بأن هذه الأزمة سببها (النَمِل) نعم النمل الواااحد دا!!! هجم على مخازن السُكَّر والتهمها.. تباً له!!!
ثم.. في لحظةِ تغافُلٍ لبعض مهندسي شركة مياه ولاية الخرطوم انقطعت المياه عن منطقة بُرِّي، فكانت الشماعة جاهزة.. ديل الشيوعيين قفلُوا البلُوفة!!!
أما عندما حدث الخلل الفني بكوبري المنشية.. فكَّر منظراتية النظام لإيجاد شماعة يلقون عليها فشل مهندسيهم.. فكَّروا وقدَّروا.. ثم أعادُوا الكَرَّة كرَّتين، لم يجدوا أي شمَّاعة أو حتى (حُمار هِدُوم) ليعَلِّقُوا عليه فعلتهم الشنيعة تلك، فاستقرَّ هُداهُم السمِج على أن (جقُور الشيوعيين) هي الفَعَلت الفِعْلة البايخة دي، قَرْقَرَت جنبات الكُوبري الخرصانية.. وكتبوها عناوين بارزة في الصحف!!!
وبعد ثورة الشباب السلمية لمع نجم موظف المنظمات الأُممية الدكتور عبد الله حمدُوك وجاء محمولاً على توصيات الأُستاذة أميرة الفاضل.. فكان اكبر (وارغُو) يدخل إلى مكاتب مجلس الوزراء من لدُن تأسيسه في العام 1954م إلى يوم الناس هذا!!!
فبدلاً من أن يهتم بأمر الوطن والمواطن.. إنشغل مستشاروهُو اللِّي هُم من (نفس طينة الزُول) بتربية دجاج إليكتروني حوله.. فكانت صيحتهم المُستفزَّة والناس جِياع (شكراً حمدُوك) على غرار سير سير يا بشير والناس هَلْكَى.. ومن يومها وهُو من وحلٍ إلى وحل، ولجنة البشير الأمنية تتمدد من حوله والشعب يصرخ ويئن من أبسط متطلبات الحياة الكريمة!!!
ذهب إلى الدمازين التي منها إنطلقت أول شرارة ثورة ديسمبر 2018م.. تم طرده عبر ذلكم الفيديو الشهير بالصُوت بالصُورة حمدوك طلع ماسُورة.. فصاح أتباعه.. ديل الكيزان!!!
ذهب إلى الكلاكلة أو كما يحلُو لشبابها (كيكي سنتَر)، تم طرده.. فكَاكَا دجاجه.. ديل الدولة العميقة!!!
فعندما ذهب بالأمس لعطبرة.. أيضاً هتف شبابها ضده (عطبرة عطبرة حُرَّة حمدُوك يطلع برَّة).. فانقسم دجاجه هنا إلى قسمين:
1/ الدجاج التقليدي قال ديل الكيزان..
2/ الدجاج الشوية كدي مفتِّح قال ديل الشيوعيين..
وما بين شمَّاعة الكيزان، الدولة العميقة والشيوعيين.. يظل حمدوك بحكومته فاشل.. ويظل بخيت وفضل السيد كذلك.. فلا حل سوى رحيلهم عاجلاً أم آجلا!!!
خارج النص:
إعتبر كثير من العقلانيين والمتفائلين بأن ما حدث لحمدوك بعطبرة وقبلها للفريق أول (خلا) بخيت والفريق (الركن) ياسر العطا هُو بمثابة تمرين ديمقراوطي يحدث في كثير من البلدان المتقدمة..
نقُول لهؤلاء.. في أُوروبا والدُول المُتقدمة عندما يفشل المسئول (ويصرِّح ويقُول عبر فضائية سودانية 24 نحن فشلناااااااااا فشل ذريع) يقدِّم إستقالتُو ماب يتلصَّق في الكُرسي لاحدِّي ما تجي ثورة شعبية تقلعُوا قلِع!!!
ويظل سؤالنا الدائم.. البلد دي السايقها منووووو؟.
الجماعة القبضوهم وعرضوهم في التليفزيون القومي (كأنهم هُم المسئولين) عن مجزرة 8 رمضان حاكموهم ولَّة لسَّع؟.
يا ربي السادة: صدِّيق تاوُر، علي الريح السنهوري، فضل الله برمة ناصر، مريم الصادق المهدي، كمال حامد بولاد، جمال إدريس الكنين، آدم يوسف الضي رايُن شنُو في إلغاء قانون مقاطعة الكيان الإسرائيلي؟.
خبر الجماعة القبضوهم في مطار الخرطوم مهرِّبين (الذهب) برَّة شنو؟
وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟!.
بی مناسبة المسؤول القلتا انو متلصق في الكرسي وما عايز يفارقو رغم فشلو الكبير، قالوا كان في واحد من عينة المسؤول ده سمع انو في شيخ سرو باتع ويدو لاحقة لو رفع يديهو وعزم لى زول مسؤول تاني مابتجيهو عوجة وحا يستمر في الكرسي بتاعو لحدي مايزهج براهو ويقول خلاص كفاية. قاليك الزول مشى للشيخ وبعد مارمى بياضو قاليهو:
يا شيخ فلان، طبعا انت عارف انو انا زول مسؤؤل وماسك حتة حساسة شديد، والحتة دي من غيري ما بتمشي، فعشان كدا انا عايزك تعزم لي في الكرسي بتاعي ده وتربطو لي ربطة شديدة، مافي زول ود مرة غيري يقعد فيهو.
تامل الشيخ في وجه الرجل وصار يبحلق فيه باستغراب شديد وعلم ان محدثه لاينتمي الى جموع المؤمنين، فلو كان كذلك لعلم (ای المسؤول) باحكام القضاء والقدر وسنن الحياة النافذة، فلو دامت لغيرك لما الت اليك.
بعد استغراق في التفكير، انتبه الشيخ ثم استدرك وطفق يهمهم بكلمات غير مفهومة( لعلها لعنات) ثم قال للمسؤول:
خلاص، امشى جيب لي الكرسي عشان اعزم ليك فيهو.
قام المسؤول قال للشيخ ياخي قصة انو اجيب ليك الكرسي دي قصة طويلة، خلاص اعزم لي في جعبتي دي وخلي الكرسي يباريها محل ماتقبل!