كمال كرار
أحمد زميلنا الذي درس بسوريا في الثمانينات، أعتقل في تلك السنوات على أيام السفاح نميري وسألوه في التحقيق عن أهم إنجازات النظام فقال لهم (شارع طويل من الخرطوم لبورتسودان كل يوم فيه بص مقلوب)، فكان نصيبه السجن لسنوات..
الآن دعونا نتحدث عن إنجازات حكومة البنك الدولي ما بعد الثورة وهي كالآتي:
– صفر فدان زراعي جديد في أي بقعة من بلادنا.
– صفر مصنع جديد في أي مكان.
– انخفاض قيمة الجنيه السوداني بنسبة ٩٠٪
– ارتفاع معدل التضخم إلى ٤٢٣٪ بالأرقام الرسمية، والحقيقة ١٠٠٠٪
– صفر كيلوواط كهرباء جديد، وصفر حنفية جديدة على مستوى السودان..
دي مناظر الفيلم الاقتصادي بس دون الدخول في (الغريق)..
وفي شؤون الشهداء وفض القيادة تعطيل نتائج التحقيق عمدًا ومع سبق الإصرار.
تعطيل قيام المجلس التشريعي والمفوضيات، والسلام والاقتصاد والسياسة الخارجية في يد المكون العسكري بمجلس السيادة والباقين في مقاعد المتفرجين.
ومن الإنجازات أيضًا استمرار تمكين الفلول في الخدمة المدنية والاقتصاد والقطاعات الحيوية كالكهرباء والنفط وما جاورهما.
ومقابل الانبطاح للبنك والصندوق الدولي نال السودان صفر دولار استثمار مباشر في قطاعات الإنتاج..
ومن الإنجازات المشهودة بقاء نازحي دارفور حتى الآن في المعسكرات واستمرار الهجمات عليهم بعد أن خرجت اليوناميد بقرار الإنقاذ البائدة وتواطؤ الأمم المتحدة والسدنة بالداخل.
وأخيرًا وليس آخرًا فمن إنجازات حكومة الهبوط الناعم توفير وجبة فطور عبارة عن صحن بليلة لمصححي الشهادة السودانية، يا له من إنجاز..
وأي كوز مالو؟
الميدان
مصيبتنا انو نخبنا الفاشلة الواحد بيتكلم من غير ما يستصحب الواقع معاهو
مشكلتكم عاوزين حمدوك برااااااهو يعمل ليكم اى حاجة
حمدوك كتفتوه ورميتوه في البحر وقلتو ليهو ما تتبل
وانتو كاعلام بمقال واحد ما بتساعدوه
ماشايفين اعلام الكيزان الارهابيين الانجاس الفاجر شغال كيف؟ نشر اشاعات وتقرير مفبركة مضروبة وهجوم ليل ونهار في الثورة وتطاول علي الشعب والثوار وقلة ادب بتاعت اعلام الجبهجية الداعر
شوف ناس الضو البو وهندى زفت الطين واسحق غزالة وسمين خوجلي وعادل بوز والهالك الطيب مصطفي الشهير ب الطيب بهلول وكل العفن دا بيكتب كيف واتعلم منو.
والله لو جاء مليون حمدوك براهو مابيقدر يعمل حاجة وخاصة في وجود اعلام عميان و عبيط زى اعلامنا دا
جماعة الكيزان الارهابيين عندهم حوالى ٤٠ صحفي كوز وكوزة والثورة والشعب عندهم حوالى ٤٠٠٠ صحفي زى عدمهم والغريبة كلهم بيهاجموا الحكومة والثورة بصورة مباشرة وغير مباشرة
اذن العدد البيهاجم الحكومة هو
٤٠ + ٤٠٠٠ = ٤٠٤٠ عدو فاجر وصديق جاهل
العدو الفاجر هم الكيزان الارهابيين
والصديق الجاهل باقي الاعلام الوطنى الغبيان وعميان
تبا لكم
ابدعت كعادتك ياكيمو
الحلو ان المنبطحين مابقدروا يقولوا عليك
كوز…….بندوسوا دووووس
مفروض صندوق النقد الدولي يوزع طواقي خدر علي أعضاء الحكومة
لانو وطيلة تأريخنا المجوبك الحديث ،لم تمر حكومة بهذه الدروشة
دراويش يا رسول الله
إنجااااازاااات ….
ومن العجائب الباهرة ومعجزات آخر الزمان الظاهرة ان صار ابو الزمل اخونا كمال كرار يفتى ويكثر من الفتوى فى الشأن العام وفى صحفات الميدان -رحم الله ابوبكر الامين صاحب القلم الثورى الرصين –
منذ ايام الطلب بالجامعة عرف كمال بالاستعجال والشلاقة بجانب صوته السبرانو المزعج الاشبه بزعيق المراهقين الذين لم يتغير صوتهم بعد …
اكاد اسمع ذات الصوت يشرخ الاسماع:
ايييييي كووووز ماااالوووو
ولله في خلقه شئون
ما شايف أي ابداع من كيمو بتاعك دا. إلا إذا كان رمي كل اللوم على الحكومه ابداع فالشعب السوداني كله مبدع. انا شايف انو كلام ركيك خلاصته كالعاده “الحكومه ما ادتنا اكس واي زد”. الحكومات بكل بساطه جهات تجمع الضرائب ثم تنفقها على المجتمع في شكل خدمات ولكن عند ناس كيمو بتاعك الحكومه لازم تنفق على كل شئ (تجيب المال كيف لا يهمهم) المهم يجلسو على مواخراتهم في الضلله في انتظار ان يتحسن الوضع فجأة بقدرة قادر. وبهذا التفكير سوف ينتظروا كثيرا فزمن المعجزات ولى. قوم على حيلك يا عاطل …. قووم. قال أبدعت قال ..! محن.
بالواضح كدا حكومة الانبطاح للبنك الدولى دى ما نافعة اعملو ثورة حمراء وجيبونا نحن ديل عشان نكمل فيكم الماقدرو عليهو الكيزان..يعنى بس محتاجين بص عرضى من اقصى اليمين لاقصى اليسار و…وشنو اى كوز ……واى رفيق نشهيهو بلع الريق…